ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានអគុណអតីតប្រធានសភាកូរ៉េដែលជួយឱ្យកូរ៉េនិងកម្ពុជាសម្រេចកិច្ចការធំៗចំនួន៣ រួមមានកិច្ចព្រមព្រៀងពាណិជ្ជកម្មសេរី ជាពិសេសការផ្តល់ហិរញ្ញប្បទានសាងសង់ស្ពានមិត្តភាពកម្ពុជា កូរ៉េ។

សម្តេចតេជោប្រមុខរាជរដ្ឋាភិបាល បានកម្ពុជាបានលើកឡើងនូវការសរសើរបែបនេះ ខណៈទទួលជួបសំដែងការគួរសមពីឯកឧត្តម ប៉ាក់ យុងស៊ុក( Park Byeongseug )អតីតប្រធានរដ្ឋសភាកូរ៉េខាងត្បូងនៅវិមានសន្តិភាពនាល្ងាចថ្ងៃទី១១មករានេះ។

ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោបានឱ្យដឹងថា ក្នុងជំនួបនេះ ឯកឧត្តម ប៉ាក់ បានគោរពជម្រាបជូនសម្ដេចតេជោថា ឯកឧត្តមបានសង្កេតឃើញព្រះរាជាណាចក្រកម្ពុជាមានការរីកចម្រើនយ៉ាងខ្លាំងក្នុងរយៈពេល ១០ ឆ្នាំកន្លងមកនេះ។ឯកឧត្តមពិតជាមានការរីករាយណាស់ចំពោះវឌ្ឍនភាពរបស់ព្រះរាជាណាចក្រកម្ពុជាហើយអ្វីដែលឯកឧត្តមកាន់តែមានភាពរីករាយនិងមោទនភាពបំផុតទៀតនោះគឺការដែលកម្ពុជាបានរៀបចំនិងដឹកនាំកិច្ចប្រជុំកំពូលអាស៊ាននិងកិច្ចប្រជុំកំពូលពាក់ព័ន្ធក្នុងភាពជាប្រធានអាស៊ានទទួលបានជោគជ័យយ៉ាងត្រចះត្រចង់ លើកស្ទួយកិត្តិស័ព្ទកម្ពុជាលើឆាកអន្តរជាតិ។

ក្នុងន័យនេះ ឯកឧត្តមសូមគោរពសម្ដែងនូវការអបអរសាទរជូនចំពោះសម្ដេចតេជោនិងបានគោរពជម្រាបជូនសម្ដេចតេជោផងដែរថា៖កាលពីឆ្នាំកន្លងទៅសម្ដេចបានដាក់ការងារឲ្យឯកឧត្តមធ្វើចំនួន ៣៖ ទី១គឺការផ្ដល់សច្ចាប័នលើកិច្ចព្រមព្រៀងពាណិជ្ជកម្មសេរីរវាងកម្ពុជានិងកូរ៉េ. ទី២ គាំទ្រការផ្ដល់ហិរញ្ញប្បទានសម្បទានសម្រាប់ការសាងសង់ស្ពានមិត្តភាព កម្ពុជា កូរ៉េនិងទី៣.បង្កើនកូតាសម្រាប់ឲ្យពលករកម្ពុជាបានទៅធ្វើការនៅប្រទេសកូរ៉េ ហើយឥឡូវនេះការងារទាំង៣គឺសម្រេចបា នប្រកបដោយជោគជ័យហើយកិច្ចព្រមព្រៀងពាណិជ្ជកម្មសេរីរវាងកម្ពុជា កូរ៉េ បានចូលជាធរមានហើយៗស្ពានមិត្តភាពកម្ពុជា កូរ៉េបានចុះហត្ថលេខារួចហើយៗកូតាសម្រាប់អនុញ្ញាតឱ្យពលករកម្ពុជាទៅធ្វើការនៅប្រទេសកូរ៉េបានកើនឡើងចំនួន៤០% ហើយអ្វីដែលឯកឧត្តមនិងប្រតិភូនឹងធ្វើបន្ត ទីមួយគឺធ្វើយ៉ាងណាជំរុញទំនាក់ទំនងទ្វេភាគីរវាងកម្ពុជានិងកូរ៉េឲ្យកាន់តែរីកធំធាត់និងរឹងមាំថែមទៀត។ទី២ ស្វែងរកការគាំទ្រជួយដល់កម្ពុជាលើវិស័យដោះមីននិងទី៣លើកទឹកចិត្តឲ្យវិនិយោគទុនកូរ៉េមកវិនិយោគនៅកម្ពុជាដោយផ្ទាល់ឬតាមរយៈមួយបូកព្រោះថាកម្ពុជាមានកត្តាអនុគ្រោះល្អដែលកត្តាទាំងនោះ គឺយុវជនមានគុណភាពខ្ពស់កម្ពុជាប្រើប្រាស់ប្រាក់ជាប្រាក់ដុល្លារហើយកម្ពុជានិងកូរ៉េមានកិច្ចព្រមព្រៀងគាំពារវិនិយោគនិងពាណិជ្ជកម្មសេរីជាមួយនឹងសក្តានុពលជាច្រើនទៀតដែលមាននៅកម្ពុជា។

ជាការឆ្លើយតបសម្ដេចតេជោ បានថ្លែងអំណរគុណជូនចំពោះឯកឧត្តម ប៉ាក់ ដែលបានវាយតម្លៃលើវឌ្ឍនភាពកម្ពុជាជាមួយនឹងការអបអរសាទរលើជោគជ័យនៃការរៀបចំនិងដឹកនាំកិច្ចប្រជុំកំពូលអាស៊ាននិងកិច្ចប្រជុំកំពូលពាក់ព័ន្ធបានយ៉ាងជោគជ័យហើយសម្ដេចក៏បានថ្លែងអំណរគុណជូនចំពោះឯកឧត្តម ដែលបានធ្វើការងារទាំងបីដែលសម្ដេច បានស្នើសុំឲ្យជួយកន្លងមកដោយសម្រេចបានយ៉ាងជោគជ័យ ជាមួយនឹងការយកចិត្តទុកដាក់ជួយដល់កម្ពុជាថែមទៀតតាមរយៈការជំរុញទំនាក់ទំនងទ្វេភាគីឲ្យកាន់តែរឹងមាំឡើង ស្វែងរកជំនួយជួយដល់កម្ពុជាលើវិស័យដោះមីន និងជំរុញអ្នកវិនិយោគទុនកូរ៉េឲ្យមកកម្ពុជាតាមរយៈការមកវិនិយោគផ្ទាល់និងតាមរយៈការវិនិយោគមួយបូក។

គួរជំរាបថា ក្នុងឱកាសនេះ សម្តេចតេជោក៏បានទទួលពិសារបាយល្ងាចការងារជាមួយឯកឧត្តម ប៉ាក់ យុងស៊ុក (Park Byeongseug ) អតីតប្រធានរដ្ឋសភាកូរ៉េ រូបនេះនៅវិមានសន្តិភាពផងដែរ៕