បាល់ទាត់៖ ទីបំផុតក្រុមវិសាខាបានឡើងវគ្គផ្ដាច់ព្រ័ត្រ ពានរង្វាន់សម្ដេចតេជោ ហ៊ុន សែន លើកទី១៤ (ថ្នាក់ជាតិ) ឆ្នាំ២០២០ ដោយត្រូវជួបក្រុមណាហ្គាវើលដ៏ ក្រោយយកឈ្នះខេត្តព្រៃវែងដោយការទាត់បាល់ប៉េណាល់ទីកាត់សេចក្ដី ៩–៨ បន្ទាប់ពីប្រកួត ៩០នាទីស្មើគ្នា ១-១ កាលពីយប់មិញ។ ប៉ុន្តែទោះបីបរាជ័យក្នុងវគ្គពាក់កណ្ដាលផ្ដាច់ព្រ័ត្រក៏ពិតមែន តែព្រៃវែងបានទទួលការកោតសរសើរស្ទើរពីគ្រប់មជ្ឈដ្ឋាន រួមទាំងគ្រូវិសាខាផងដែរ។
ការប្រកួតដ៏តានតឹងនេះ ខេត្តព្រៃវែងគឺជាអ្នករកបានគ្រាប់នាំមុខ ១គ្រាប់មុនដែលធ្វើសម្រេចដោយកីឡាករ វុធ តុលា មុនត្រូវរៀមច្បង កែវ សុខផេង ស៊ុតគ្រាប់តាមស្មើឲ្យវិសាខានៅនាទី៣៧ ហើយលទ្ធផលនេះបានរក្សារហូតចប់ការប្រកួត។ ឈានដល់ការទាត់ប៉េណាល់ទីកាត់សេចក្ដី ក្រុមទាំងពីរទាត់ដល់ទៅ ១០លើកទើបរកឃើញក្រុមឈ្នះ-ចាញ់ ដោយវិសាខាធ្វើបានសម្រេច ៩គ្រាប់ ឯខេត្តព្រៃវែងរកបាន ៨គ្រាប់ប៉ុណ្ណោះ។ ទោះបីមិនអាចបំបែកកំណត់ត្រាឡើងវគ្គផ្ដាច់ព្រ័ត្រក្ដី តែលោក ឡុច សុភា គ្រូបង្វឹកខេត្តព្រៃវែងបានសម្ដែងការពេញចិត្ត ចំពោះកូនក្រុមខ្លួនដែលបានបង្ហាញទម្រង់លេងដ៏ល្អ លើសពីការស្មានក្នុងជំនួបជាមួយក្រុមសិស្សច្បងវិសាខា។ ហើយលោកប្ដេជ្ញាចិត្តនឹងធ្វើឲ្យបានកាន់តែល្អ ក្នុងជំនួបដណ្ដើមចំណាត់ថ្នាក់លេខ៣ ជាមួយក្រុមភ្នំពេញក្រោននាដើមខែក្រោយ។
ដោយឡែកលោក Colum Curtis គ្រូបង្វឹកវិសាខាក៏បានសម្ដែងការពេញចិត្ត ចំពោះការបង្ហាញសមត្ថភាពដ៏អស្ចារ្យរបស់កីឡាករខេត្តព្រៃវែងដែរ ទម្រាំក្រុមខ្លួនអាចយកឈ្នះក្នុងលទ្ធផលដ៏តានតឹងដូច្នេះ។ លើសពីនេះលោករំពឹងថា នឹងរៀបចំក្រុមកាន់តែល្អប្រសើរ ដើម្បីត្រៀមការប្រកួតវគ្គផ្ដាច់ព្រ័ត្រជាមួយក្លិបណាហ្គាវើលដ៏ នាពេលឆាប់ៗខាងមុខ។ គួរបញ្ជាក់ថា ការប្រកួតវគ្គផ្ដាច់ព្រ័ត្រពានរង្វាន់សម្ដេចតេជោ ហ៊ុន សែន ថ្នាក់ជាតិឆ្នាំ២០២០ គ្រោងនឹងធ្វើឡើងនាថ្ងៃទី៧ ខែវិច្ឆិកាខាងមុខនៅពហុកីឡដ្ឋានជាតិ ដោយវិសាខាត្រូវជួបណាហ្គាវើលដ៏ ដើម្បីដណ្ដើមជើងឯក។ ប៉ុន្តែមុនឈានដល់ការប្រកួតវគ្គផ្ដាច់ព្រ័ត្រ ក៏មានការប្រកួតដណ្ដើមចំណាត់ថ្នាក់លេខ៣ រវាងភ្នំពេញក្រោន និងខេត្តព្រៃវែងនារសៀលថ្ងៃជាមួយគ្នានេះផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
