ភ្នំពេញ៖ អ្នកសិក្សាស្រាវជ្រាវពីប្រវត្តិសាស្ត្រទំនាក់ទំនងរវាងប្រទេសកម្ពុជា និងប្រទេសចិន បាន រៀបចំធ្វើបាឋកថា ដើម្បីចែករំលែកនៃការឈ្វេងយល់ពីទំនាក់ទំនង នៃប្រទេសទាំងពីរ ទៅដល់ សាស្ត្រាចារ្យ និងសិស្សនិស្សិត នៅសាកលវិទ្យាល័យមេគង្គកម្ពុជា ក៏ដើម្បីស្វាគមន៍ទេសចរណ៍​ចិនផងដែរ ។

ក្នុងសិក្ខាសាលាបាឋកថា ក្រោមប្រធានបទ “រួមរស់តាមបណ្ដោយទន្លេតែមួយ រួមគ្នាសាទរឆ្នាំថ្មី​ប្រពៃណីចិន” នៅល្ងាចថ្ងៃទី១២​ ខែមករា ឆ្នាំ២០២២​ លោកបណ្ឌិត ជា មុនីឫទ្ធិ ប្រធានសមាគម​អ្នក​ស្រាវជ្រាវវឌ្ឍនភាពកម្ពុជាចិន​ បានថ្លែងថា កម្មវិធីនេះធ្វើឡើង ​មានគោលបំណងចំនួន៣ គឺទី១. ការឈ្វេងយល់ពីទំនាក់ទំនងដ៏ល្អរវាងកម្ពុជា-ចិន, ទី២. ការផ្តល់នូវពុទ្ធិបទពិសោធន៍ ទាក់ទងទៅ​នឹង​ពិធីបុណ្យចូលឆ្នាំប្រពៃណីចិន និងទី៣. ចែករំលែក ​និងការប្រមូលផ្តំធាតុចូល ពីនិស្សិតសាកល​វិទ្យាល័យ​មេគង្គកម្ពុជា ក្នុងការយល់ដឹងពីប្រទេសចិន ។

ក្នុងពេលចូលរួមស្ដាប់នូវបាឋកថា​ ក្រុមនិស្សិត ​បានបង្ហាញការគាំទ្រ និងវាយតម្លៃខ្ពស់​ចំពោះ​ទំនាក់ទំនងប្រពៃណីកម្ពុជា និងចិន ​តាំងពីអតីតកាល រហូតមកដល់បច្ចុប្បន្ននេះ ដោយបឋាកថា​នេះ ធ្វើឲ្យពួកគេទទួលបាននូវចំណេះដឹងថ្មីៗបន្ថែមទៀត ​នៃទំនាក់ទំនងរវាងប្រទេសទាំងពីរ ហើយ​ក៏ស្វាគមន៍ផងដែរ ​នូវដំណើរកម្សាន្តរបស់ភ្ញៀវទេសចរណ៍ចិនមកកាន់កម្ពុជា ។

គួរបញ្ជាក់ថា បាឋកថានេះ ​រៀបចំឡើងដោយវិទ្យុមិត្តភាពកម្ពុជា-ចិន​ សហការជាមួយ សាកល​វិទ្យាល័យមេគង្គកម្ពុជា ​និងសមាគមអ្នកស្រាវជ្រាវវឌ្ឍនភាពកម្ពុជា-ចិន​ ដោយអ្នកចូលរួម ក៏បាន​រៀបចំពិធីអបអរបុណ្យចូលឆ្នាំថ្មី ប្រពៃណីចិនផងដែរ ៕អត្ថបទ៖ បាន សុខរិទ្ធិ