កំពង់ឆ្នាំង៖ នៅថ្ងៃទី១០ ខែមករា ឆ្នាំ២០២៣នេះ កម្លាំងនគរបាលជាតិ នៃ​ស្នងការ​នគរបាល​ខេត្តកំពង់ឆ្នាំង ប្រមាណជា​ង​ ៥០០នាក់ បានចូលរួមចាក់វ៉ាក់សាំងកូវីដ-១៩ ដូសទី៦ តាម​ការ​អំពាវនាវ​របស់​សម្តេចតេជោ ហ៊ុន សែន នាយករដ្ឋមន្ត្រី នៅស្នងការដ្ឋាននគរបាលខេត្តកំពង់ឆ្នាំង ដើម្បី​ការពារសុខភាពពីជំងឺកូវីដ-១៩។ កងកម្លាំងដែលបានចូលរួមទាំងអស់ ក៏បាន​ថ្លែង​អំណរគុណ​​ដល់​ប្រមុខ​រាជ​រដ្ឋាភិបាល​ដែល​បាន​យក​ចិត្ត​ទុកដាក់ដល់សុខមាលភាពប្រជាពលរដ្ឋ មន្ត្រីរាជការ និងកងកម្លាំងប្រដាប់អាវុធផងដែរ។

តំណាងកងកម្លាំងនគរបាលជាតិបានអោយដឹងថា តាំង​ពី​ចាប់​ផ្តើម​ នៃ​ការ​កើត​មាន​វីរុស​កូវីដ-១៩ នៅ​ក្នុង​ប្រទេសចិនរួចមក សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាន​ខិត​ខំស្វះស្វែងរកវ៉ាក់សាំង ទាំងការទិញ ទាំងជំនួយ យកមកចាក់ជូនកងកម្លាំងប្រដាប់អាវុធ ប្រជា​ពលរដ្ឋ និងមន្ត្រីរាជការទាំងអស់ អោយមានភាពស៊ាំនៅក្នុងខ្លួន និង​តាម​សហគមន៍​ទូទាំង​ប្រទេស​ផង​ដែរ។ ក្រោយពីប្រជាពលរដ្ឋ មន្ត្រីរាជការ កង​កម្លាំង​ប្រដាប់​អាវុធ​ទាំង​អស់​ទទួល​បាន​វ៉ាក់សាំង​ជា​បន្តបន្ទាប់ហើយនោះ ទើបប្រជាពលរដ្ឋ មន្ត្រីរាជការ កង​កម្លាំង​មាន​ភាព​ស៊ាំ​នៅ​ក្នុង​ខ្លួន ហើយជំងឺកូវីដ-​១៩ មិនអាចយាយី ឬធ្វើទុកដល់អ្នកកើតជំងឺកូវីដ-១៩ បាន​នោះឡើយ រហូត​ដល់​ដំណើរ​ការ​បើកប្រទេស និងប្រជាពលរដ្ឋមានសេដ្ឋកិច្ចល្អប្រសើរឡើងវិញ។ ក្នុង​នាម​កង​កម្លាំង​ទាំងអស់ សូមគោរពអរគុណដល់ការគិតគូរយ៉ាងល្អិតល្អន់ និងកា​រ​ឈ្លៀស​វៃ​របស់​សម្តេច​តេជោ ដែលបានដឹកនាំប្រទេស និងប្រជាជន មានក្តីសុខសាន្ត រីកចម្រើន ក្នុងម្លប់​សុខ​សន្តិភាព​ពិត​ប្រាកដ​។

លោកឧត្តមសេនីយ៍ទោ ខូវ លី ស្នងការនៃស្នងការដ្ឋាននគរបាលខេត្តកំពង់ឆ្នាំង បាន​អោយ​ដឹង​ថា តប​តាម​ការអំពាវនាវរបស់សម្តេចតេជោ ហ៊ុន សែន នាយករដ្ឋមន្ត្រី កម្លាំង​នគរបាលជាតិ​ នៃ​ស្នង​ការដ្ឋាន​នគរបាលខេត្តកំពង់ឆ្នាំងទាំងអស់ ត្រូវតែបង្កើនយកការទុកដាក់ខ្ពស់ លើការផ្សព្វផ្សាយ អប់រំ​នូវ​សេចក្តីណែនាំ និងវិធានការរបស់រាជរដ្ឋាភិបាល និងក្រសួងសុខាភិបាល ។ ត្រូវ​គោរព​ឲ្យ​បាន​ខ្ជាប់​ខ្ជួន​វិធានការណ៍៣កុំ ៣ការពារ ព្រមទាំងចូលរួមប្រយុទ្ធប្រឆាំងបង្កាទប់ស្កាត់ជំងឺកូវី-១៩ កុំឲ្យ​មាន​ការ​ឆ្លង​ក្នុង​សហគមន៍។ គ្រប់កងកម្លាំងនគរបាលជាតិទាំងអស់នៅខេត្តកំពង់ឆ្នាំង ត្រូវ​បន្ត​ចាក់​វ៉ាក់សាំង​ឲ្យ​បាន​គ្រប់ៗគ្នា និងឲ្យបានចប់រួចរាល់ក្នុង​យុទ្ធនាការលើកនេះ ។ សូម​ឲ្យ​បង​ប្អូន​កង​កម្លាំងទាំងអស់ ត្រូវបន្តការពាក់ម៉ាស់ឲ្យបានត្រឹមត្រូវក្នុងទីបិទជិត ឬ​ទី​កន្លែង​ដែល​មាន​ការ​សង្ស័យ​ និងត្រូវធ្វើអនាម័យឲ្យបានជាប្រចាំ ដោយសម្អាតដៃដោយលាងទឹកនឹងសាប៊ូ អាល់កុល ឬ​ជែល ជាដើម៕ អត្ថបទ៖ ហុង វាស្នា