ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ គ្រោង​នឹងកោះហៅ​អភិបាលរាជធានី-ខេត្តទាំងអស់ម្នាក់ម្ដងៗ ដើម្បីមករាយការណ៍ជូន សម្ដេចអំពីបទល្មើសនីមួយៗ ក្នុងមូលដ្ឋានរបស់ខ្លួន ដោយគ្មានការលាក់បាំងនោះឡើយ។

ក្នុងឱកាសអញ្ជើញបើកវេទិកា ស្ដីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល នា​ថ្ងៃទី១០ ខែមករា ឆ្នាំ២០២៣ សម្ដេច ស ខេង បានលើកឡើងថា ​ពេលនេះរាជរដ្ឋាភិបាល កំពុងតែ​យក​ចិត្តទុកដាក់ក្នុងការរក្សាសន្តិសុខសណ្តាប់ធ្នាប់សាធារណៈ និងការ​ប្រយុទ្ធប្រឆាំងនឹង​បទល្មើស​ផ្សេងទៀត ក្នុងនោះ អំពើជួញដូរមនុស្ស គ្រប់ទម្រង់​ ត្រូវបន្តធ្វើការងារដោយ ​មិន​ត្រូវទំលាក់​ដៃ​នោះទេ។

ប្រមុខក្រសួងមហាផ្ទៃរូបនេះ បានបញ្ជាក់ថា​ បទល្មើសជួញដូរមនុស្ស ជាបទល្មើសមួយកើតឡើង​ដោយ​មាន​ភាព​ស្មុគស្មាញ​ណាស់ ដូចជាការរំលោភ​សិទ្ធិមនុស្ស ​ហើយក៏មានបទល្មើសផ្សេងទៀត ដូចជា ចោរលួច ចោរប្លន់ជាដើម។

សម្ដេចក្រឡាហោម លើកឡើងទៀតថា កាលពេលមុនក្នុងមួយថ្ងៃជាមធ្យមទទួលបាន​បណ្តឹងជាង​១០ ហើយមកដល់ពេលនេះ​ក្នុងមួយថ្ងៃមាន១បណ្តឹង ខណៈថ្ងៃខ្លះក៏គ្មានបណ្តឹងទាល់តែ​សោះផងដែរ។ សម្តេច បញ្ជាក់ថា «នេះជាលទ្ធផលដែលយើងបានដោះស្រាយ ក្នុងការជួយ​ជនរងគ្រោះបានជាបន្ដបន្ទាប់​ ដែលមានបណ្តឹងសុំឱ្យជួយ»។

ជាមួយគ្នានោះដែរ សម្ដេចក្រឡាហោម ស ខេង ក៏បានណែនាំ​អភិបាលរាជធានី-ខេត្ត ត្រូវតែ​ធ្វើការដោះស្រាយចំពោះពាក្យបណ្តឹង របស់ជនរងគ្រោះឱ្យបានអស់ ​និងច្បាស់លាស់ ដោយមិន​ត្រូវទុកចោល ​ឬធ្វើលំៗស្រាលៗ និងផ្សំគំនិតនោះទេ។

សម្តេច បានបន្ថែមទៀតថា បើសិនអភិបាលរាជធានី-ខេត្ត ឬសមត្ថកិច្ច ​មានការបិទបាំងបទល្មើស នៅ​ពេលទទួលបានបណ្តឹង ​ហើយមិនបានដោះស្រាយនោះ ​នៅថ្ងៃណាមួយ នឹងរកឃើញជាក់​ជា​មិនខាននោះឡើយ។

សម្ដេច បានបញ្ជាក់ទៀតថា «បើបិទបាំងមានន័យថា​ យើងគាំទ្រនូវអំពើទុច្ចរិត ក្នុងនោះពេលយើង​ចុះទៅ គឺយើងហ្នឹងឃើញនូវប្រភេទបទល្មើសព្រមគ្នា ​បើមិនមួយ ក៏ពីរ ឬក៏បីដែរ។ បើនៅកន្លែងមួយបើកការរកស៊ីអនឡាញ សួរថា​មានច្បាប់ទេ? បើអត់មាន នេះជាបទល្មើសមួយ ហើយមួយទៀត​ អ្នកធ្វើការនៅអនឡាញមានវីសារចូលមកចូលកម្ពុជាឬទេ? បើអត់មាន​គឺបទល្មើសមួយទៀត។ តែបើមានវីសារទេសចរណ៍ ​តែមកធ្វើការនោះ ​ក៏ជាកំហុសមួយដែរ។ បើយើងធ្វើការលំៗ ស្រាលៗ ឱ្យតែរួចពីដៃ​ នៅថ្ងៃណាមួយ ខ្ញុំនឹងធ្វើគណនេយ្យភាព ត្រួតពិនិត្យ ហៅចៅហ្វាយខេត្តមករាយការណ៍​ តាមករណីនីមួយៗ។ បើមន្ត្រីនគបាលធ្វើការមិនច្បាស់លាស់ គឺមិនស្មោះត្រង់ និងវិជ្ជាជីវៈ»។

យ៉ាងណាក៏ដោយសម្ដេចក្រឡាហោមឧបនាយករដ្ឋមន្ដ្រី បានឲ្យដឹងផងដែរថា រហូតមក​ដល់ពេលនេះ ក្រសួងមហាផ្ទៃ បានទទួលពាក្យបណ្តឹង​ ៧០០ពាក្យបណ្តឹង ហើយ​ពាក្យ​បណ្តឹងមកពីខេត្តណាចំនួនប៉ុន្មាន​ គឺមាននៅក្នុងបញ្ជីអស់ហើយ ដូច្នេះមិនអាច​លាក់បាំង​បានឡើយ៕អត្ថបទ៖ បាន ចក់