ភ្នំពេញ៖ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានទទួលអង្ករចំនួន ៥តោន ដែលជាអំណោយរបស់លោក លី ដូនី នាយកក្រុមហ៊ុន ភីអេចវីស៊ីធី អេ ២៨៨៨ ឯក (PHVCT A2888 Co., Ltd) និងលោកស្រី លី ហួរ ដើម្បីទុកសម្រាប់ចែក​ជូនដល់បងប្អូនប្រជាពលរដ្ឋ ក្នុងមូលដ្ឋានភូមិឃុំ ស្រុកកោះសូទិន ខេត្តកំពង់ចាម។

ឯកឧត្តមរដ្ឋមន្រ្តីក្រសួងព័ត៌មាន បានចាត់ទុកថា ការផ្តល់អង្កររបស់ក្រុមហ៊ុននៅពេលនេះ ពិតជាមានតម្លៃ និងឆ្លើយតបបាន​ទាន់​ពេលវេលា សម្រាប់យកទៅចែកជូនដល់ប្រជាពលរដ្ឋ ដែលមានជីវភាពខ្វះខាតតាមមូលដ្ឋាន តាមភូមិឃុំក្នុងស្រុកកោះសូទិន ខេត្តកំពង់ចាម ដែលលោកជាប្រធានក្រុមការងារគណបក្សប្រជាជនចុះជួយទីនោះ ដូច្នេះអំណោយទាំងអស់នេះ គឺពិតជា​ទាន់​ពេលវេលា ក្នុងការជួយប្រជាពលរដ្ឋ។

លោក លី ដូនី បានជម្រាបជូនថា ដោយមើលឃើញពីសកម្មភាពការងារមនុស្សធម៌របស់ឯកឧត្តម រដ្ឋមន្រ្តី ខៀវ កាញារីទ្ធ និង​លោកជំទាវ ដែលជានិច្ចកាលតែងតែនាំយកនូវអំណោយជាស្បៀងអាហារ សំភារៈបរិក្ខា និងថវិកា ចែកជូនដល់​បងប្អូន​ប្រជាពលរដ្ឋក្រីក្រ និងកុមារកំព្រា កុមារពិការ គ ថ្លង់ ជាច្រើនកន្លែង ទើបក្រុមហ៊ុនរបស់លោក បាននាំយកអង្ករចំនួន ៥តោន មកចូលរួមក្នុងសកម្មភាពការងារមនុស្សធម៍។

នាយកក្រុមហ៊ុនបានលើកឡើងថា នេះជាការចូលរួមចំណែករបស់ក្រុមហ៊ុន សម្រាប់ជួយ​ដល់ប្រជាពលរដ្ឋតាម​មូលដ្ឋាន​តាមរយៈ​ ឯកឧត្តមរដ្ឋមន្រ្តី ពីព្រោះថាសព្វថ្ងៃនេះ ប្រទេសកម្ពុជា​ក្រោមការដឹកនាំ​របស់គណបក្សប្រជាជនកម្ពុជា និងរាជរដ្ឋាភិបាល ដែលមាន​សម្តេចតេជោ ហ៊ុន សែន ជាប្រមុខ បានធ្វើឲ្យសង្គមជាតិមានសុខសន្តិភាព និងការអភិវឌ្ឍន៍ ហើយបើកឱកាស​ឲ្យអ្នក​វិនិយោគគិន និង​ក្រុមហ៊ុននានាអាចរកស៊ីបាន។ ហេតុដូច្នេះហើយ ក្រោយទទួលបានការចំណេញមួយផ្នែកណានោះ ក្រុមហ៊ុន​ក៏​បាន​មើលឃើញ​ពីការបរិច្ចាគធនធានរបស់ខ្លួន ជួយដល់រាជរដ្ឋាភិបាលវិញ សម្រាប់យកទៅចែក​ជូនបន្តដល់​ប្រជាពលរដ្ឋ​របស់យើង​នៅតាម​មូល​ដ្ឋាន​។​​

លោកប្រធានក្រុមហ៊ុន បានជម្រាបជូនពីសកម្មភាពការងារអាជីវកម្មរបស់ ភីអេចវីស៊ីធី ដែលបាន​បង្កើតឡើ​ងដោយ​ស្របច្បា​ប់​នៅក្នុងប្រទេសកម្ពុជា រយៈពេលជិត ២ឆ្នាំមកហើយ តាមរយៈការផ្តល់អាជ្ញាបណ្ណ ៥ឆ្នាំ ហើយដំណើរការ​អាជីវកម្ម​បាន​ធ្វើការ​បង់ពន្ធត្រឹមត្រូវ និងមានចំណូលចូលរដ្ឋ៕