ភ្នំពេញ៖ ត្រីរាជដែលកំពុងរងគ្រោះជិតផុតពូជចំនួន ២ក្បាល រួមជាមួយត្រីគល់រាំង និងត្រីប្រាធំ ប្រមាណ ៥ពាន់ក្បាល នឹងត្រូវព្រលែងនៅចំណុចប្រសព្វ នៃទន្លេសាប និងទន្លេមេគង្គ នៅ​ថ្ងៃ​ទី​១៣ ខែមករា ឆ្នាំ២០២៣នេះ។

កម្មវិធីនេះ មានការអញ្ជើញ​ជាអធិបតីពីឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខា​ប្រមាញ់ និងនេសាទ, លោកស្រី ហាញ់ ង្វៀន នាយិកា​ស្តីទី​នៃ​ទីភ្នាក់ងារ​សហរដ្ឋ​អាមេរិក​ សម្រាប់​ការ​អភិវឌ្ឍអន្តរជាតិ និងលោកបណ្ឌិត ហ្សេប ហូហ្គេន ប្រធាន​ដឹក​នាំ​គម្រោង​អច្ឆរិយ​ភាព​នៃ​ទន្លេ​មេគង្គ ដែលផ្តល់មូលនិធិដោយ USAID។

តាមរយៈការរៀបចំកម្មវិធីថ្ងៃនេះដែរ ក្រុមអ្នកវិទ្យាសាស្ត្រសង្ឃឹមថា ការណ៍​នេះ​នឹង​នាំ​ឱ្យ​មាន​សកម្មភាព អភិរក្សរួមគ្នា និងសម្របសម្រួលបន្ថែមទៀត រួមទាំងការផ្សព្វផ្សាយកាន់តែផុសផុល ដល់​​សហគមន៍ដែលរស់នៅតាមដងទន្លេសាប និងទន្លេមេគង្គ ខណៈ​ស្ថានភាព​គួរ​ឱ្យ​បារម្ភ​នៃ​ប្រភេទ​សត្វ​ជិត​ផុត​ពូជត្រីទាំងនេះ បានថយចុះរហូតដល់ ៩៩ភាគរយ ក្នុង​រយៈ​ពេល​ប៉ុន្មាន​ទសវត្សរ៍​ចុង​ក្រោយ។