ទីលានបញ្ចុះ​សពអតីតយុទ្ធជន នៅខេត្តកោះកុងបានសាងសង់រួចជាស្ថាពរ ហើយ​គ្រោង​នឹង​សម្ពោធ និង​ធ្វើ​បុណ្យឆ្លងតាមបែបសាសនា នៅថ្ងៃទី១៧ ខែមករា ឆ្នាំ២០២៣ខាងមុខនេះ ដើម្បី​ឧទ្ទិស​កុសល ជូនដល់ដួងវិញ្ញាណក្ខន្ធកម្មាភិបាល យុទ្ធជន ដែល​បាន​ពលី​ជីវិត​ក្នុង​សម័យ​សង្គ្រាម​ចំនួន ៤៤៧នាក់នោះ។

ថ្លែងប្រាប់ក្រុមអ្នកសារព័ត៌មាន នៅព្រឹកថ្ងៃទី១១ ខែមករា ឆ្នាំ ២០២៣នេះ នៅទីស្តីការ​ក្រសួង​ការពារ​ជាតិ នាយឧត្តមសេនីយ៍ យន្ត មីន បានឲ្យដឹងថា ការសាងសង់ នូវ​ទី​លាន​ផ្នូរ​អតីត​យុទ្ធជន​នា​ពេល​នេះ គឺជាកិច្ចតបស្នងសងគុណយុទ្ធមិត្ត ជានាយទាហាន ពលទាហាន ដែលបានលះបង់ អាយុជីវិត​ក្នុង​សម័យសង្គ្រាម ដើម្បីបូរណភាពទឹកដី ការពារប្រទេសជាតិ មាតុភូមិ និង​ការពារ​អាយុ​ជី​វិ​តប្រជាពលរដ្ឋ ដើម្បីឈានរកសន្តិភាពជូនប្រទេសជាតិ និងប្រជាពលរដ្ឋជាដើមនោះ។

ជាមួយ​គ្នានោះដែរ នាយឧត្តមសេនីយ៍ យន្ត មីន ក៏បានអំពាវនាវដល់បងប្អូនណា ដែលបាន បាត់​សាច់​ញាតិ នាគ្រានោះអញ្ជើញទៅរក និងទៅធ្វើបុណ្យឧទ្ទិសកុសលជូនពួកគាត់ ខណៈ​សព​ដែល​បាន បញ្ចុះនៅក្នុងទីលាននោះ គឺបានបញ្ជាក់ឈ្មោះ និងភូមិឃុំ ដែលពួកគាត់បានរស់នៅផងដែរ។

បើតាមនាយឧត្តមសេនីយ៍ យន្ត មីន បានឲ្យដឹងផងដែរថា ទីលានផ្នូរសពអតីតយុទ្ធ នៅ​ខេត្ត​កោះកុង​នេះ គឺបានសាងសង់ឡើងតាមរចនាបទខ្មែរសុទ្ធសាធ បន្ថែម​ពី​នេះ​ក្រុម​ការងារ​ជំនាញ​បាន​កែ​លម្អបន្ថែម​ទៀត នូវរចនាបទអង្គរ ហើយប្រវត្តិទីតាំងនេះបានដាក់សាកសពយុទ្ធពល ដែល​ពលី​ជីវិត ដើម្បីបូរណភាពទឹកដីនេះ តាំងពីខែកក្កដា ឆ្នាំ១៩៧៩មកម្ល៉េះ៕ អត្ថបទ៖ បាន ចក់