ភ្នំពេញ៖ ឯកឧត្តម ផៃ ស៊ីផាន រដ្ឋមន្រ្ដីប្រតិភូអមនាយករដ្ឋមន្រ្ដី និងជាប្រធានអង្គភាពអ្នកនាំពាក្យរាជរដ្ឋាភិបាល បាន​សូម​ណូមពរដល់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ពិចារ​ណារៀបចំគោល​ការណ៍​ជាក់លាក់មួយ ដើម្បីធានាបាននូវកិច្ចសហការរវាង មន្ទីរអង្គភាពជំនាញជុំវិញខេត្ត ជាមួយ​និងមន្ទីរព័ត៌មាន ជា​ពិសេស​អភិបាលរង ទទួលបន្ទុកអ្នកនាំពាក្យជួយរៀបចំវេទិកាសន្ទនាមតិ ឆ្លើយ​ឆ្លង​ជាមួយ​ប្រជាពលរដ្ឋនៅតាម​មូល​ដ្ឋាន ឃុំ-សង្កាត់ ឱ្យបានផុលផុស។

ឯកឧត្ដម ផៃ ស៊ីផាន បានសូមណូមពរបែបនេះ ក្នុងពេលបូកសរុបលទ្ធផលកិច្ចប្រជុំពិភាក្សា និងផ្សព្វផ្សាយ ស្ដីពី «យុទ្ធសាស្រ្តនយោបាយព័ត៌មាន» នាថ្ងៃទី១២ ខែមករា ឆ្នាំ២០២៣នេះ នៅទីស្ដីការក្រសួងមហាផ្ទៃ។

ឯកឧត្ដមថ្លែងថា៖ «ខ្ញុំបាទ សូមសំណូមពរដល់សម្តេចក្រឡាហោម ឧបនាយករដ្ឋមន្រ្តី រដ្ឋមន្រ្តីក្រសួង ក៏ដូចជា​ឯកឧត្តម លោកជំទាវ លោក លោកស្រី ជាអ្នកនាំពាក្យថ្នាក់ជាតិ (ជាថ្នាក់ដឹកនាំ ជិតស្និទ្ធនឹងរដ្ឋមន្រ្ដីក្រសួងសាម៉ី) មេត្តា​ពិចារណារៀបចំគោលការណ៍ជាក់លាក់មួយ ដើម្បីធានាបាននូវកិច្ចសហការរវាង មន្ទីរអង្គភាពជំនាញជុំវិញខេត្ត ជាមួយ​និងមន្ទីរព័ត៌មាន ជាពិសេសអភិបាលរង ទទួលបន្ទុកអ្នកនាំពាក្យ ជួយរៀបចំវេទិកាសន្ទនាមតិ ឆ្លើយ​ឆ្លង​ជាមួយ​ប្រជាពលរដ្ឋនៅតាមមូលដ្ឋាន ឃុំ-សង្កាត់ ឱ្យបានផុលផុស។

ឯកឧត្ដម បានបន្តថា ការធ្វើវេទិកាបែបនេះ ដើម្បីឈានទៅសម្រេចបាននូវការដឹង ការយល់ និងការចូលរួមរបស់​ប្រជាពល​រដ្ឋ ក្នុងកិច្ចថែរក្សា ការពារប្រកបដោយសាមគ្គីភាព ឯកភាព យ៉ាងជិតស្និតរវាងរាស្រ្ត និងរដ្ឋ (ស្របតាម​ស្នូល​ទី១ នៃយុទ្ធសាស្រ្តចតុកោណ ស្តីពីការបង្កើនល្បឿនកែទម្រង់ អភិបាលកិច្ច)៕