ភ្នំពេញ៖ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានអញ្ជើញ​ជួបពិភាក្សាការងារជាមួយប្រតិភូ ការិយាល័យក្រសួងការបរទេសសហរដ្ឋអាមេរិក (The US State Department's Office of the Global AIDS Coordinator, SGAC), នៅព្រឹកថ្ងៃទី១២ ខែមករា ឆ្នាំ២០២៣​នេះ ​នៅសាលប្រជុំអាជ្ញាធរជាតិប្រយុទ្ធនឹងជំងឺអេដស៍ ពិភាក្សាការងារឆ្លើយ​តបមេរោគអេដស៍ និងជំងឺអេដស៍ ។

ក្នុងឱកាសនោះ ឯកឧត្តមទេសរដ្ឋមន្ត្រី បានជម្រាបជូនប្រតិភូ ក្នុងឆន្ទៈមោះមុតឆ្ពោះទៅបញ្ចប់​អេដស៍​ជា​ការ​គំរាមកំហែង​ដល់សុខភាពសាធារណៈនៅឆ្នាំ២០២៥ ​សម្តេចតេជោ នាយករដ្ឋមន្ត្រី បាន​សម្រេចជូនអាជ្ញាធរជាតិប្រយុទ្ធនឹងជំងឺអេដស៍ ​រៀបចំ គោលនយោបាយលុបបំបាត់​ជំងឺអេដស៍​នៅឆ្នាំ២០២៥ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨​ ដោយមាន​សមាសភាព​ពីចូលរួម​ពីក្រសួង ស្ថាប័នពាក់ព័ន្ធ និងអង្គការ UNAIDS ប្រចាំប្រទេសកម្ពុជា ជាទីប្រឹក្សា។

ឯកឧត្តម ទេសរដ្ឋមន្ត្រី អៀង មូលី បានបញ្ជាក់ថា ​កិច្ចការដែលជាអាទិភាពមួយទៀត គឺការកាត់​បន្ថយការឆ្លងថ្មីនៃមេរោគអេដស៍​ ដែលកំពុងកើនឡើងក្នុងចំណោមប្រជាជនគន្លឹះវ័យក្មេង (Young Key Populations) រួមមាន ​ក្រុមបុរសរួមភេទជាមួយបុរស ក្រុមស្ត្រីបំប្លែងភេទ ក្រុមស្រ្តីបម្រើ​ក្នុង​សេវាកំសាន្ត ក្រុមប្រើប្រាស់គ្រឿងញៀន។ រាជរដ្ឋាភិបាល បានបង្កើនថវិកាជារៀងរាល់ឆ្នាំ ដើម្បីឆ្លើយតប​ទៅនឹងការធ្លាក់ចុះនៃថវិកាជំនួយពីខាងក្រៅ ​លើការងារឆ្លើយតបមេរោគអេដស៍ និង​ជំងឺអេដស៍។ ចាប់ពីឆ្នាំ២០២៣-២០២៥ រាជរដ្ឋាភិបាលបានអនុម័តផ្តល់ថវិកាបន្ថែមចំនួន៥លាន​ដុល្លារអាមេរិកក្នុងមួយឆ្នាំ ​សម្រាប់ការងារអេដស៍ ​នៅក្នុងប្រទេសកម្ពុជា៕ អត្ថបទ រដ្ឋា