ភ្នំពេញ៖ រាជរដ្ឋាភិបាលកម្ពុជា បានចំណាយថវិការហូតដល់ជាង ១៣លានដុល្លារ ក្នុងការ​បើកសាច់​ប្រាក់លើកទី ១ ជួយដល់ប្រជាពលរដ្ឋរងគ្រោះពីបញ្ហាទឹកជំនន់ និងពលរដ្ឋដែលរងគ្រោះពី​បញ្ហា​សម្ពាធ​អតិផរណា ​ដែលមាន​ចំនួន​ជិត៣៦ម៉ឺនគ្រួសារ​។

ឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន ​និងយុវនីតិសម្បទា បានគូសបញ្ជាក់ថា ការបើកសាច់ប្រាក់ជូនគ្រួសាររងគ្រោះពីបញ្ហាទឹកជំនន់ ​គឺអនុវត្តលើរាជធានី-ខេត្តចំនួន​ ១៦ ក្នុងនោះ​មានពលរដ្ឋទទួលផលចំនួនជាង ​៩៩ ០០០គ្រួសារ ​ដោយចំណាយថវិកាជិត ៣លាន ៩សែនដុល្លារ។

រីឯកម្មវិធីជួយជនរងគ្រើពីសម្ពាធអតិផរណា គឺអនុវត្តពេញផ្ទៃប្រទេស ​ដោយមានគ្រួសារទទួលផល​ប្រមាណ ២៦ម៉ឺនគ្រួសារ​ និងចំណាយ​ថវិកា​ប្រមាណ​ ៩លានដុល្លារ។

ឯកឧត្តមរដ្ឋមន្រ្តី លើកឡើងបន្ថែមថា ​ចំនួនគ្រួសារទទួល​បាន​ការឧបត្ថម្ភនេះ សម្រាប់ការបើក​សាច់​ប្រាក់លើកទី ២ គឺនឹងមានការផ្លាស់ប្ដូរ ​សំដៅលើប្រជាពលរដ្ឋក្បែរភាពក្រីក្រ ដែលរងសម្ពាធពីអតិផរណា។

កម្មវិធីជំនួយសង្គមថ្មីទាំងពីរនេះ ​ជាកម្មវិធីមិន​អចិន្រ្តៃយ៍ ​ដោយនឹងមានការបិទបញ្ចប់ក្នុង​ពេលវេលា​ណាមួយ។ ជាក់ស្ដែងសម្រាប់កម្មវិធីជួយជនរងគ្រោះពីបញ្ហាទឹកជំនន់ ​គឺបើកសាច់ប្រាក់ចំនួន ៣លើក​ ក្នុងរយៈពេល ៣ខែជាប់គ្នា។ ​ការបើកសាច់ប្រាក់លើកទី ១ ​គឺនៅសប្ដាហ៍ទី ២ ខែធ្នូ ឆ្នាំ ២០២២ លើកបន្ទាប់​ គឺនៅសប្ដាហ៍ទី ២ ខែមករា និងលើកទី ៣ នៅសប្ដាហ៍ទី ២ ខែកុម្ភៈ ឆ្នាំ២០២៣។

រីឯការបើកសាច់ប្រាក់ជូនគ្រួសារក្បែរភាពក្រីក្រ ដែលរងសម្ពាធពីអតិផរណាវិញ ក្នុងការអនុម័ត​ដំបូង គឺបើកជូនចំនួន ៣លើកដូចគ្នា។ លើកទី ១ គឺបើកថវិកានៅថ្ងៃទី ១០ ខែធ្នូ ឆ្នាំ ២០២២ លើកទី ២នៅថ្ងៃទី ១០ ខែមេសា និងលើកទី ៣ នៅថ្ងៃទី ១០ ខែកក្កដា ឆ្នាំ ២០២៣៕ អត្ថបទ៖ គឹមហុក