ព្រះសីហនុ៖ ពិរុទ្ធជន​ក្នុងពន្ធនាការខេត្តព្រះសីហនុ ​នៅថ្ងៃទី១២ ខែមករានេះ បន្តទទួលបានការចាក់វ៉ាក់សាំងបង្ការជំងឺកូវីដ-១៩ ដូសជំរុញទី៥ និងទី៦ ដើម្បីបង្កើនអង់ទីគ័រទប់ទល់នឹងការវាយលុកពីជំងឺកូវីដ-១៩។

មានប្រសាសន៍ប្រាប់អ្នកសារព័ត៌មានក្នុងពេលលោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ​ក្រសួង​សុខាភិបាល និងជាប្រធានគណកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុង​ក្របខណ្ឌទូទាំងប្រទេស (គ.វ.ក.១៩) ចុះពិនិត្យទីតាំង​ចាក់វ៉ាក់សាំង​នៅសាលា​មត្តេយ្យ​ក្រុង​ព្រះសីហនុ ​និងពន្ធនាគារខេត្តព្រះសីហនុ នាថ្ងៃទី១២ខែមករានេះ ​លោកឧត្តមអគានុរក្សថ្នាក់ទី២ ម៉ឺ ឌឿន ប្រធានពន្ធនាគារខេត្តគារខេត្តព្រះសីហនុ ​បានលើកឡើងថា ​បច្ចុប្បន្នជនឃុំឃាំងក្នុង​ពន្ធនាគារ​ជាង ២ពាន់នាក់​ បានទទួលការចាក់វ៉ាក់សាំងដូសជំរុញជាបន្ត ​ជាពិសេសជំរុញទី៥ និងទី៦ ។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជា​ប្រធានគណៈកម្មការ​ចំពោះកិច្ចចាក់វ៉ាក់សាំងបង្ការជំងឺកូវីដ-១៩​ ក្នុងក្របខណ្ឌទូទាំងប្រទេស​ (គ.វ.ក.១៩) បាន​លើកឡើងដែរថា ការចាក់វ៉ាក់សាំងកូវីដនៅប្រទេសកម្ពុជា ​គឺមិន​ប្រកាន់​និន្នាការ​ណា​នោះទេ ពោល​ឱ្យតែប្រជាពលរដ្ឋរស់នៅក្នុងប្រទេសកម្ពុជា ​គឺអាចទទួលបានការចាក់វ៉ា់ក់សាំងបានគ្រប់ៗគ្នា ហើយ​ក្នុងនោះពិរុទ្ធជនក្នុងពន្ធនាគារក៏ទទួលបានការចាក់វ៉ាក់សាំងកូវីដផងដែរ។

ក្រៅពីនេះ ​លោកជំទាវ​បានលើកឡើងពីការយកចិត្តទុករបស់រាជរដ្ឋាភិបាល​ពាក់ព័ន្ធ​នឹង​សុខភាព​ពិរុទ្ធជនក្នុងពន្ធនារគារ ។

បច្ចុប្បន្នការចាក់វ៉ាក់សាំងបង្កាជំងឺកូវីដ-១៩​ ត្រូវបានរាជរដ្ឋាភិបាល ​បន្តចាត់ទុកជាយុទ្ធសាស្រ្ត​ដ៏​សំខាន់មួយ ដើម្បីធានានិរន្តរភាព សេដ្ឋកិច្ច ​និងការរស់នៅជាធម្មតា​ តាមបែបគន្លងថ្មី ជាមួយវត្តមានជំងឺកូវីដ-១៩៕ អត្ថបទ៖ទូច សោភ័ណ