ភ្នំពេញ៖ វិស័យឯកជនមានការរំពឹងខ្ពស់ នៃការងើបឡើងកាន់តែល្អប្រសើរ នៅក្នុងខ្សែច្រវ៉ាក់​ផលិតកម្ម​ក្នុងស្រុក​ ទាំងដំណើរការផលិត ​និងវេចខ្ចប់ចំណីអាហារ ដែលគាំទ្រដោយការងើបឡើង​នៃវិស័យចរណ៍​ និងបពេលដែលប្រទេសចិនបានបើកប្រទេសទូលាយឡើងវិញ ។

លោកជំទាវ កែវ មុំ ប្រធានសមាគមសហគ្រិនស្រ្តីកម្ពុជា លើកឡើង នៅថ្ងៃទី ១១ ខែមករា ឆ្នាំ ២០២៣ នេះថា ​នៅក្នុងឆ្នាំ ២០២២ កន្លងមកនេះ ​ការប្រកបមុខរបររកស៊ីទទួលទានរបស់សហគ្រិន​ជាស្រ្តី​គឺនៅមានកម្រិតនៅឡើយ នៅក្នុងការផលិត ​និងការលក់ផលិតផលរបស់ខ្លួននៅតាមទីផ្សារ បន្ទាប់ពីវិបត្តិកូវីដ១៩ បានផ្ទុះឡើងជាប់ ៣ឆ្នាំកន្លងមកនេះ។

លោកជំទាវ ក៏បានថ្លែងនូវការសប្បាយចិត្តយ៉ាងខ្លាំង ​និងមានក្តីរំពឹងថា វិស័យសហគ្រាសធុនតូច និងមធ្យម​ ជាពិសេសវិស័យដែលគ្រប់គ្រងដោយស្រ្តី ​និងអាចងើបឡើងល្អប្រសើរវិញ ទាំងនៅក្នុង​ខ្សែច្រវ៉ាក់​ផលិតកម្ម ការវេចខ្ចប់ ​និងការចែកចាយនៅលើទីផ្សារ ដែលជាផ្នែកមួយជួយលើកកម្ពស់​ដល់​សហគ្រិនស្រ្តី ឬស្រ្តីដែលប្រកបអាជីវកម្ម ​មានលទ្ធិភាពពង្រីកមុខរបរ និងការស្វែងរកប្រាក់​ចំណូលកាន់​តែប្រសើរ។

អ្នកជំនាញសេដ្ឋកិច្ច គឺឯកឧត្តមបណ្ឌិត គី សេរីវឌ្ឍន៍ មើលឃើញថា ខណៈដែលវិស័យមួយចំនួន មិនទាន់ងើបល្អប្រសើរឡើងវិញ ​ចំពោះវិស័យ SME, គឺជាវិស័យមួយនឹងអាចពង្រីកខ្លួនបាន​កាន់​តែប្រសើរ និងអាចស្រូបយកកសិផល ពីវិស័យកសិកម្មកាន់តែធំ យកមកកែច្នៃ ​និងវេចខ្ចប់ ហើយ​ទៅថ្ងៃខាងមុខ​ វិស័យនេះនឹងអាចក្លាយទៅជាឧស្សាហកម្មខ្នាតធំ ​សម្រាប់ការផលិត និងផ្គត់ផ្គង់ ប្រសិន​មានការគាំទ្រ ​ការលើកទឹកចិត្ត និងការជំរុញឲ្យវិស័យរឹងមាំ​ ហើយឆាប់ពីឆ្នាំនេះតទៅ SME នឹងមានកំណើនលឿន ​ជាជាងការអភិវឌ្ឍន៍លើវិស័យអចនទ្រព្យ និងសំណង់។

សូមបញ្ជាក់ថា នៅក្នុងរយៈពេល ១១ ខែ ឆ្នាំ ២០២២ បើយោងតាមរបាយការណ៍ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា ​និងនវានុវត្តន៍ ​ទទួលបានការចុះបញ្ជីសហគ្រាសធុនតូច និង​មធ្យម មានចំនួនជាង ១ ពាន់មូលដ្ឋាន​ ក្នុងនោះបើសរុបទាំងអស់ ការចុះបញ្ជីដែលជាប្រភេទ​កម្មន្តសាល ​មានចំនួនជាង ៤៤ ពាន់មូលដ្ឋាន ​ក្នុងនោះ​មានសហគ្រាសបិតទ្វារជិត ៣០០ មូលដ្ឋាន, បើគិតជាទុនវិនិយោគក្នុងវិស័យ SME នេះ ​មានប្រមាណ ៧៧៥​ លានដុល្លារសហរដ្ឋអាមេរិក ដោយ​ទុនវិនិយោគនេះ បានកើនឡើងខ្ពស់ក្នុងឆ្នំា ២០២២ បើធៀបរយៈពេលដូចគ្នាក្នុងឆ្នាំ ២០២១៕អត្ថបទ៖ សុន រ៉ាឌី