ភ្នំពេញ៖ ប្រទេសន័រវែស តាមរយៈអង្គការជំនួយ នៃប្រជាពលរដ្ឋន័រវែស (NPA) បានផ្ដល់ជំនួយ ដល់អាជ្ញាធរមីន​ប្រមាណជិត ២០​ម៉ឺន​ដុល្លារអាមេរិក ដើម្បីអភិវឌ្ឍសមត្ថភាព​ក្នុង​សកម្ម ភាព​មីន​នៅ​កម្ពុជា ។

ក្នុងពិធីចុះអនុស្សារណៈ​យោគយល់គ្នា លើគ​ម្រោងអភិវឌ្ឍន៍សមត្ថភាព ក្នុងសកម្មភាពមីន រវាង​អាជ្ញាធរ​មីន​ និងអង្គការ NPA នៅថ្ងៃទី១២ ខែមករា ឆ្នាំ២០២២ ឯកឧត្តមទេសរដ្ឋមន្ត្រី លី ធុជ អនុ​ប្រធានទី១ អាជ្ញាធរមីន មានប្រសាសន៍ថា MOU នេះគ្រប​ដណ្តប់​លើ​ការ​អនុវត្ត​សកម្មភាព​ធំ​ៗ​ចំនួន​៣៖ ទី១. សមត្ថភាពរបស់អង្គភាពទិន្នន័យ, ២. សមត្ថភាព​របស់​ក្រុម​ត្រួត​ពិនិត្យ​គុណភាព និងទី៣. សមត្ថភាពលើការរៀបចំផែនការយុទ្ធសាស្រ្ត ។

ឯក​ឧត្តម ទេសរដ្ឋមន្ត្រីបន្តថា គម្រោងនេះ នឹងជួយជំរុញបង្កើនប្រសិទ្ធភាពការងារ និង​លើក​កម្ពស់​កិត្យា​នុភាព របស់ស្ថាប័នអាជ្ញាធរមីន ដែលជាសេនាធិការឱ្យរាជរដ្ឋាភិបាលកម្ពុជា ក្នុង​ការ​ដឹកនាំ​ គ្រប់គ្រង ត្រួតពិនិត្យ និងសម្របសម្រួលសកម្មភាពមីននៅកម្ពុជា ហើយ សូម​ថ្លែង​អំណរ​គុណ​ចំពោះ NPA សម្រាប់ការគាំទ្រដល់គម្រោងនេះ ។

ជាមួយនេះ ឯកឧត្តម លី ធុជ បានចាត់ទុក​អង្គការ NPA គឺជាដៃគូយុទ្ធសាស្ត្រ និង​យូរ​អង្វែង​គាំទ្រ​ដល់​សមត្ថភាព​ចាំបាច់ របស់អាជ្ញាធរមីន ចាប់តាំងពីឆ្នាំ២០១៤ ការគាំទ្រនេះ អាច​ធ្វើ​ទៅ​បាន​តាម​រយៈ​ការគាំទ្រផ្នែកហិរញ្ញវត្ថុដ៏សប្បុរស របស់រដ្ឋាភិបាលនៃចក្រភពអង់គ្លេស-បរទេស Commonwealth & Development ការិយាល័យ (FCDO) និងក្រសួងការបរទេសន័រវែស (NMFA) តាមរយៈអង្គការ NPA Cambodia ក្នុងគោលបំណងធានាថា អាជ្ញាធរមីន មាន​សមត្ថភាព និងរឹងមាំក្នុងការគ្រប់គ្រង និងសម្របសម្រួលសកម្មភាពមីននៅកម្ពុជា ប្រកប​ដោយ​ប្រសិទ្ធ​ភាព​។

ឯកឧត្តមទេសរដ្ឋមន្រ្តី បានកោតសរសើរយ៉ាងខ្លាំង ចំពោះការប្តេជ្ញាចិត្ត របស់អង្គការ NPA ក្នុង​ការ​បន្ត​ខិតខំ​ធ្វើ​ឱ្យ​ប្រទេស​កម្ពុជាគ្មានមីន នៅឆ្នាំ២០២៥ និង​កាត់​បន្ថយ​ផល​ប៉ះពាល់ នៃ​គ្រាប់​បែក​ចង្កោម និងសំណល់ជាតិផ្ទុះផ្សេងទៀតនៃសង្គ្រាម ។ ការប្តេជ្ញាចិត្តនេះ ស្រប​ទៅ​នឹង​កិច្ច​ខិតខំ​ប្រឹង​ប្រែង​របស់​រាជ​រដ្ឋាភិបាលកម្ពុជា សម្រាប់ការងារបោសសម្អាតមីន ឲ្យអស់ពីកម្ពុជា ឆ្នាំ​២០២៥ ដូចដែលបានបញ្ជាក់ជាថ្មីដោយសម្តេចតេជោនាយករដ្ឋមន្ត្រីនាពេលថ្មីៗនេះ ៕ អត្ថបទ បាន សុខរិទ្ធិ