ភ្នំពេញ៖ មន្ទីរពេទ្យកាល់ម៉ែត នៃក្រសួងសុខាភិបាល ព្រឹកថ្ងៃទី៩ ខែមករា ឆ្នាំ២០២៣នេះ បានបើកសិក្ខាសាលាស្តីពីការប្រើប្រាស់ម៉ាស៊ីនអេកូ សម្រាប់ផ្នែកសណ្តំ ប្រពោធនកម្ម និងសង្គ្រោះបន្ទាន់ ជូនដល់ក្រុមវេជ្ជបណ្ឌិតឯកទេស នៃមន្ទីរពេទ្យកាល់ម៉ែត។

បើតាមលោក សៀ សំណាង ប្រធានសមាគមនិកាយសាសនាចក្រ នៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ ​និងលោកវេជ្ជបណ្ឌិត Steven Rhondeau, (ស្ទីវីន រ៉ុនដូ) CEO/Chief Medical Officer នៃ Alliance for International Medicine ​បានលើកឡើងស្រដៀងគ្នាថា ក្រុម​គ្រូពេទ្យជំនាញខ្ពស់លើផ្នែកម៉ាស៊ីនអេកូ ​ដែលចូលរួមនាពេលនេះ គឺ​អញ្ជើញ​មកពីបណ្តា​រដ្ឋ​មួយចំនួន ក្នុងសហរដ្ឋអាមេរិក ដើម្បីស្វៈស្វែងរកវិធីសាស្រ្ត ដើម្បីផ្តល់ និងផ្លាស់ប្តូរបទពិសោធន៍ និង​សង្ឃឹមថា កិច្ចការទាំងអស់នេះនឹងជួយដល់លទ្ធភាពលោកគ្រូពេទ្យ អ្នកគ្រូពេទ្យ ដែលជា​វេជ្ជបណ្ឌិត និងឯកទេស នៃមន្ទីរពេទ្យកាល់ម៉ែត ឲ្យកាន់តែប្រសើរឡើងនូវប្រសិទ្ធភាព​ គុណភាព និងសុវត្ថិភាពនៃការព្យាបាលអ្នកជំងឺក្នុងកម្រិតខ្ពស់ ដោយជំនាញអេកូសាស្ត្រនេះ។

ទន្ទឹមគ្នានោះដែរ ឯកឧត្តមសាស្ត្រាចារ្យ ឡឹម តារា អគ្គនាយករងមន្ទីរពេទ្យកាល់ម៉ែត ​បានថ្លែងថា សិក្ខាសាលានាថ្ងៃនេះ ​គឺជាលទ្ធផលនៃកិច្ចសហប្រតិបត្តិការគ្នារវាងសមាគមនិកាយសាសនាចក្រ នៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ​ និងមន្ទីរពេទ្យកាល់ម៉ែត​ ដែលទើប នឹងបាន​ចុះអនុស្សរណៈយោគយល់គ្នាជាផ្លូវការ កាលពីថ្ងៃទី៥ ខែធ្នូ ឆ្នាំ២០២២ ​កន្លងទៅនេះ។ កិច្ចសហការនេះ ​មានគោលដៅពង្រីកចំណេះដឹងសមត្ថភាពក៏ដូចជាផ្លាស់ប្តូរ​បទ​ពិសោធន៍គ្នារវាង​ក្រុមអ្នកឯកទេសទាំងពីរភាគី ​ពិសេសសិក្ខាសាលាថ្ងៃនេះ​ផ្តោតលើបច្ចេកទេស​គន្លឹះក្នុងការ​ប្រើប្រាស់​ម៉ាស៊ីនអេកូក្នុងការដាក់ថ្នាំស្ពឹក សណ្តំ ប្រពោធនកម្ម និងសង្គ្រោះបន្ទាន់ តាមរយៈក្រុម​សាស្ត្រាចារ្យ-វេជ្ជបណ្ឌិតឯកទេសអញ្ជើញមកពី Alliance for International Medicine ដឹកនាំដោយ​លោក​វេជ្ជបណ្ឌិត Steven Rhondeau (ស្ទីវិន រ៉ុនដូ)។

