កណ្ដាល៖ បណ្តាមូលដ្ឋានសុខាភិបាលសាធារណៈនៅទូទាំងខេត្តកណ្តាល នៅថ្ងៃទី៩ ខែមករា ឆ្នាំ២០២២៣នេះ បានចាប់ផ្តើមបើកទទួលការចាក់វ៉ាក់សាំងការពារកូវីដ១៩ ដូសទី៦ សម្រាប់អ្នក​បំរើការងាររដ្ឋ និងឯកជនជួរមុខ និងចាប់ផ្តើមបើកការចាក់ដូសទី៣ សម្រាប់កុមារវ័យ​ពី៣ឆ្នាំទៅ៥ឆ្នាំ និងដូសទី៤ សម្រាប់ក្មេងវវ័យពី៥ឆ្នាំដល់១២ឆ្នាំ។

វេជ្ជបណ្ឌិត លី មករា ប្រធានមន្ទីរពេទ្យជ័យជំនះ ថ្លែងថា ដូចការគ្រោង ទុកនៅថ្ងៃចន្ទនេះ មន្ទីរពេទ្យ​ជ័យជំនះ​ក៏ដូចមូលដ្ឋានសុខាភិបាលសាធារណៈនានានៅទូទាំងខេត្ត បានចាប់ផ្តើម​បើក​ការចាក់វ៉ាក់​សាំងការពារកូវីដ១៩ ដូសទី៦បន្ថែមតាមការណែនាំរបស់រដ្ឋបាលខេត្តកណ្តាល ហើយការចាក់នោះ សំគាល់ឃើញថា ពលរដ្ឋដែលបានចាក់ដូសទី៥មានរយៈពេលពី៣ខែ ​ទៅ៦ខែរួចហើយ គឺបាននាំគ្នាចាក់ដូសទី៦ជាហូរហែរឥតដាច់។

ពលរដ្ឋបានមកទទួលការចាក់វ៉ាក់សាំង លើកឡើងថា ការមកចាក់វ៉ាក់សាំងដូសជម្រុញ ជាពិសេស​ការចាក់​ដូសទី៦នេះ ធ្វើឡើងដើម្បីបង្កើនភាពបន្សាំខ្លួន​ជាមួយមេរោគកូវីដ ​នៅក្នុងសហគមន៍ កុំឲ្យឆ្លងកើតឈឺធ្ងន់ធ្ងរ​ កុំឲ្យឆ្លងរាតត្បាតក្នុងសហគមន៍ ។

សូមបញ្ជាក់ថា ការបើកយុទ្ធនាការចាក់វ៉ាក់សាំងការពារកូវីដ១៩ដូសទី៦ បានធ្វើឡើង​នៅក្នុង​កំឡុងពេលក្រុមពេទ្យទូទាំងខេត្តកណ្តាលបានចាក់វ៉ាក់សាំងដូសទី៥ បានប្រមាណជិត ៦៣ ០០០នាក់​ ដែលស្មើនឹងប្រមាណ៦% ​នៃចំនួនគោលដៅចាក់សរុបជាង ​១លាន ៤ម៉ឺននាក់ នៅទូទាំងខេត្ត៕ អត្ថបទ ស៊ុម សុខជា