បាល់ទាត់៖ ការប្រកួតកីឡាបាល់ទាត់ពានរង្វាន់ Soccer League លើកទី៦ ឆ្នាំ២០២៣ វិញ្ញាសាបាល់ទាត់បុរសបានដំណើរការប្រកួតហើយ ថ្ងៃទី៨ ខែមករា ឆ្នាំ២០២៣ ដោយចាប់ផ្តើមលេងពីពូល A ដល់ពូល D នៅទីលានបាល់ទាត់​បួនផ្សេងគ្នាក្នុងរាជធានីភ្នំពេញ។

នៅទីលានបាល់ទាត់វិទ្យាល័យបឹងកេងកង ពូល D ក្រុមបាល់ទាត សសយក ដំរីអង្គរ បានយកឈ្នះក្រុមបាល់ទាត់ដៃឯកច្រាំងចំរេះ ២ ក្នុងលទ្ធផល ៣ទល់នឹង១ ចំនែកក្រុមកីឡាបាល់ទាត់តំបន់សេដ្ឋកិច្ចពិសេស (United SEZ) ចាញ់ សសយក ខេត្តកោះកុង ២ទល់នឹង៣។ ប្រកួតបន្ទាប់ក្នុងពូល D នេះថ្ងៃទី១២ ខែមករា ក្រុមបាល់ទាត់ដៃឯកច្រាំងចំរេះ២ ប្រកួតជាមួយក្រុមកីឡាបាល់ទាត់តំបន់សេដ្ឋកិច្ចពិសេស (United SEZ) ឯ សសយក ខេត្តកោះកុងជួបជាមួយ សសយក ដំរីអង្គរ។ ថ្ងៃជាមួយគ្នានេះដែរក្នុងពូល B ដែលលេងនៅទីលានបាល់ទាត់វិទ្យាល័យបឹងត្របែក សម្ព័ន្ធយុវជនមុស្លីមកម្ពុជា ឈ្នះក្រុមមិត្តចាស់កីឡា ៣ទល់នឹង០ ចំនែកឯ Royal Bassac FC ចាញ់សាលាបាល់ទាត់​ពស់កេងកង ១ទល់នឹង៣។ ពូល B ប្រកួតបន្ទាប់ថ្ងៃទី១២ ខែមករា មិត្តចាស់ជួប Royal Bassac FC ឯសាលាបាល់ទាត់ពស់កេងកងប្រកួតជាមួយសម្ព័ន្ធយុវជនមុស្លីមកម្ពុជា។

ចំនែកលទ្ធផលផ្សេងទៀតពូល A លេងនៅសកលវិទ្យាល័យអាមេរិកាំង ភ្នំពេញ សសយក ស្រុកកៀនស្វាយ ឈ្នះក្លិបសិក្សាភាសាបរទេស ៦ទល០ និងស៊ីយ៉ាប៊្រេន ឈ្នះរាជសីហ៍ខេត្តកំពត ៣ទល់០។ ពូល C លេងនៅវិទ្យាស្ថានពាណិជ្ជសាស្ត្រអេស៊ីលីដា អាល់អាលី ចាញ់ហនុមានអគ្គលេខាធិការដ្ឋានក្រសួងការពារពារជាតិ ០ទល៣ និងសម្ព័ន្ធសិស្ស និស្សិតជំនីក ឈ្នះ សសយក ស្រុកពញាឮ ២ទល់នឹង១។ រសៀលនេះការប្រកួតមាន ៤ពូលទៀតសម្រាប់បាល់ទាត់បុរសដោយដំណើរការពីពូល E ដល់ពូល H។ សូមជម្រាបជូនថា ការប្រកួតបាល់ទាត់ពានរង្វាន់ Soccer League លើកទី៦ ២០២៣ នឹងបញ្ចប់នៅថ្ងៃទី១១ ខែកុម្ភៈ ឆ្នាំ២០២៣៕