ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសថា កាលបរិច្ឆេទ នៃការបិទផ្សាយបញ្ជីអ្នកបោះឆ្នោតដំបូង និងបញ្ជីឈ្មោះអ្នកបោះឆ្នោត ដែលនឹងត្រូវលុបចោលចេញពីបញ្ជីបោះឆ្នោត ឆ្នាំ២០២២ នឹងត្រូវធ្វើនៅថ្ងៃទី១៣ ខែមករា ឆ្នាំ២០២៣ ស្អែកនេះ ដោយការបិទផ្សាយត្រូវធ្វើព្រមគ្នា នៅឃុំសង្កាត់ទូទាំងប្រទេស ហើយបញ្ជីទាំងពីរនេះត្រូវបិទនូវទន្ទឹមគ្នាលើទីតាំងតែមួយ ដើម្បីឲ្យអ្នកបោះឆ្នោតងាយស្រួលក្នុងការពិនិត្យផ្ទៀងផ្ទាត់ឈ្មោះ និងទិន្នន័យរបស់ខ្លួន។
ថ្លែងនៅក្នុងកិច្ចប្រជុំផ្សព្វផ្សាយជាមួយភាគីពាក់ព័ន្ធ នាព្រឹកថ្ងៃទី១២ ខែមករា ឆ្នាំ២០២៣នេះ លោក ហ៊ីង ធីឫទ្ធី សមាជិក គ.ជ.ប បានឲ្យដឹងថា ចំនួនប្រជាពលរដ្ឋ ដែលមានឈ្មោះក្នុងបញ្ជីបោះឆ្នោតដំបូង ដែលត្រូវបិទផ្សាយមានចំនួន ៩.៧១០.៦៤៥នាក់ ក្នុងនោះស្រីចំនួន ៥.១៦១.៩០៦នាក់ ខណៈការិយាល័យបោះឆ្នោតមានចំនួន ២៣.៧៨៩ការិយាល័យ។ ដោយឡែកប្រជាពលរដ្ឋដែលត្រូវលុបចេញពីបញ្ជីបោះឆ្នោត ដោយមូលហេតុ ផ្លាស់ចេញ ស្លាប់ ស្ទួន និងការដកសិទ្ធិបោះឆ្នោត មានចំនួនសរុប ២៧១.១៤២នាក់។
នៅក្នុងកិច្ចប្រជុំខាងលើនេះដែរ លោក ហ៊ីង ធីឫទ្ធី ក៏បានអំពាវនាវឲ្យបងប្អូនប្រជាពលរដ្ឋ ដែល បានចុះឈ្មោះបោះឆ្នោតរួចហើយ សូមទៅពិនិត្យផ្ទៀងផ្ទាត់ឈ្មោះ និងទិន្នន័យរបស់ខ្លួនក្នុងបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលត្រូវបានលុបចេញពីបញ្ជីបោះឆ្នោត ដែលនឹងត្រូវបិទផ្សាយ នៅតាមឃុំ សង្កាត់ ឬតាមគេហទំព័រ ឬតាមApp ទូរស័ព្ទដៃ។ លោកហ៊ីង ធីឫទ្ធី ក៏បានបញ្ជាក់ផងដែរថា ប្រសិនបើរកឃើញថា មានកំហុសឆ្គង សូមរួសរាន់ដាក់ពាក្យបណ្តឹងទៅកាន់ក្រុមប្រឹក្សាឃុំ-សង្កាត់ ដែលបងប្អូនបានចុះឈ្មោះយ៉ាងយូរត្រឹមថ្ងៃទី២៣ ខែមករា ឆ្នាំ២០២៣ នេះ។
សូមបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ នៅតាមឃុំ-សង្កាត់ បានបញ្ចប់ជាស្ថាពរ ដោយជោគជ័យទោះបីជាមានបញ្ហាគ្រោះធម្មជាតិមួយចំនួន និងស្ថិតនៅក្នុងបរិបទ នៃជំងឺកូវីដ-១៩ ក៏ដោយនោះ។ យ៉ាងណាក៏ដោយការចុះឈ្មោះបោះឆ្នោតតាមឃុំ-សង្កាត់ត្រូវបានបញ្ចប់ក៏ពិតមែន ក៏ប៉ុន្តែដំណើរការនៃការរៀបចំបញ្ជីបោះឆ្នោត ឆ្នាំ២០២២ មិនទាន់បញ្ចប់នៅឡើយទេ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
