ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ បានថ្លែងថា រយៈពេលកន្លងមកនេះរាជរដ្ឋាភិបាលកម្ពុជា ក៏ដូចជាក្រសួងមហាផ្ទៃ បានធ្វើកិច្ចសហប្រតិបត្តិការ​ល្អ​ជាមួយបណ្ដា អង្គការសង្គមស៊ីវិលទាំងអស់ ​ដោយមានដំណើការល្អ ​ពីព្រោះក្រសួងមហាផ្ទៃ​តែងតែ​ធ្វើកិច្ចប្រជុំជាមួយអង្គការសង្គមស៊ីវិល ​បូកសរុប និងចែក​រំលែក​បទ​ពិសោធន៍ លើ​លទ្ធផល​ការងារជាមួយគ្នាជាប្រចាំ។

សម្ដេចក្រឡាហោម ស ខេង បញ្ជាក់បែបនេះ ក្នុងពេលធ្វើជាអធិបតី​បើកវេទិការ ស្ដីពីភាពជា​ដៃគូ​រវាងរាជរដ្ឋាភិបាល​ និងអង្គការសង្គមស៊ីវិលជាង ៣០០​ អង្គការ នាព្រឹកថ្ងៃទី១០ ខែមករា ឆ្នាំ២០២៣នេះ ​នៅសណ្ឋាគារសុខាភ្នំពេញ។

ឯកឧត្ដម នេត្រ ភក្ត្រា រដ្ឋលេខាធិការ ​និងជាអ្នកនាំពាក្យ ក្រសួងបរិស្ថាន ​មានប្រសាសន៍​ក្នុង​វេទិការ​នេះដែរថា ក្នុងក្របខណ្ឌនៃក្រសួង​បរិស្ថាន​ គឺមានកិច្ចសហប្រតិបត្តិការជាមួយដៃគូអភិវឌ្ឍន៍​ ជាមួយនឹងអង្គការជាតិ ​និងអង្គការអន្តរជាតិ ពាក់ព័ន្ធជាមួយនឹងកិច្ចការការពារ និង​អភិរក្សធនធានធម្មជាតិ ​កិច្ចគាំពារបរិស្ថាន ការអភិរក្សជីវៈចម្រុះ និង​ការអភិវឌ្ឍប្រកបដោយចីរភាព។

ឯកឧត្ដមឧត្តមសេនីយ៍ទោ ជួន ណារិន្ទ ស្នងការនៃស្នងការដ្ឋាននគរបាលខេត្តព្រះសីហនុ បាន​ថ្លែងឱ្យដឹងតាមរយៈវេទិការនេះ​ ដែរថា ​សម្រាប់ខេត្តព្រះសីហនុ ដូចយើងទាំង​អស់គ្នា​បានដឹង​ហើយថា ជាខេត្តប៉ូលសេដ្ឋកិច្ចពិសេស​ និងជាខេត្តដែលកំពុងមានការអភិវឌ្ឍលើគ្រប់វិស័យ ដូច្នេះកិច្ច​សហប្រតិបត្តិការល្អរវាងអាជ្ញាធរ ​ជាមួយប្រជាពលរដ្ឋ និងអង្គការសង្គមស៊ីវិល​នានា​គឺពិតជាមានសារសំខាន់ណាស់ ​ដើម្បីឱ្យការអភិវឌ្ឍអាចដំណើការប្រកបដោយជោគជ័យគ្រប់កម្រិត និង​គ្រប់ភាគីពាក់ព័ន្ធ៕ អត្ថបទ វ៉ន ដារ៉ា