​ភ្នំពេញ​៖ ឯកឧត្តម ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម និងឯកឧត្តម Pablo Kang ឯកអគ្គរាជទូត​អូស្ត្រាលី​ប្រចាំ​ព្រះរាជាណាចក្រ​កម្ពុជា បានរួម​គ្នា​ប្រកាស​ដាក់ឱ្យ​ប្រើប្រាស់​នូវឯ​ក​សារ​ស្រាវជ្រាវ​អំពី​ព័ត៌មាន​ទីផ្សារ សំខាន់ៗ​ចំនួន​២ រួមមាន ទី​១. កសិផល​កម្ពុជា​សម្រាប់​នាំ​ចេញទៅ​ទីផ្សារ​សហភាព​អឺរ៉ុប និង​អា​សិប និង ទី​២. កម្ពុជា និង​ការបើក​ទីផ្សារ​ពិភពលោក​តាមរយៈ​កិច្ចព្រមព្រៀង​ពាណិជ្ជកម្ម​សេរី ព្រមទាំង​បានប្រកាស​ពី​គម្រោង​អភិវឌ្ឍន៍​ថ្នាល​ឌីជីថល​តែមួយ (Single Digital Platform) ដែល​ក្នុងនោះ​រួមមាន គេហទំព័រ​កិច្ចព្រមព្រៀង​ពាណិជ្ជកម្ម​សេរី (FTA Portal), ប្រព័ន្ធគ្រប់គ្រង​ស្វ័យ​បញ្ជាក់​ដើមកំណើត​ទំនិញ (Self-Certification) និង​ប្រព័ន្ធ​ផ្ទៀងផ្ទាត់​ដើមកំណើត​ទំនិញ​ជា​អន្តរជាតិ (Rule of Origin International Verification System) ដើម្បី​ជា​ជំនួយ​ដល់​ធុរជន​ក្នុង​ការទាញយក​អត្ថប្រយោជន៍​ជា​អតិបរមា ពី​កិច្ចព្រមព្រៀង​ពាណិជ្ជកម្ម​សេរី​ទាំងអស់​ដែល​កម្ពុជា​ជា​ប្រទេស​ហត្ថលេខី​។​

​ក្នុង​ពិធី​ដាក់​សម្ពោធ​នេះ ក៏មាន​ការអញ្ជើញ​ចូលរួម​ផងដែរ​ពី លោក David Ray នាយក CAP RED Facility, ប្រតិភូ​ស្ថានទូត​អូស្ត្រាលី​ប្រចាំ​នៅ​ទីក្រុង​ភ្នំពេញ​, មន្ត្រីជាន់ខ្ពស់​ក្រសួងពាណិជ្ជកម្ម​, តំណាង​ក្រសួង​-​ស្ថាប័ន​ពាក់ព័ន្ធ និង​វិស័យ​ឯកជន ជាច្រើនរូប នា​រសៀល​ថ្ងៃទី​៩ ខែមករា ឆ្នាំ​២០២៣ នៅ​ទីស្តីការ​ក្រសួងពាណិជ្ជកម្ម​។​

​ឯកឧត្តម​រដ្ឋមន្ត្រី បាន​ថ្លែងថា សៀវភៅ​កសិផល​កម្ពុជា​សម្រាប់​នាំ​ចេញទៅ​ទីផ្សារ​សហភាព​អឺរ៉ុប និង​អា​សិប ផ្តល់នូវ​ការយល់ដឹង​សំខាន់ៗ​អំពី​តម្រូវការ​ទីផ្សារ​, តម្រូវការ​របស់​អ្នកប្រើប្រាស់​, វិធានការ​អនាម័យ​និង​ភូតគាម​អនាម័យ និង​របាំង​ពាណិជ្ជកម្ម​មិនមែន​ពន្ធគយ​ផ្សេងទៀត​, ការប្រើប្រាស់​ផលិតផល​, ដៃគូ​ប្រកួតប្រជែង​សំខាន់ៗ និង​ឱកាស​សក្តានុពល​។ បន្ថែម​ពីនេះ ដំណាំ និង​កសិផល​ដែល​បាន​បញ្ចូល​ក្នុង​សៀវភៅ​ស្រាវជ្រាវ​នេះ រួមមាន​៖ ស្វាយ​ស្រស់ ស្វាយចន្ទី ម្ទេស ដំឡូងជ្វា មៀន​ប៉ៃលិន ស្ករត្នោត ចេក បឺ​រ ល្ង និង​ផ្លែឈើ​កែច្នៃ​។ ព័ត៌មាន​ទាំងនេះ គឺមាន​សក្ដានុពល​ក្នុងការ​បង្កើត​ផលប្រយោជន៍​រយៈពេល​វែង​សម្រាប់​កសិកម្ម​កម្ពុជា​។​

