​ទូកក្ដោង៖ សហព័ន្ធ​កីឡា​ទូកក្ដោង​កម្ពុជាបានបញ្ចប់​ការប្រកួត​ជ្រើសរើស​ជើងឯក​ថ្នាក់ជាតិឆ្នាំ​២០២២ ដោយ​ជោគជ័យ ក្រោយ​ដំណើការ​ប្រកួត​រយៈពេល ៣​ថ្ងៃកាលពី​ថ្ងៃទី​០៥ ដល់​ថ្ងៃទី​០៧ ខែមករា​ចុង​សប្ដាហ៍​កន្លងទៅនៅ​ឆ្នេរ​រាម ខេត្ត​ព្រះសីហនុ ដែល​ផ្ដោត​សំខាន់ទាំង​លើ​ការពង្រឹង​សមត្ថភាព​កីឡាករ និង​មន្ដ្រី​បច្ចេកទេស​រៀបចំ​ការប្រកួត។​

​លោក សោម សុទ្ធ​រិ​ទ្ធិ​ពង្ស អគ្គលេខាធិការ​សហព័ន្ធ​បាន​ឲ្យ​ដឹងថា ការប្រកួត​នេះ​គឺជា​ការប្រកួត​ដ៏​មាន​សារៈសំខាន់​មួយ​សម្រាប់​ការបន្ត​កសាង​សមត្ថភាព គុណភាព ទេពកោសល្យ និង​វិជ្ជាជីវៈ​របស់​កីឡាករ-កីឡាការិនី ពិសេស​គឺ​​ការវាស់ស្ទង់​សមត្ថភាព​របស់​មន្ត្រី​បច្ចេកទេស អាជ្ញាកណ្ដាល​-​ចៅក្រម​របស់​សហព័ន្ធក្រោម​ការជួយ​គាំទ្រ​របស់​ក្រសួង​អប់រំ យុវជន និង​កីឡា ដើម្បី​ជំរុញអភិវឌ្ឍន៍​វិស័យ​កីឡា​ទូកក្ដោង​នៅ​កម្ពុជា ក្នុងការ​ត្រៀមខ្លួន​រួចជាស្រេច​ឆ្ពោះទៅ​ការប្រកួត​កីឡា​ស៊ី​ហ្គេមលើក​ទី​៣២ ឆ្នាំ​២០២៣ នាពេល​ឆាប់ៗ​ខាងមុខ។​

​សម្រាប់​ការប្រកួត​ជើងឯក​ថ្នាក់ជាតិ​រយៈពេល ៣​ថ្ងៃនេះមាន​កីឡាករ​-​កីឡាការិនី ២៧​រូប​ចូលរួមដែល​ប្រកួត​លើ ៦វិញ្ញាសា។ ជា​លទ្ធផល​ក្រោយ​ឆ្លងកាត់​ការប្រកួត​ដ៏​ស្វិតស្វាញ​លើ​ផ្ទៃ​ទឹកគឺ​កីឡាករ កែវ ភា​រុណ ជាប់​លេខ​១ លើ​វិញ្ញាសា​ Windsurfing Open, កីឡាករ គង់ សំរេង ជាប់​លេខ​១ លើ​វិញ្ញាសា​ Windsurfing Techno Open, កីឡាករ ញ៉ូ​វ ចាន់ ជាប់​លេខ​១ លើ​វិញ្ញាសា​ ILCA Open, កីឡាករ ចាន់ សុខ​វាសនា ជាប់​លេខ​១ លើ​វិញ្ញាសា​ Byte Boat Open ​និង​កីឡាករ ទិ​ត សុ​វណ្ណា ជាប់​លេខ​១ លើវិញ្ញាសា​ Optimist Open៕

​អត្ថបទ៖ លី ឈុន​ឡា