ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្ដីនៃប្រទេសកម្ពុជា បានមានប្រសាសន៍ថា ទោះបី​សង្គ្រាមបានរលត់អស់រយៈពេល ២៤ ឆ្នាំហើយក៏ដោយ ក៏ប៉ុន្ដែគ្រាប់មីននៅមិនទាន់បំផ្លាញ​អស់​នៅឡើយទេ ដែលរាជរដ្ឋាភិបាលកំពុងតែជំរុញនូវការដោះស្រាយ បោសម្អាតគ្រាប់មីន​ឱ្យអស់​នៅឆ្នាំ២០២៥។

សម្ដេចតេជោ ហ៊ុន សែន បានថ្លែង​នៅក្នុងឱកាសអញ្ជើញ​ធ្វើ​ជា​សហធិបតីនៅក្នុងពិធី​សម្ពោធបើក​ការដ្ឋានសាងសង់ពង្រីក និងលើកកម្រិតគុណភាពកំណាត់ផ្លូវជាតិលេខ៧​ ចាប់ពីរង្វល់មូលស្គន់ ទីរួមស្រុកជើងព្រៃ រហូតដល់ទីរួមខេត្តកំពង់ចាម នាព្រឹកថ្ងៃទី៩ ​ខែមករា ​ឆ្នាំ២០២៣នេះថា ខេត្តកំពង់ចាម ក៏ជាខេត្តគោលដៅមួយក្នុងការបំផ្លាញចោលគ្រាប់មីន​ ហើយប្រកាសជាខេត្តដែល​គ្មានមីន ​ដោយរាជរដ្ឋាភិបាលកម្ពុជាបានចាប់ផ្ដើមការបោសសម្អាតមីនពីភូមិគ្មានមីន ឃុំ ​គ្មានមីន ស្រុកគ្មានមីន រហូតដល់ខេត្តគ្មានមីន ​និងរហូតទៅដល់ទូទាំងប្រទេសកម្ពុជាគ្មានមីននៅ​ឆ្នាំ២០២៥។

សម្ដេចថ្លែងថា «រាជរដ្ឋាភិបាលបានដាក់ទុនយ៉ាងគំហុក​ជាមួយ​ដៃគូ​អភិវឌ្ឍន៍​ផ្សេងទៀត ដើម្បី​បោស​សម្អាតគ្រាប់មីន ដែលមកដល់ពេលនេះផ្ទៃដីមានមីននៅកម្ពុជា ​នៅសល់ប្រមាណ ៧០០ គីឡូម៉ែត្រការ៉េ ​ដែលត្រូវបោសម្អាត។ ​ដូច្នេះអ្វីដែលសំខាន់សម្រាប់យើងនាពេលនេះ គឺរក្សាឱ្យបាន​នូវសន្ដិភាពសម្រាប់ការអភិវឌ្ឍ សន្ដិភាពមួយមិនអាចគង់វង្សបានទេប្រសិនបើគ្មាន​ការអភិវឌ្ឍ»។

សម្ដេចតេជោ បានបញ្ជាក់ថា បើចង់មានការអភិវឌ្ឍ ​ត្រូវតែមានសន្ដិភាព​ ត្រូវរក្សាសន្ដិភាពឱ្យបាន ហើយបើចង់រក្សាន្ដិភាពឱ្យបានលុះត្រាតែមានការអភិវឌ្ឍ៕