​ចំពោះ សៀវភៅ​ព័ត៌មាន​ស្តីពី កម្ពុជា និង​ការបើក​ទីផ្សារ​ពិភពលោក​តាមរយៈ​កិច្ចព្រមព្រៀង​ពាណិជ្ជកម្ម​សេរី ឯកឧត្តម​រដ្ឋមន្ត្រី​បន្តថា វា​នឹង​ផ្តល់ព័ត៌មាន​បច្ចុប្បន្នភាព​ចុងក្រោយ និង​ងាយស្រួល​យល់ អំពី​កិច្ចព្រមព្រៀង​ពាណិជ្ជកម្ម​សេរី​ទ្វេភាគី និង​តំបន់ ដែល​កម្ពុជា​ជា​ប្រទេស​ហត្ថលេខី មាន​ជាអាទិ៍​៖ កិច្ចព្រមព្រៀង​អា​សិប (Regional Comprehensive Economic Partnership – RCEP), កិច្ចព្រមព្រៀង​ពាណិជ្ជកម្ម​សេរី កម្ពុជា​-​ចិន (Cambodia-People’s Republic of China FTA) និង​កិច្ចព្រមព្រៀង​ពាណិជ្ជកម្ម​សេរី កម្ពុជា​-​កូរ៉េ (Cambodia-Republic of Korea FTA) ជាដើម​។ លើសពីនេះ សៀវភៅ​ព័ត៌មាន​នេះ​នឹង​ជួយ​ដល់​សហគ្រាស​ក​សិ​-​ម្ហូបអាហារ ផលិតករ អ្នក​នាំចេញ សមាគម​ធុរកិច្ច និង​អ្នកពាក់ព័ន្ធ​ដទៃទៀត ដើម្បី​ចាប់យក​នូវ​កាលានុវត្តភាព​ពី​ការធ្វើ​ពិពិធ​កម្ម​ទីផ្សារ និង​ទទួលបាន​អត្ថប្រយោជន៍​នានា​ក្រោម​កិច្ចព្រមព្រៀង​ពាណិជ្ជកម្ម​សេរី​ទាំងនេះ​។​

​ដោយឡែក ថ្នាល​ឌីជីថល​តែមួយ​វិញ ឯកឧត្តម​រដ្ឋមន្ត្រី​បន្ថែមថា គ្រោង​អភិវឌ្ឍ​ឡើង​តាម​លំ​អាន​របស់​គេហទំព័រ​កិច្ចព្រមព្រៀង​ពាណិជ្ជកម្ម​សេរី​របស់​អូស្ត្រាលី​ផ្ទាល់ ហើយក៏​នឹង​ក្លាយជា​កន្លែង​ផ្ទុក​ព័ត៌មាន​ពាណិជ្ជកម្ម​ដ៏​ទូលំទូលាយ​សម្រាប់​អ្នក​នាំចេញ និង​អ្នក​នាំចូល ក្នុងការ​ស្វែងរក និង​ទាញ​អត្ថប្រយោជន៍​ពី​កិច្ចព្រមព្រៀង​ពាណិជ្ជកម្ម​សេរី​ទាំងអស់​របស់​កម្ពុជា​។ ម្យ៉ាងទៀត​ថ្នាល​ឌីជីថល​នេះ ក៏​នឹង​ផ្តល់ព័ត៌មាន​ផងដែរ​ពី​វិធាន​ដើមកំណើត​ទំនិញ នីតិវិធី​ក្នុងការ​ចុះឈ្មោះ​ជា​អ្នក​នាំចេញ​ដែលមាន​ការទទួលស្គាល់ និង​នីតិវិធី​ដើម្បី​ទទួលបាន​វិញ្ញាបនបត្រ​បញ្ជាក់​ដើមកំណើត​ទំនិញ​។​

​ឯកឧត្តម​រដ្ឋមន្ត្រី បញ្ជាក់ថា សៀវភៅ​ទាំងពីរ​ខាងលើ​ត្រូវបាន​រៀបរៀងឡើង​ដោយមាន​ការគាំទ្រ​ពី​កម្មវិធី​ខ្សែ​ច្រវាក់​តម្លៃ​កសិកម្ម​កម្ពុជា​-​អូស្ត្រាលី (CAVAC) ហើយ​ថ្នាល​ឌីជីថល​តែមួយ ត្រូវបាន​គាំទ្រ​ដោយ​កម្មវិធី​អភិវឌ្ឍន៍​សេដ្ឋកិច្ច​ថ្មី​មួយទៀត​របស់​ប្រទេស​អូស្ត្រាលី ដែលមាន​ឈ្មោះថា​កម្មវិធី​ភាពជា​ដៃគូ​កម្ពុជា​-​អូស្ត្រាលី សម្រាប់​ការអភិវឌ្ឍ​សេដ្ឋកិច្ច​ប្រកបដោយ​ភាព​ធន់ (CAP RED)​។​

​ឯកឧត្តម​រដ្ឋមន្ត្រី លើកឡើង​ទៀតថា ក្រសួងពាណិជ្ជកម្ម​វាយតម្លៃ​ខ្ពស់​ចំពោះ​ការគាំទ្រ​ពី​រដ្ឋាភិបាល​អូស្ត្រាលី និង​កម្មវិធី CAP RED សម្រាប់​ការ​គម្រោង​អភិវឌ្ឍន៍​ថ្នាល​ឌីជីថល​តែមួយ ព្រោះ​គម្រោង​នេះ​នឹង​ជួយ​កម្ពុជា​ក្នុងការ​សម្រេចបាន​យ៉ាង​ពេញលេញ​នូវ​ការសន្យា​របស់ខ្លួន​ក្រោម​កិច្ចព្រមព្រៀង​ពាណិជ្ជកម្ម​សេរី​មួយចំនួន​ដូចជា កិច្ចព្រមព្រៀង ATIGA, កិច្ចព្រមព្រៀង​ពាណិជ្ជកម្ម​សេរី​កម្ពុជា​-​កូរ៉េ​, កិច្ចព្រមព្រៀង​ពាណិជ្ជកម្ម​សេរី​អាស៊ាន អូស្ត្រាលី នូ​វែ​ល​ហ្សេ​ឡង់ និង​កិច្ចព្រមព្រៀង RCEP​៕​