ភ្នំពេញ៖ បច្ចុប្បន្នកម្ពុជា នៅមានផ្ទៃដីចម្ការមីន ចំនួន៦៤៨គីឡូម៉ែត្រក្រឡាទៀត ដែល​ត្រូវបោសសម្អាត ឲ្យសម្រេចតាមផែនការកម្ពុជាគ្មានមីន នៅឆ្នាំ២០២៥ ។ កងកម្លាំង​មួកខៀវ នឹងចូលរួមជាមួយប្រតិបត្តិករផ្សេងៗទៀត អនុវត្តការបោសសម្អាត​ចម្ការមីន​ឲ្យទាន់តាមផែនការ បើទោះជាជួបឧបសគ្គខ្លះៗក្ដី ។

ឧត្តមសេនីយ៍ទោ សែម រតនា អគ្គនាយករងមជ្ឈមណ្ឌលជាតិរក្សាសន្តិភាព ​និងជាប្រធាន​ប្រតិបត្តិករ​បោសសម្អាតមីន ​បានឱ្យដឹងថា មានឧបសគ្គធំៗ ក្នុងប្រតិបត្តិការបោស​សម្អាតមីន ក្នុងនោះមាន ​បញ្ហាព្រៃក្រាស់​ បញ្ហារដូវវស្សាមានភ្លៀងធ្លាក់ច្រើន ​បានបង្អាក់ពេលវេលា ក្នុងការ​អនុវត្តការងារ ភូមិសាស្ត្រតំបន់អូរ​ និងចម្ការនៅលើភ្នំជាដើម ។

ឧត្តមសេនីយ៍ទោ បានបញ្ជាក់ថា ទោះជួបបញ្ហាឧបសគ្គទាំងអស់នេះ​ ប៉ុន្តែកងកម្លាំងបោសសម្អាត មានវិធីសាស្ត្រក្នុងការដោះស្រាយ ​ហើយអនុវត្តទៅដោយរលូន ​ហើយកម្លាំងមួកខៀវ នឹងខិតខំ​ប្រឹងប្រែង ធ្វើឲ្យទាន់សម្រេចតាមផែនការ ។

ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានបញ្ជាក់ថា ដើម្បីឆ្លើយតបនឹង​ការ​ពន្លឿនការបោសសម្អាតមីន ឲ្យកើនទ្វេដង គឺ​ចាប់ពីឆ្នាំ២០២៣ អាជ្ញាធរមីន បានបង្កើនកម្លាំងបោស​សម្អាត រួមទាំងបំពាក់នូវសម្ភារទំនើបៗ និងថ្មីៗដល់ប្រតិបត្តិករទាំងអស់ ។

គួរបញ្ជាក់ជា ដើម្បីអនុវត្តការងារបោសសម្អាតមីនឲ្យទាន់តាមផែនការនេះ ​សម្ដេចតេជោ ហ៊ុន សែន នាយករដ្ឋមន្ត្រី ​នៃកម្ពុជា ​បានបញ្ចេញនូវថវិកាសន្សំប្រមាណ ៣០លានដុល្លារ​ រួមទាំងអំពាវនាវដល់ ដៃគូអន្តរជាតិ ​និងសប្បុរសជននានា ​ផ្ដល់ជំនួយសម្ភារ ឬថវិកា ​ដើម្បីអនុវត្តការងារនេះផងដែរ ៕អត្ថបទ៖ បាន សុខរិទ្ធិ