​ប្រេស៊ីល៖ អ្នកគាំទ្រ​អតីត​ប្រធានាធិបតី​ស្តាំនិយម​ប្រេ​ស៊ី​ល​លោក Jair Bolsonaro កាលពី​ថ្ងៃអាទិត្យ​បាន​សម្រុកចូល​តុលាការ​កំពូល​របស់​ប្រទេស និង​អគារ​រដ្ឋសភា ហើយ​ឡោមព័ទ្ធ​វិមាន​ប្រធានាធិបតី​ក្នុង​ទីក្រុង Brasilia។ ប្រធានាធិ​បតី​សហរដ្ឋអាមេរិក​លោក JOE BIDEN និយាយថា លោក​ថ្កោលទោស​ចំពោះ​ការរំលោភបំពាន​លើ​លទ្ធិប្រជាធិបតេយ្យ និង​លើ​ការផ្ទេរអំណាច​ដោយ​សន្តិ​វិធី​នៅក្នុង​ប្រទេស​ប្រេ​ស៊ី​ល​។

ស្ថាប័ន​ប្រជាធិបតេយ្យ​របស់​ប្រទេស​ប្រេ​ស៊ី​ល​មានការ​គាំទ្រ​យ៉ាង​ពេញលេញ​របស់​យើង ហើយ​ឆន្ទៈ​របស់​ប្រជាជន​ប្រេ​ស៊ី​ល​មិន​ត្រូវបាន​បំផ្លាញ​ឡើយ​។ រដ្ឋមន្ត្រីការបរទេស​សហរដ្ឋអាមេរិក​លោក ANTONY BLINKEN និយាយថា យើង​ថ្កោលទោស​ការវាយប្រហារ​លើ​វិមាន​ប្រធានាធិបតី​ប្រេ​ស៊ី​ល សភា និង​តុលាការ​កំពូល​។ ការប្រើ​អំពើហិង្សា​ដើម្បី​វាយប្រហារ​ស្ថាប័ន​ប្រជាធិបតេយ្យ​គឺ​ពុំ​អាច​ទទួលយក​បានឡើយ យើង​ចូលរួម​ជាមួយ​លោក​ Lula ក្នុង​ការជំរុញឱ្យ​បញ្ចប់​សកម្មភាព​ទាំងនេះ​ជាបន្ទាន់​។ សហរដ្ឋអាមេរិក​ថ្កោលទោស​រាល់​កិច្ចខិតខំ​ប្រឹងប្រែង​ ដើម្បី​បំផ្លាញ​លទ្ធិប្រជាធិបតេយ្យ​នៅ​ប្រេ​ស៊ី​ល​។ លទ្ធិប្រជាធិបតេយ្យ​រប​ស់​ប្រទេស​ប្រេ​ស៊ី​ល​ នឹងមិន​រង្គោះរង្គើ​ដោយ​អំពើហិង្សា​នោះទេ​។ អគ្គលេខាធិការអង្គការសហប្រជាជាតិ លោក ANTONIO GUTERRES និយាយថា លោក​ថ្កោលទោស​ចំពោះ​ការវាយប្រហារ​នេះ​ទៅលើ​ស្ថាប័ន​ប្រជាធិបតេយ្យ​របស់​ប្រទេស​ប្រេ​ស៊ី​ល​។

ឆន្ទៈ​របស់​ប្រជាជន​ប្រេ​ស៊ី​ល និង​ស្ថាប័ន​របស់​ប្រទេស​ត្រូវតែ​គោរព​។ លោក JOSEP BORRELL ប្រធាន​គោលនយោបាយ​ការបរទេស​របស់​សហ​ភាព​អឺរ៉ុប​និយាយថា លោក​មានការ​រន្ធត់ចិត្ត​ចំពោះ​អំពើ​ហិ​ង្សា និង​ការចូល​កាន់កាប់​ដោយ​ខុសច្បាប់​នូវ​ទីស្នាក់ការ​រដ្ឋាភិបាល​ទីក្រុង Brasilia ដោយ​ក្រុម​ជ្រុលនិយម​ហិង្សា​។ អ្នកគាំទ្រ​អតីត​ប្រធានា​ធិ​បតី​ប្រេ​ស៊ី​លលោក Jair Bolsonaro បាន​ទម្លាយ​ការបិទផ្លូវ​ដែល​បង្កើតឡើង​ដោយ​កងកម្លាំង​សន្តិសុខ និង​បាន​សម្រុកចូល​ក្រសួង​នានា និង​អគារ​សភា​ក្នុង​ទីក្រុង Brasilia កាលពី​ថ្ងៃអាទិត្យ​ម្សិលមិញ​។ ក្រុមបាតុករ​ច្រើន​នាក់​បាន​ជំទាស់​នឹង​លទ្ធផល​នៃ​ការបោះឆ្នោត​កាលពី​ថ្ងៃទី៣០ ខែតុលា ដែល​អ្នក​ឆ្វេងនិយម​លោក Luiz Inacio Lula da Silva បានទទួល​ជ័យជំនះ​លើ​លោក Bolsonaro។ អតីត​ប្រធានាធិបតី​រូបនេះ​បាន​ចោទសួរ​ម្តង​ហើយ​ម្តងទៀត ដោយ​គ្មាន​ភស្តុតាង ភាពជឿជាក់​នៃ​ប្រព័ន្ធ​បោះឆ្នោត​តាម​ប្រព័ន្ធ​អេឡិចត្រូនិក​របស់​ប្រទេស ហើយ​អ្នកគាំទ្រ​ភាគច្រើន​របស់លោក​​បាន​ជឿ​លើ​លោក៕

អត្ថបទ៖ ប៊ុនថន