ភ្នំពេញ៖ មជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានដាក់ទិសដៅផែនការសម្រាប់សកម្មភាពបោសសម្អាតមីនចេញពីផ្ទៃដីក្នុងប្រទេសកម្ពុជាសម្រាប់ឆ្នាំ២០២៣នេះ ឱ្យបានប្រមាណ ២៦០ គីឡូម៉ែត្រក្រឡាបន្ថែមទៀត។
ឯកឧត្ដម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) ថ្លែងក្នុងពិធីបូកសរុបលទ្ធផលការងារប្រតិបត្តិឆ្នាំ២០២២ និងលើកទិសដៅផែនការឆ្នាំ២០២៣ កាលពីថ្ងៃទី១១ ខែមករា ឆ្នាំ២០២៣នេះ នៅទីស្នាក់ការអង្គភាពស៊ីម៉ាក់។
ឯកឧត្ដម ហេង រតនា បានមានប្រសាសន៍ថា «ក្នុងឆ្នាំ២០២២ អង្គភាពស៊ីម៉ាក់ បានរំដោះផ្ទៃដីមានមីន បានចំនួនជាង ១៩៤ គីឡូម៉ែត្រក្រឡា បើប្រៀបធៀបនិងផែនការស្នើនិងប្រមាណ ១៧០ ភាគរយនៃផែនការ»។
បើតាមលឯកឧត្តម ហេង រតនា សម្រាប់យុទ្ធសាស្រ្ដ និងគោលនយោបាយរបស់រាជរដ្ឋាភិបាលសម្រាប់ឆ្នាំ២០២៣ ដល់ឆ្នាំ២០២៥ ខាងមុខនេះ រាជរដ្ឋាភិបាលកម្ពុជា អនុវត្តតាមអនុសាស្រ្ដរបស់សម្ដេចតេជោ ហ៊ុន សែន នាយករដ្ឋមន្រ្ដី បានផ្ដួចផ្ដើមកើតនូវមូលនិធិកម្ពុជាគ្មានមីន ដើម្បីរំដោះគ្រាប់មីនចេញពីកម្ពុជា ទៅតាមផែនការដែលបានគ្រោងទុក គឺកម្ពុជាគ្មានមីនត្រឹមឆ្នាំ២០២៥។
ឯកឧត្ដមបញ្ជាក់ថា «ឆ្នាំ២០២៣នេះ យើងមានផែនការធ្វើឱ្យបាន ២៦៥ គីឡូម៉ែត្រក្រឡា។ យើងសប្បាយរីករាយដែលសម្ដេចតេជោ លោកបានយកចិត្តទុកដាក់ ហើយបានបង្កើតមូលនិធិកម្ពុជាគ្មានគ្រាប់មីន ២០២៥ ដែលមូលនិធិនេះដើរតួនាទីសំខាន់នូវក្នុងការជំរុញវិស័យសកម្មភាពមីនឱ្យសម្រេចតាមទស្សនៈវិស័យកម្ពុជាគ្មានមីន ឆ្នាំ២០២៥»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
