ភ្នំពេញ៖ លោកសាស្ត្រាចារ្យ ញឹប អង្គាបុស្ស នាយកមន្ទីរពេទ្យកុមារជាតិ នៃក្រសួងសុខាភិបាល តាមរយៈBTV ព័ត៌មាន នាព្រឹកថ្ងៃទី១១ ខែមករា ឆ្នាំ២០២៣នេះ បានអំពាវនាវដល់អាណាព្យាបាល ប្រជាពលរដ្ឋ អញ្ជើញមកចាក់វ៉ាក់សាំងបង្ការជំងឺកូវីដ-19 ដូសជំរុញទី៤-ទី៥ និងទី៦ ដើម្បីបង្កើនភាពស៊ាំទប់ទល់នឹងការឆ្លងរីករាលដាល នៃវីរុសកូវីដ-19។

លោកសាស្ត្រាចារ្យ ញឹប អង្គាបុស្ស បានលើកឡើងទៀតថា​ រាជរដ្ឋាភិបាលកម្ពុជា ជាពិសេស​សម្តេចតេជោ ហ៊ុន សែន នាយករដ្ឋមន្ត្រី បានយកចិត្តទុកដាក់ចំពោះសុខភាព សុវត្ថិភាព​របស់​ប្រជាជនកម្ពុជា ជាពិសេសទាក់ទងការការពារជំងឺកូវីដ-19។

ចំណែកអាណាព្យាបាល និងប្រជាពលរដ្ឋក្មេង ចាស់ ប្រុស ស្រី មកចាក់វ៉ាក់សាំងបង្ការជំងឺកូវីដ-19 នៅមន្ទីរពេទ្យកុមារជាតិ បានលើកឡើងស្រដៀងគ្នាថា ថ្ងៃនេះពួកគាត់បានមកចាក់វ៉ាក់សាំង ដើម្បី​ការពារសុខភាពរបស់ខ្លួនឯងផង ម្យ៉ាងខ្លាចឆ្លងរាលដាលដល់ប្រជាជនទូទៅ ជាពិសេសពួកគាត់​ពេញចិត្ត ពេញថ្លើមមែនទែន ​ដែលរាជរដ្ឋាភិបាលកម្ពុជា ​បាននាំយកវ៉ាក់សាំង មានប្រសិទ្ធភាព គុណភាព និងសុវត្ថិភាព មកចាក់ជូនកូនចៅ។

លោកសាស្ត្រាចារ្យ ញឹប អង្គាបុស្ស បានបញ្ជាក់ថា ដូចអស់លោក លោកស្រី បានជ្រាបហើយថា ការការពារជំងឺកូវីដ-19 ​គឺយើងត្រូវអនុវត្តន៍វិធានការ ៣កុំ ៣ការពារ ​ជាមធ្យោបាយមួយ។ ប៉ុន្តែមធ្យោបាយ​មួយដែលចម្បង ​ហើយជាគ្រឹះទៀតនោះ ​គឺការចាក់ថ្នាំបង្ការជំងឺកូវីដ-19។ ហើយការចាក់វ៉ាក់សាំងបង្ការជំងឺកូវីដ-19នេះ ​វាមិនមានប្រសិទ្ធភាពជាប់រហូតនោះទេ គឺវាអាច​ការពារយើងបានមួយរយៈពេល។ ដូច្នេះតម្រូវឲ្យយើងគ្រប់រូប ​ត្រូវចាក់វ៉ាក់សាំងដូសជំរុញបន្តទៀត ដើម្បីធ្វើឲ្យភាពស៊ាំក្នុងខ្លួនរបស់យើង ​មានភាពខ្លាំងក្លា ​រឹងម៉ាំគ្រប់គ្រាន់​ អាចការពារជំងឺកូវីដ-19នេះបាន៕អត្ថបទ រដ្ឋា