ប៉ាគីស្ថាន៖ នាយករដ្ឋមន្ត្រីប៉ាគីស្ថានលោក Shehbaz Sharif កំពុងស្នើឱ្យសហគមន៍អន្តរជាតិផ្តល់ជំនួយចំនួន ៨ពាន់លានដុល្លារក្នុងរយៈពេល ៣ឆ្នាំបន្ទាប់ ដើម្បីជួយផ្តល់មូលនិធិដល់កិច្ចប្រឹងប្រែងស្តារឡើងវិញ ពីគ្រោះទឹកជំនន់ដ៏បំផ្លិចបំផ្លាញកាលពីឆ្នាំមុន។
លោក Sharif បានធ្វើការអំពាវនាវនេះនៅក្នុងសន្និសីទអង្គការសហប្រជាជាតិ ដែលធ្វើឡើងនៅទីក្រុងហ្សឺណែវកាលពីថ្ងៃចន្ទតាមសំណើរបស់រដ្ឋាភិបាលប៉ាគីស្ថាន។ មន្ត្រីមកពីប្រទេសប្រមាណ ៤០ រួមមានទាំងប្រទេសជប៉ុនបានពិភាក្សាអំពីកិច្ចខិតខំប្រឹងប្រែងកសាងឡើងវិញ របស់ប្រទេសប៉ាគីស្ថានពីគ្រោះទឹកជំនន់ដែលបានកើតឡើង នៅចន្លោះខែមិថុនាដល់ខែសីហា នៅពេលដែលប្រទេសនេះត្រូវបានវាយប្រហារដោយភ្លៀងធ្លាក់ខ្លាំង។ គ្រោះមហន្តរាយនេះបានបណ្តាលឱ្យមនុស្សយ៉ាងហោចណាស់ ១,៧០០នាក់ស្លាប់ និងប៉ះពាល់ដល់ប្រជាជន ៣៣លាននាក់ផ្សេងទៀត។
លោក Sharif បានអំពាវនាវឱ្យមានសកម្មភាពជាសកលយ៉ាងឆាប់រហ័ស ដើម្បីជួយធ្វើឱ្យប្រទេសប៉ាគីស្ថាន និងសេដ្ឋកិច្ចរបស់ខ្លួនត្រឡប់មកវិញ។ អគ្គលេខាធិការអង្គការសហប្រជាជាតិលោក Antonio Guterres បានស្នើឱ្យសហគមន៍អន្តរជាតិគាំទ្រការស្តារឡើងវិញ របស់ប្រទេសប៉ាគីស្ថានពីគ្រោះទឹកជំនន់ ដែលអ្នកជំនាញបានដាក់កំហុសលើការឡើងកម្តៅផែនដី។ លោក Guterres និយាយថា ប្រទេសប៉ាគីស្ថានទទួលខុសត្រូវចំពោះការបំភាយឧស្ម័នផ្ទះកញ្ចក់តិចជាងមួយភាគរយនៃពិភពលោក ហើយប្រទេសនេះពុំបានរួមចំណែកដល់វិបត្តិអាកាសធាតុបច្ចុប្បន្ននោះទេ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
