ភ្នំពេញ៖ ក្រសួងសង្គមកិច្ច ​អតីតយុទ្ធជន ​និងយុវនីតិសម្បទា ​ជាក្រសួង​សាមី​ទទួលខុសត្រូវ​ក្នុងការ​បើកសាច់ប្រាក់​រាល់កម្មវិធីជំនួយសង្គម ​បានព្រមានដល់​មន្រ្តី ​ក៏ដូច​ជា​ភ្នាក់ងារវីងទាំងអស់​មិនត្រូវ​ប្រព្រឹត្តិខុសជាដាច់ខាត​ ដែល​អាច​ឈាន​ដល់ការដាក់ពន្ធនាគារ ​ហើយករណីនេះ ធ្លាប់បាន​បញ្ជូន​អ្នក​ប្រព្រឹត្តិខុសទៅតុលាការរួចមកហើយ។

ខណៈមានភាពមិនប្រក្រតីធ្លាប់កើតមានឡើងក្នុងការបើកសាច់ប្រាក់ជូនប្រជាពលរដ្ឋ ឯកឧត្តម ឈួរ សុបញ្ញា ​ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមូលនិធិជាតិ​ជំនួយសង្គម នៃក្រសួង​សង្គមកិច្ច​ បានព្រមានពីទោសទណ្ឌតាមផ្លូវច្បាប់ ​ចំពោះមន្រ្តីអនុវត្តកម្មវិធី ​និងភ្នាក់ងារវីងទាំងអស់។ មន្រ្តី​អនុវត្តកម្មវិធី​ ដែលប្រព្រឹត្តិខុសមានការ​កឹបកេង​ថវិកា​ជាដើមនោះ ​គឺគ្មានការលើកលែង​នោះទេ​។ ច្បាប់​មានកំណត់ទាំងការសងសំណង ​និងទទួលទោសព្រហ្មទណ្ឌដោយអាចជាប់​ពន្ធនាគារ​រហូត​ចំនួន ៥ឆ្នាំ។

ឯកឧត្តម ឈួរ សុបញ្ញា បញ្ជាក់បន្ថែមថា ចំពោះភ្នាក់ងារវីង ​ដែលជាដៃគូជាមួយរាជរដ្ឋាភិបាល ទទួលខុស​ត្រូវក្នុង​ការ​បើកសាច់​ប្រាក់​ជូន​ពលរដ្ឋសម្រាប់កម្មវិធីជំនួយ​សង្គមដែលបាននឹង​កំពុង​អនុវត្តទាំងនេះ ​ក៏ត្រូវប្រឈមផ្លូវច្បាប់ផងដែរ ​បើសិនជារកឃើញថា បាន​កឹបកេង​លុយ​ប្រជាពលរដ្ឋ។ ការព្រមាននេះ ​គឺធ្វើឡើងបន្ទាប់ពីមានមន្រ្តីអនុវត្តកម្មវិធី និងភ្នាក់ងារវីង​មួយចំនួន​ត្រូវបាន​រកឃើញថា បានប្រព្រឹត្តិខុស។

ជាក់ស្ដែងកាលពី អំឡុងខែ វិច្ឆិកា ឆ្នាំ ២០២២ ស្មៀនសង្កាត់តាខ្មៅ ​ក្រុងតាខ្មៅ ​ខេត្តកណ្ដាល ត្រូវបាន​ឃាត់ខ្លួន ពាក់ព័ន្ធនឹងការកឹបកេងលុយប្រជាពលរដ្ឋក្រីក្រក្នុងចំនួនជាង​ ៧០លានរៀល។ ករណីនេះ​ ត្រូវបានបញ្ជូន​ទៅតុលាការដោះស្រាយតាមផ្លូវច្បាប់។

កាលពីថ្ងៃទី ១១ ខែមករា ឆ្នាំ ២០២៣ ​អនុប្រធាននាយកដ្ឋានហិរញ្ញវត្ថុ និងផ្គត់ផ្គង់ នៃក្រសួង​សង្គមកិច្ច ​អតីតយុវជន ​និងយុវនីតិសម្បទា ត្រូវបានឃាត់ខ្លួនបញ្ជូនទៅសាលាដំបូងរាជធានីភ្នំពេញ ដោយរងការចោទចំនួន២ករណី រួមមាន៖ ​បទចោទពីការកេងយកផល ប្រយោជន៍ដោយខុសច្បាប់ និងបទចោទលើករណីសម្អាតប្រាក់ ។

កម្មវិធីជំនួយសង្គមដែលរាជរដ្ឋាភិបាលកម្ពុជា កំពុងអនុវត្តនាពេលនេះ រួមមាន កម្មវិធីឧបត្ថម្ភ​សាច់ប្រាក់​ជួយដល់គ្រួសារក្រីក្រអំឡុងពេលប្រយុទ្ធប្រឆាំងកូវីដ-១៩ ​ដែលអនុវត្តតាំងពីឆ្នាំ ២០២០ មកទល់បច្ចុប្បន្ន។ កម្មវិធីនេះ​បានចំណាយថវិកាប្រមាណ ​៩០០លានដុល្លាររួចមកហើយ។ រាជរដ្ឋាភិបាល​ ក៏បាន​ចំណាយ​ថវិកាជាង ​១៣លានដុល្លារ ក្នុងការបើកសាច់ប្រាក់លើកទី ១ ជួយ​ដល់ប្រជាពលរដ្ឋរងគ្រោះពីបញ្ហាទឹកជំនន់ ​និងពលរដ្ឋដែលរងគ្រោះពីបញ្ហាសម្ពាធអតិផរណា​ផងដែរ ៕ អត្ថបទ៖ គឹមហុក