ភ្នំពេញ៖ ប្រជាពលរដ្ឋក្បែរភាពក្រីក្រ នៅតែអាចស្នើសុំការ​សម្ភាសន៍ ​ដើម្បី​ទទួលបានថវិកាពី កម្មវិធី​ឧបត្ថម្ភសាច់ប្រាក់​ជូនគ្រួសារងាយរង​ហានិភ័យ​ក្នុង​អំឡុង​ពេល​មាន​សម្ពាធអតិផរណា។ 

គ្រួសារក្បែរភាពក្រីក្រទូទាំង​ប្រទេស មកទល់ពេលនេះអាចបន្តស្នើសុំទៅអាជ្ញាធរ​មូលដ្ឋាន​ដែលខ្លួន​រស់នៅ ដើម្បីទទួលការសម្ភាសន៍​សម្រាប់ ​កម្មវិធីឧបត្ថម្ភសាច់ប្រាក់​ជូនគ្រួសារងាយរងហានិភ័យ​ក្នុង​អំឡុងពេលមានសម្ពាធអតិផរណា។ នេះជាការលើកឡើងរបស់ឯកឧត្តម កែវ អ៊ូលី ប្រធាននាយកដ្ឋាន​អត្តសញ្ញាណកម្ម​គ្រួសារក្រីក្រនៃក្រសួងផែនការ។

ឯកឧត្តម បានបន្តថា ការកំណត់អត្តសញ្ញាណគ្រួសារទទួលផល ​គឺធ្វើឡើងជាប្រចាំ ដើម្បីជួយ​សម្រួលដល់គ្រួសារក្បែរភាពក្រីក្រដែលនៅសល់។ ​ជាក់ស្ដែងគិតចាប់ពីចុងខែវិច្ឆិកា ​ឆ្នាំ ២០២២ ជាការចាប់ផ្ដើមប្រមូលទិន្ន័យលើកទី ​២ ដែលមានប្រជាពលរដ្ឋក្បែរភាពក្រីក្រជាង ​១០ម៉ឺនគ្រួសារ បានសម្ភាសន៍រួចរាល់បន្ថែមទៀត ។

កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យក្នុងអំឡុងពេលមានសម្ពាធអតិផរណា ជា​កម្មវិធីជំនួយសង្គមថ្មីដែលរដ្ឋាភិបាលទើបសម្រេចឱ្យអនុវត្ត។ កម្មវិធីនេះ​ ជាកម្មវិធីមិនអចិន្ត្រៃយ៍ ដែលសំដៅជួយដល់គ្រួសារក្បែរក្រ ​អំឡុងពេលមានសម្ពាធអតិផរណានេះ។ ការផ្ដល់ថវិកាជូនគ្រួសារគោលដៅមានចំនួន ៣ លើក ដោយការបើកសាច់ប្រាក់ធ្វើឡើងរៀងរាល់ ៣ខែម្ដង។

ការបើកសាច់ប្រាក់លើកទី ១ ធ្វើឡើងនៅថ្ងៃទី ១០ ខែធ្នូ ឆ្នាំ ២០២២ ការបើកសាច់ប្រាក់លើកទី ២ ធ្វើឡើងថ្ងៃទី ១០ ខែមេសា និងការបើកថវិកាលើកទី ៣ធ្វើឡើងនៅថ្ងៃទី ១០ ខែកក្កដា ឆ្នាំ២០២៣។

តាមរបាយការណ៍របស់ក្រសួងសង្គមកិច្ច ជាក្រសួងទទួលខុសត្រូវ លើការការបើកសាច់ប្រាក់​ជូន​គ្រួសារ​ទទួលផល ​បង្ហាញថា​ គ្រួសារក្បែរភាពក្រីក្រត្រូវទទួល​បាន​ថវិកា​ពីរដ្ឋាភិបាល ក្នុងការ​បើក​សាច់ប្រាក់លើកទី១ នៅថ្ងៃទី ១០ ខែធ្នូ ឆ្នាំ២០២២ គឺមានចំនួនជាង ​២៦ម៉ឺនគ្រួសារ ស្មើនឹង​ប្រជាពលរដ្ឋជាង ៧០ម៉ឺននាក់។ ​ថវិកាបើកជូនលើកទី ១នោះ គឺរាជ

រដ្ឋាភិបាលបានចំណាយ​ថវិកា​អស់​រហូត​ដល់ជាង ៩លានដុល្លារ៕ អត្ថបទ៖ គឹមហុក