ភ្នំពេញ៖ អ្នកជំនាញសេដ្ឋកិច្ច យល់ឃើញថា កម្ពុជានឹងអាចស្រូបយកលំហូរនៃវិនិយោគិនចិន បន្ទាប់ពីប្រទេសចិនបានបើកប្រទេសទូលាយឡើងវិញ ​ស្របពេលកម្ពុជាមានបរិយាកាសល្អ ផ្តល់ភាព​អំណាយផលដល់ការវិនិយោគ ​ជាពិសេសការទប់ស្កាត់ជំងឺកូវីដ ១៩ នៅក្នុងស្រុកបានល្អប្រសើរ។

លោកបណ្ឌិត ហុង វណ្ណៈ ជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិនៃរាជបណ្ឌិត​សភា​កម្ពុជា លើកឡើង នៅថ្ងៃទី ១០ ខែ មករា ឆ្នាំ ២០២៣ នេះថា នៅមុនការរីករាលដាល​នៃជំងឺ​កូវីដ ១៩ កម្ពុជាទទួលបានបរិយាកាសវិនិយោគយ៉ាងល្អប្រសើរ ​ក្នុងនោះការវិនិយោគធំៗភាគច្រើន​គឺ​ជាជនជាតិចិនដូចជា វិស័យសំណង់, វារីអគ្គិសនី, ​ការវិនិយោគលើវិស័យកសិកម្ម, រោងចក្រកាត់ដេរ និងឧស្សាហកម្មផ្សេងៗមួយចំនួនទៀត។

លោកបណ្ឌិត បន្តថា ផ្អែកទៅលើកិច្ចព្រមព្រៀងភាពពាណិជ្ជកម្មរវាងកម្ពុជា-ចិន និងផ្អែកទៅ​ផែនការសកម្ម ភាពឆ្នាំ ២០១៩-២០២៣ កម្ពុជា-ចិន​ នូវតែបន្តកិច្ចសហប្រតិបត្តិការ និងកាន់តែ​ខ្លាំងក្លា​ឡើងថែមទៀត។ ​ជាក់ស្តែងនៅក្នុងវិបត្តិនៃការរីករាលជំងឺកូវីដ ១៩ កំពុងផ្ទុះឡើង ស្ថានភាព​នៃការវិនិយោគរបស់ចិននៅតែបន្ត ជាពិសេសការវិនិយោគហេដ្ឋរចនាសម្ព័ន្ធ​ដែលផ្តល់កម្ចី​សម្បទាន​ពីប្រទេសចិន ក៏បានដំណើរជាធម្មតា។

លោកបណ្ឌិត ហុង វណ្ណៈ លើកឡើងថា កម្ពុជានឹងទទួលបានលំហូរវិនិយោគ​ពីប្រទេសចិន​បន្ថែម​ទៀត ស្របពេលកម្ពុជានូវតែបន្តស្វាគមន៍វិនិយោគិនចិន ​និងវិនិយោគិនបរទេសផ្សេងៗទៀត និងស្របពេលរាជរដ្ឋាភិបាលកម្ពុជា ​បានដោះស្រាយនូវបញ្ហាជាប់កាំងមួយចំនួនឲ្យមានភាព​ល្អប្រសើរ​ឡើងវិញ ។

ជុំវិញចិនបើកប្រទេសឡើងវិញដែរ, លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា លើកឡើងថា ​ចំពោះការបើកឡើងវិញនេះ, វិស័យឯកជន ​ក៏ដូចសភាពាណិជ្ជកម្មកម្ពុជាទាំងមូល សូម​ស្វាគមន៍ ​ប្រកប​ដោយ​ទំនុក​ចិត្តខ្ពស់​ ដើម្បី​ដំណើរ​ការ​សេដ្ឋកិច្ច​ប្រទេសទាំងពីរឡើងវិញ ។

ជុំវិញការធ្វើពាណិជ្ជកម្មកម្ពុជា-ចិន ​សម្តេចតេជោ ហ៊ុន សែន ​នាយករដ្ឋមន្ត្រីនៃកម្ពុជា បាន​លើក​ឡើង​ក្នុង​ឱកាសអញ្ជើញ ​ក្នុងពិធីបើកការដ្ឋានស្តារ ​និង​លើកកម្រិតគុណភាពផ្លូវពីរខ្សែទៀត ស្ថិត​ក្នុងភូមិសាស្ត្រខេត្តកំពត កាលពីថ្ងៃទី៣០ ខែធ្នូ ឆ្នាំ២០២២ នេះថា, នៅក្នុងឆ្នាំ២០២២ ទំហំ​ពាណិជ្ជកម្មរវាងកម្ពុជា-ចិន មានរហូតទៅដល់ ១៤ ៥០០ លាន​ដុល្លារអាមេរិក ​មានកំណើន​រហូត​ដល់ ១៩ភាគរយ ក្នុងនោះ​សម្តេចតេជោ ​ក៏មានការរំពឹងនាំ​ចេញ​ទៅ​ចិន​កាន់តែច្រើន តាម​រយៈកិច្ច​ព្រមព្រៀងពាណិជ្ជកម្មសេរី៕អត្ថបទ៖ សុន រ៉ាឌី