ភ្នំពេញ៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជា​ប្រធាន​គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩​ ក្នុងក្របខណ្ឌទូទាំងប្រទេស (គ.វ.ក.១៩) នៅព្រឹកថ្ងៃទី៩​ ខែមករា ឆ្នាំ២០២៣នេះ បានដឹកនាំ​ក្រុមការងារ គ.វ.ក.១៩ ចុះពិនិត្យទីតាំង​ចាក់វ៉ាក់សាំង​កូវីដដូសជំរុញទី៦ ជូនមន្រ្តី ​និងថ្នាក់ដឹកនាំ នៅព្រឹទ្ធសភា ​និងមួយទីតាំងទៀត ស្ថិតនៅ​មន្ទីរពេទ្យបង្អែកដង្កោ ខណ្ឌដង្កោ រាជធានីភ្នំពេញ ​សម្រាប់ពលរដ្ឋអាចទៅទទួល​ការ​ចាក់​វ៉ាក់សាំង​កូវីដពីដូសមូលដ្ឋាន ​រហូតដល់ដូសជំរុញជាបន្តបន្ទាប់។

នៅក្នុងឱកាសខាងលើនោះ ​លោកជំទាវវេជ្ជបណ្ឌិត ឱ វណ្ណឌីន ​បានមានប្រសាសន៍ថា ដំណើរការ​ចាក់វ៉ាក់​សាំងដូសជំរុញជាបន្តបន្ទាប់នេះ គឺធ្វើឡើងស្របតាមអនុសាសន៍ណែនាំរបស់​សម្តេចតេជោ​ហ៊ុន ​សែននាយករដ្ឋមន្រ្តីកម្ពុជា ​ក្នុងគោលបំណងរក្សា និងបង្កើនភាពស៊ាំក្នុងសហគម៍ឱ្យរឹងមាំ​បាន​យូរអង្វែង​ទប់ទល់នឹងការឆ្លងរាលដាលជាសាលកជំងឺកូវីដ-១៩។

ក្រៅពីនេះ លោកជំទាវវេជ្ជបណ្ឌិតបានអំពាវនាវ ​ដល់ប្រជាពលរដ្ឋកុំរើសអើសការចាក់វ៉ាក់សាំង ព្រោះថា​ការចាក់វ៉ាក់សាំងកូវីដចម្រុះគ្នាជួយបង្កើនភាពស៊ាំក្នុងសារពាង្គកាយ បានខ្ពស់ជាង​ការវ៉ាក់សាំង​តែមួយមុខ ដូច្នេះសូមពលរដ្ឋមកទទួលការចាក់វ៉ាក់សាំងដួសជំរុញឲ្យបានគ្រប់គ្នា។

មន្រ្តីបំរើការងារនៅព្រឹទ្ធសភា​ និងប្រជាពលរដ្ឋទូទៅ ​បានលើកឡើងដែរថា ​ការចាក់វ៉ាក់សាំងកូវីដ-១៩ ដូសជំរុញទី៦ ​ពិតជាមានសារៈសំខាន់ណាស់ អាចជួយបង្ការខ្លួនពីជំងឺកូវីដ-១៩ និងមិនចង់ឱ្យ​ជំងឺកូវីដ-១៩ ​រីករាលដាលដូចមុននោះទេ។

ក្រៅពីនេះ ពួកគាត់ បានសំដែងការអរគុណដល់សម្តេចតេជោ ​ហ៊ុន សែន នាយករដ្ឋមន្រ្តីកម្ពុជា ដែល​បានស្វះស្វែងរកវ៉ាក់សាំងកូវីដចាក់ជូនពួកគាត់ដោយឥតគិតថ្លៃ។

បច្ចុប្បន្នការចាក់វ៉ាក់សាំងបង្កាជំងឺកូវីដ-19​ ត្រូវបានរាជរដ្ឋាភិបាល ​បន្តចាត់ទុកជាយុទ្ធសាស្រ្តដ៏​សំខាន់មួយ​ ដើម្បីធានានិរន្តរភាព សេដ្ឋកិច្ច និងការរស់នៅជាធម្មតា​ តាមបែបគន្លងថ្មី ជាមួយវត្តមាន​ជំងឺកូវីដ-19។សម្រាប់ប្រជាពលរដ្ឋមិនទាន់ចាក់វ៉ាក់សាំងកូវីដពីដូសមូលដ្ឋានរហូតដល់ ដូសជំរុញ គឺអាចទៅ​ទទួល​ការចាក់វ៉ាក់សាំងបាន​ នៅគ្រប់ទីតាំង​សុខាភិបាលសាធារណៈ ​ឫទីតាំងចល័តរៀបចំដោយ​ក្រសួង​សុខាភិបាល សហការ​ជាមួយដៃគូរពាក់ព័ន្ធផ្សេងៗ៕ អត្ថបទ៖ទូច សោភ័ណ