ភ្នំពេញ៖ នៅព្រឹកថ្ងៃទី១១ ខែមករា នេះ អង្គភាពប្រឆាំងអំពើពុករលួយ (ACU) បានបញ្ជូនខ្លួនលោក ឡាយ សំណាង អនុប្រធាននាយកដ្ឋានហិរញ្ញវត្ថុ និងផ្គត់ផ្គង់ ​ក្រសួងសង្គមកិច្ច អតីតយុវជន និងយុវនីតីសម្បទា ទៅសាលាដំបូងរាជធានីភ្នំពេញ ​ដែលរងការចោទចំនួន២ករណី រួមមាន៖ បទចោទពីការកេងយកផលប្រយោជន៍ដោយខុសច្បាប់ និងបទចោទលើករណីសម្អាតប្រាក់ ។

ឯកឧត្តម សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយ បានប្រាប់BTV​នៅព្រឹកថ្ងៃទី១១ ខែមករា នេះថា បន្ទាប់ពីACU បានរៀបចំកសាងសំណុំរឿងរួចហើយ ​នៅព្រឹកមិញនេះ ACU បានបញ្ជូន លោក ឡាយ សំណាង អនុប្រធាននាយកដ្ឋានហិរញ្ញវត្ថុ ​និងផ្គត់ផ្គង់​ ក្រសួងសង្គមកិច្ច ទៅតុលាការរួច ហើយ ដែលនៅក្នុងដំណាក់ដំបូង ព្រះរាជអាជ្ញា នឹងធ្វើការចោទសួរ ទៅតាម​សំណុំរឿង ដែលACUបានបញ្ជូនទៅ ។

លោក ឡាយ សំណាង អនុប្រធាននាយកដ្ឋានហិរញ្ញវត្ថុ និងផ្គត់ផ្គង់ ក្រសួងសង្គមកិច្ច ​អតីតយុវ ជន និងយុវនីតីសម្បទា និងជាអ្នកភ្នាក់ងាររបស់ក្រសួង ​ដើម្បីទៅបើកប្រាក់ពីធនាគារ ត្រូវបានអង្គភាព ប្រឆាំងអំពើពុករលួយចាប់ខ្លួនហើយ ​ពាក់ព័ន្ធនឹងការ​កិបកេង​ថវិកា​រដ្ឋជាង ៣៨ម៉ឺនដុល្លារ ព្រមទាំង​ការ​កិបកេង​ប្រាក់​របប​គោល​នយោបាយ​របស់​រដ្ឋ​ជូន​ជនពិការ​ក្រីក្រ​នៅ​តាម​សហគមន៍ ចំនួនជិត ៤ពាន់នាក់ផងដែរ ៕ អត្ថបទ៖ ស៊ុម សុខជា