បាល់ទាត់៖ ក្រុមហ៊ុន Huawei ប្រចាំ​នៅ​កម្ពុជា​ត្រៀម​សហការ ​ជាមួយ​គណៈកម្មាធិការ​ជាតិ​រៀបចំ​ការ​ប្រកួត​កីឡា​ស៊ី​ហ្គេម​លើក​ទី​៣២ ឆ្នាំ​២០២៣ (CAMSOC) និង​គណៈកម្មាធិការ​ជាតិ​អូឡាំពិក​កម្ពុជា ដើម្បី​បំពាក់​បច្ចេកវិទ្យា 5G និង​ឧបករណ៍​ឆ្លាត​វៃ​ជាច្រើន នៅ​ពហុ​កីឡដ្ឋាន​ជាតិ​មរតក​តេ​ជោ ដើម្បី​ត្រៀម​ស្វាគមន៍​ព្រឹត្តិការណ៍​ស៊ី​ហ្គេម​ឆ្នាំ​២០២៣ នៅ​កម្ពុជា។

ការ​បង្ហើប​នូវ​គម្រោង​ដ៏​ទាក់ទាញ​នេះ ធ្វើឡើង​ស្រប​ពេល​ឯកឧត្ដម​បណ្ឌិត ថោង ខុន រដ្ឋមន្ត្រី​ក្រសួងទេសចរណ៍ និង​ជា​ប្រធាន​គណៈកម្មាធិការ​ជាតិ​អូឡាំពិក​កម្ពុជា បាន​អនុញ្ញាត​ឲ្យ​លោក យ៉ាវ អ៊ី​យ៉ា អគ្គនាយក​ក្រុមហ៊ុន Huawei ប្រចាំ​នៅ​កម្ពុជាចូល​ជួប និង​ធ្វើ​បទ​បង្ហាញ​អំពី​ផែន​ការ​ជួយ​បំពាក់​បច្ចេកវិទ្យា​ព័ត៌មានវិទ្យា 5G ឧបករ​ណ៍​ឆ្លាត​វៃ កាមេរ៉ា​ឆ្លាត​វៃ នៅ​ពហុ​កីឡដ្ឋាន​ជាតិ​មរតក​តេ​ជោកាលពី​ល្ងាច​ថ្ងៃ​ទី​២២ ខែ​តុលា​ម្សិលមិញ។​ ​នៅ​ចំពោះ​មុខ​អនុប្រធាន​អចិន្ត្រៃយ៍ នៃ​គណៈកម្មាធិការ​ជាតិ​រៀបចំ​ការប្រកួត​កីឡា​ស៊ី​ហ្គេមឆ្នាំ​២០២៣ ដដែល លោក យ៉ាវ អ៊ី​យ៉ា បាន​បញ្ជាក់​ថា ផែនការ​បំពាក់​បច្ចេកវិទ្យា 5G និង​ឧបករណ៍​ឆ្លាត​វៃ​នេះគឺ​ដើម្បី​ជំរុញ​ភាព​ទាន់​សម័យ ទំនើប និង​លេចធ្លោ​ជាងគេផ្នែក​បច្ចេកវិទ្យា ដើម្បី​ជួយ​ដល់​គុណប្រយោជន៍នៃ​ពហុ​កីឡដ្ឋាន​ជាតិ​មរតក​តេ​ជោ​ផង ក៏ដូចជា​ជួយ​ដល់​ព្រឹត្តិការណ៍ SEA Games និង ASEAN Para Games 2023 ផង។​

​ឆ្លៀតឱកាស​នោះ ឯកឧត្ដម​បណ្ឌិត ថោង ខុន បាន​សម្ដែង​ការ​ស្វាគមន៍ និង​ថ្លែងអំណរគុណ​ដល់​ក្រុមហ៊ុន Huawei ដែល​ត្រៀម​ជួយ​ដល់​ដំណើរការ​រៀបចំ​ ឆ្ពោះ​ទៅ​រក​ការប្រកួត​កីឡា​ប្រចាំ​តំបន់គឺ SEA Games និង ASEAN Para Games 2023 ហើយ​គម្រោង​នេះ ឯកឧត្ដម​រដ្ឋមន្ត្រី​នឹង​រាយការណ៍​ជូន​សម្ដេច​ពិជ័យ​សេនា​ប្រធាន CAMSOC និង​គោរព​ស្នើការ​សម្រេច​ពី​សម្ដេច​តេ​ជោ​នាយករដ្ឋមន្ត្រី​នា​ពេល​ខាង​មុខ៕

​អត្ថបទ៖ លី ឈុន​ឡា