ត្បូងឃ្មុំ៖ នៅថ្ងៃទី១៣ ខែមករា ឆ្នាំ២០២៣ ឯកឧត្តម វេង សាខុន រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានក្រុមការងារថ្នាក់កណ្តាលចុះមូលដ្ឋានស្រុកតំបែរ ខេត្តត្បូងឃ្មុំ បានអញ្ជើញ​ជួប​សំណេះសំណាល​ជាមួយ លោកគ្រូ អ្នកគ្រូ សិស្សានុសិស្សដែលប្រលងជាប់សញ្ញាបត្រ​មធ្យមសិក្សាទុតិយភូមិឆ្នាំ២០២១-២០២២ នៅស្រុកតំបែរ ខេត្តត្បូងឃ្មុំ និងមានការចូលរួម​ពីតំណាងរដ្ឋបាលខេត្ត ស្រុក និងឃុំ សរុបប្រមាណ ជាង៥០០នាក់។

ក្នុងឱកាសនោះ ឯកឧត្តមរដ្ឋមន្រ្តីប្រតិភូ បានអបអរសាទរដល់សិស្សានុសិស្ស ដែលបានទទួល​ជ័យលាភី​ប្រលងជាប់សញ្ញាប័ត្រមធ្យមសិក្សាទុតិយភូមិឆ្នាំ២០២១-២០២២ ។ ឯកឧត្តម បានថ្លែងអំណរគុណដល់លោកគ្រូ និងអ្នកគ្រូ ដែលបានខិតខំបំពេញភារកិច្ចខ្លួនក្នុងការងារអប់រំ។

ឯកឧត្តម វេង សាខុន មាន​ប្រសាសន៍​ផ្ដាំផ្ញើ​ដល់​សិស្សានុសិស្សជំនាន់ក្រោយបន្តវេន​ ក្នុងការ​រក្សា​សុខសន្តិភាព និងចូលរួមក្នុងការអភិវឌ្ឍសេដ្ឋកិច្ចជាតិអោយមានភាពរីកចំរើន។ ត្រូវសិក្សាស្វែង​យល់​ពីទស្សនវិស័យរបស់ខ្លួន ដើម្បីសម្រេចចិត្តអោយច្បាស់ក្នុងការចាប់យកមុខវិជ្ជា និងជំនាញ​ទៅតាមលទ្ធភាពរបស់ខ្លួនក្នុងដំណាក់កាលបន្ត។​ ត្រូវរៀនធ្វើការជាលក្ខណៈ​សមូហភាព ហើយ​មានការទទួលខុសត្រូវ។ ព្យាយាមអាន​ និងស្រាវជ្រាវពីឯកសារពាក់ព័ន្ធនានា​អោយ​បាន​ច្រើន​ដែលជួយបង្កើនចំណេះដឹងដល់ការសិក្សា។ ​គួរឧស្សាហ៍តាមដានពីការវិវត្តសេដ្ឋកិច្ច និងនិន្នការថ្មីៗ ដែលផ្តល់ឱកាសថ្មីៗ​បន្ថែមទៀតដល់ខ្លួនឯង។ ត្រូវចេះស្វែងយល់ពីការពិតនូវរាល់​ហេតុការណ៍​ដែលបានជួបប្រទះ​ ជៀសវាងធ្វើការសន្និដ្ឋានដោយមិនបានគិតពិចារណាគ្រប់ជ្រុងជ្រោយ ដែល​ជាហេតុធ្វើអោយមានការសម្រេចចិត្តខុស។ ព្យាយាមសម្របខ្លួនទៅតាមស្ថានភាព ជាពិសេស​នៅអំឡុងពេលសិក្សាបន្ត ក៏ដូចជាពេលចូលបំពេញការងារនៅពេលខាងមុខ។

ឯកឧត្តម បានណែនាំ​ដល់​ក្មួយៗ​សិស្សានុសិស្សខិតខំរៀនសូត្រ ​យកចិត្តដាក់ និងរៀបចំខ្លួន​អោយល្អ​ ដើម្បីក្លាយខ្លួនជាទំពាំងស្នងឬស្សី ​ព្រមទាំង​លើក​កិត្តិយស​ជូនក្រុមគ្រួសារ និង​ប្រទេសជាតិ។

ជាមួយនឹងការអបអរសាទរនេះ ឯកឧត្តមរដ្ឋមន្រ្តីប្រតិភូ និងក្រុមការងារបាននាំយកនូវថវិកា ឧបត្ថម្ភជូនចំពោះ មន្រ្តីការិយាល័យអប់រំស្រុក លោកនាយក នាយករង លោកគ្រូ អ្នកគ្រូ សិស្សានុសិស្សដែលប្រលងជាប់ អាជ្ញាធរឃុំនិងស្រុកដែលបានចូលរួម សរុបចំនួន ៥១,៩លានរៀល៕