តាមរយៈសិក្ខាសាលានេះ នឹងធ្វើឱ្យកាន់តែប្រសើរឡើង​នូវប្រសិទ្ធភាព​ គុណភាព និងសុវត្ថិភាព​នៃការព្យាបាលអ្នកជំងឺក្នុងកម្រិតខ្ពស់​ ដោយជំនាញអេកូសាស្ត្រនេះបម្រើដល់ការដាក់ថ្នាំសណ្តំ និង​ថ្នាំស្ពឹក ដូចជាការចាក់ថ្នាំស្ពឹកក្នុងតំបន់ ​ដោយមានម៉ាស៊ីនអេកូជាជំនួយ, ការរករោគវិនិច្ឆ័យភ្លាមៗ​លើអ្នក​ជំងឺនៅផ្នែកសង្គ្រោះបន្ទាន់ រួមមានការធ្វើ ​FAST Echo (Focused Assessment with Sonograpay in Trauma echo) ​លើអ្នកជំងឺ Polytraumatisme, ការធ្វើអេកូលើសរីរាង្គសំខាន់ៗ​ដូចជា សួត បេះដូង ពោះ ដើម្បី​ទទួលបានរោគវិនិច្ឆ័យ ឆាប់រហ័ស សម្រួលដល់ការសម្រេចចិត្តព្យាបាល និងសង្រ្គោះអាយុ​ជីវិត​អ្នកជំងឺឱ្យបានទាន់ពេលវេលា​ និងត្រឹមត្រូវ។ ការធ្វើអេកូនេះមាន​ផលប្រយោជន៍ផងដែរក្នុងការរករោគវិនិច្ឆ័យ និងតាមដានការវិវត្តន៍អ្នកជំងឺក្នុងស្ថានភាព​សង្រ្គោះបន្ទាន់ ​និងផ្នែកប្រពោធនកម្ម ដោយការវាយតម្លៃលើស្ថានភាពបេះដូង សួត សរសៃឈាម​ជាដើម។

ឆ្លៀតក្នុងឱកាសនេះ ក្នុងនាមតំណាងឯកឧត្តមសាស្ត្រាចារ្យ ឈាង រ៉ា អគ្គនាយកមន្ទីរពេទ្យ ឯកឧត្តមសាស្ត្រាចារ្យ សូមថ្លែងនូវការអរគុណ ​ចំពោះ​សមាគមនិកាយសាសនា​ចក្រព្រះយេស៊ូគ្រីស្ទ​នៃពួកបរិសុទ្ធថ្ងៃចុងក្រោយ និងAlliance for International Medical ក្នុងការខិតខំប្រឹងប្រែងបង្កើតឱ្យ​មាន​កិច្ចសហប្រតិបត្តិការនេះ​លេចចេញជារូបរាងឡើង ​ដែលពិតជាមានគុណតម្លៃ និង​អត្ថប្រយោជន៍​ដ៏ធំធេង សមស្របនឹងបច្ចុប្បន្នភាពនៃការអភិវឌ្ឍន៍របស់​មន្ទីរពេទ្យក្រោម​ការ​យកចិត្ត​ទុកដាក់ខ្ពស់ពីឯកឧត្តមសាស្ត្រាចារ្យអគ្គនាយកមន្ទីរពេទ្យ ​ដើម្បីចូលរួមចំណែក​អភិវឌ្ឍន៍​វិស័យ​សុខាភិបាល ស្របតាមគោលនយោបាយ​របស់រាជរដ្ឋាភិបាលកម្ពុជា ក្រោមការ​ដឹកនាំដ៏ឈ្លាសវៃ​ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ​ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ​ដែលជានិច្ចកាលសម្តេច តែងតែ​យកចិត្ដទុកដាក់គិតគូរជួយ​ឧបត្ថម្ភ​គាំទ្រ និងផ្ដល់អាទិភាពដល់វិស័យសុខាភិបាល៕អត្ថបទ រដ្ឋា