ព្រះសីហនុ៖ មន្ត្រីជំនាញកំពុងខិតខំជួសជុលទំនប់អាងស្តុកទឹកសាប ក្បាលឆាយ ដែលជាប្រភពផលិតទឹកស្អាត សម្រាប់បម្រើការប្រើប្រាស់របស់ប្រជាពលរដ្ឋក្នុងក្រុងព្រះសីហនុ ឱ្យបានពេញលេញល្អប្រសើរវិញ ក្រោយការបែកបាក់ ​កាលពីយប់ថ្ងៃទី៧ ខែមករានេះ ។

នៅថ្ងៃទី៩ ខែមករានេះ ឯកឧត្តម ទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យា សាស្ដ្រ បច្ចេកវិទ្យា និងនវានុវត្ដន៍ បានដឹកនាំមន្ត្រីជំនាញចុះពិនិត្យការជួសជុលទំនប់អាងស្ដុកទឹកសាប ក្រាលឆាយ បានបញ្ជាក់ថា ចាប់តាំងពីពេលកើតហេតុរហូតមកដល់ពេលនេះ​ អ្នកជំនាញ ​បាននិង​កំពុង​ប្រឹងប្រែងជួសជុលទំនប់នេះ​ ដែលរំពឹងថា នឹងបានរួចរាល់នៅក្នុងពេលឆាប់ៗនេះហើយ ។

ក្នុងពេលចុះពិនិត្យការចាក់ដីបំពេញទំនប់ ​ដែលបានប្រេះបាក់ កាលពីយប់ថ្ងៃទី៧ ​ខែមករា នេះ ឯកឧត្តម គួច ចំរើន​ អភិបាលខេត្តព្រះសីហនុ បានជំរុញមន្ត្រីជំនាញឱ្យពន្លឿនការជួសជុល ទាំង​ផ្នែកអគ្គិសនី និងទឹក ឲ្យបានទាន់ពេលវេលា ដើម្បីបន្តការ​ផ្គត់ផ្គង់​ទឹកស្អាត​នៅក្នុងក្រុង​ខេត្តព្រះសីហនុ ឱ្យបានគ្រប់គ្រាន់ឡើងវិញ ។

ឯកឧត្ដម បានអំពាវនាវដល់ប្រជាពលរដ្ឋឱ្យប្រើប្រាស់ទឹកដោយការសន្សំសំចៃ ​ក្នុងអំឡុងពេលនេះ ៕អត្ថបទ៖ គង់ ប៊ុនថា