កំពង់ឆ្នាំង៖ នៅព្រឹកថ្ងៃទី១១ ខែមករា ឆ្នាំ២០នៅព្រឹកថ្ងៃទី១១ ខែមករា ឆ្នាំ២០២៣នេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានថ្លែងថា ការដោះស្រាយវិវាទក្រៅ​ប្រព័ន្ធ​តុលាការ​របស់​រដ្ឋបាលខេត្តកំពង់ឆ្នាំង មកដល់ពេលនេះ គឺដោះស្រាយ​បាន​ប្រមាណ​ជិត​១​ពាន់​ករណី ក្នុងចំណោមសំណុំរឿង១០០៨ករណី ។ ក្រោយ​ពី​បញ្ចប់​ការងារ​កាត់​ឆ្វៀល​ដី​ជូន​ប្រជា​ពលរដ្ឋ ឯកឧត្តម និងក្រុមការងារខេត្ត នឹងបន្តដោះស្រាយបញ្ចប់វិវាទទាំងនោះតែម្តង ហើយ​ករណី​ណា​ដែល​ធំដោះមិនចេញ នឹងបញ្ជូនទៅថ្នាក់លើបន្ថែម។

ឯកឧត្តម ស៊ុន សុវណ្ណារិទ្ធិ បានបន្តថា ចាប់​តាំង​ពី​ឯកឧត្តម​បាន​ឡើង​ជា​អភិបាល​ខេត្ត​កំពង់ឆ្នាំង​មក​ គឺឯកឧត្តមបានបង្កើតក្រុមការងារថ្នាក់ខេត្តមួយ ដែលមានអភិបាល អភិបាលរងខេត្ត​ដឹក​នាំ​ចុះ​ដោះ​ស្រាយ​វិវាទក្រៅប្រព័ន្ធតុលាការជូនប្រជាពលរដ្ឋនៅក្នុងខេត្ត ដោយនៅចុងឆ្នាំ២០២១ សំណុំ​រឿង​មានរហូតដល់១០០៨ករណី ។ ក្រោយ​ពេល​ក្រុម​ការងារ​ថ្នាក់​ខេត្ត​បា​ន​ដោះ​ស្រាយ​រហូត​មក​ដល់ពេលនេះ បានប្រមាណជិត ១ពាន់ករណី ក្នុងនោះមានទាំងករណីវិវាទតូចធំ និង​មាន​ទាំង​វិវាទ​ដែល​កើតឡើងជាង ២០ឆ្នាំមកហើយផងដែរ ក៏ប៉ុន្តែក្រុមការងារបានយកច្បាប់ និង​យុទ្ធ​សាស្ត្រ ​ឈ្នះ ឈ្នះ មកដោះស្រាយ អោយមានការព្រមព្រៀងរវាងភាគីទាំងសងខាង។ ក្រោយ​ពេល​អាជ្ញាធរ​ខេត្តកំពង់ឆ្នាំង​បាន​បង្កើត​ក្រុម​ការងារ​ដោះ​ស្រាយ​វិវាទ​ក្រៅ​ប្រព័ន្ធ​តុលាការ​ហើយ​នោះ ​ឃើញថា នៅក្នុងខេត្តកំពង់ឆ្នាំងវិវាទទាំងឡាយ ត្រូវបានថយចុះ។ ឯកឧត្តមបានបន្តថា ក្រោយ​ពី​ការ​កាត់ឆ្វៀលដីតំបន់២ និង​តំបន់៣ មួយចំនួនជូនប្រជាពលរដ្ឋរួចហើយនោះ ឯកឧត្តម នឹង​បន្តអោយក្រុមការងារសំរុកដោះស្រាយវិវាទដែលនៅសេសសល់បញ្ចប់តែម្តង ហើយ​ប្រសិន​បើ​មាន​ករណី​វិវាទ​កើត​ឡើងថ្មីៗ គឺត្រូវដោះស្រាយជាបន្ទាន់ជូនប្រជាពលរដ្ឋ គឺធ្វើយ៉ាងណាកុំអោយ​ពេល​កើត​បញ្ហា​ឡើង អាជ្ញាធរឃុំស្រុកខេត្តមិនបានដោះស្រាយ បែរប្រជាពលរដ្ឋ​នាំ​គ្នា​ទៅ​ប្តឹង​ដល់​តុលាការ​ភ្លាម​នោះ​។

ឯកឧត្តម ស៊ុន សុវណ្ណារិទ្ធិ អភិបាល​ខេត្ត​ក៏​បាន​អំពាវនាវ​ដល់​បង​ប្អូន​ប្រជាពលរដ្ឋ​ក្នុង​ខេត្ត​កំពង់ឆ្នាំង ពេលមានវិវាទកើតឡើង មិនត្រូវនាំគ្នាប្តឹងទៅតុលាការភ្លាមនោះទេ ត្រូវទុក​ឱកាស​អោយ​ក្រុម​ការងារដោះស្រាយវិវាទក្រៅប្រព័ន្ធតុលាការថ្នាក់ខេត្តជាអ្នកដោះស្រាយជូន។ ឯក​ឧត្តម​ថា «មិនមានបញ្ហាណាមួយដែលយើងមិនអាចដោះស្រាយបាននោះទេ អោយ​តែ​បង​ប្អូន​ប្រជាពលរដ្ឋ មានឆន្ទៈក្នុងការដោះស្រាយវិវាទទាំងនោះ និងត្រូវមាន​សន្តិភាព​ក្នុង​ផ្លូវ​ចិត្ត​ទាំង​អស់​គ្នា ទើបប្រទេសយើងរីកចម្រើន» ៕ ហុង វាស្នា