​ភ្នំពេញ៖ ឯកឧត្តម សាស្ត្រាចារ្យ លូ លីឃាង នាយកមន្ទីរពេទ្យព្រះអង្គឌួង នៃក្រសួងសុខាភិបាល ព្រះរាជាណាចក្រកម្ពុជា ​បានអនុញ្ញាតជូនឯកឧត្តម Park Byeong-Seug អតីតប្រធានរដ្ឋសភា រួមនឹងប្រតិភូ​ នៃសាធារណរដ្ឋកូរ៉េ ដើម្បីជួបពិភាក្សាការងារ ​និងចុះពិនិត្យទីតាំងនៃមជ្ឈមណ្ឌល "ការកសាងសមត្ថភាពត្រចៀក ច្រមុះ បំពង់ក (ENT) មន្ទីរពេទ្យព្រះអង្គឌួង" នាថ្ងៃទី១២ ខែមករា ឆ្នាំ២០២៣។

សូមបញ្ជាក់ផងដែរថា ប្រតិភូ អតីតប្រធានរដ្ឋសភា ឯកឧត្តម Park Byeong-Seug និងអមដំណើរ​ដោយសមាជិកសភាជាតិនៃសាធារណរដ្ឋកូរ៉េចំនួនបីរូប មកបំពេញទស្សនកិច្ចនៅទីក្រុងភ្នំពេញ ដើម្បីទស្សនាការដ្ឋានគម្រោង ODA មួយចំនួនចាប់ពីថ្ងៃទី ១១ ដល់ថ្ងៃទី ១៣ ខែមករា ឆ្នាំ២០២៣ រួមទាំងការចូលជួបសម្តែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

ក្នុងឱកាសនោះ​ ឯកឧត្តម នាយកមន្ទីរពេទ្យព្រះអង្គឌួង បានជម្រាបជូនប្រតិភូអំពីតួនាទីរបស់​មន្ទីរពេទ្យ ​ដែលជាសេនាធិការរបស់ក្រសួងសុខាភិបាល​ ក្នុងការផ្តល់សេវាថែទាំ ព្យាបាល ប្រកបដោយគុណភាព​ ប្រសិទ្ធភាព និងសុវត្ថិភាព ជូនប្រជាពលរដ្ឋទូទាំងប្រទេស។

ពាក់ព័ន្ធនឹងការងារផ្តល់សេវាកម្មសុខាភិបាល ​មន្ទីរពេទ្យព្រះអង្គឌួង គឺអគារជំងឺត្រចៀក​ច្រមុះបំពង់ក​ មិត្តភាពកម្ពុជា-កូរ៉េ ត្រូវបានសាងសង់ដោយ ​កយកា-KOICA ក្រោមជំនួយឥតសំណង​របស់កូរ៉េ ដែលមានតម្លៃសរុបក្នុងគម្រាងទាំងមូល ៨លានដុល្លារអាមេរិក ដោយមានរយៈពេល​អនុវត្តពីឆ្នាំ២០១៨ ​ដល់ឆ្នាំ២០២២។

អគារជំងឺត្រចៀកច្រមុះបំពង់ក មិត្តភាពកម្ពុជា-កូរ៉េ គឺជាអគារថ្មីមានកម្ពស់ប្រាំជាន់ បំពាក់​ដោយ​ឧបករណ៍ទំនើបសម្រាប់ការធ្វើរោគ​វិនិច្ឆ័យ​ ការព្យាបាល ​និងការវះកាត់ ត្រូវបានសាងសង់​នៅ​ក្នុងបរិវេណមន្ទីរពេទ្យព្រះអង្គឌួង ​ដើម្បីជួយកែលម្អសេវាវេជ្ជសាស្រ្តនៅក្នុងមន្ទីរពេទ្យនេះ។

ឯកឧត្តម សាស្ត្រាចារ្យ លូ លីឃាង ក៏សូមថ្លែងនូវការអរគុណ ចំពោះឯកឧត្តម Park Byeong-Seug អតីតប្រធានរដ្ឋសភា រួមនឹងប្រតិភូ នៃសាធារណរដ្ឋកូរ៉េ ក្នុងការខិតខំប្រឹងប្រែងបង្កើត​ឱ្យមាន​កិច្ចសហប្រតិបត្តិការនេះលេចចេញជារូបរាងឡើង​ ដែលពិតជាមានគុណតម្លៃ និងអត្ថប្រយោជន៍​ដ៏ធំធេង សមស្របនឹងបច្ចុប្បន្នភាពនៃការអភិវឌ្ឍន៍របស់មន្ទីរពេទ្យក្រោមការ​យកចិត្តទុកដាក់ខ្ពស់​ពីឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ដើម្បីចូលរួមចំណែកអភិវឌ្ឍន៍​វិស័យសុខាភិបាល​ ស្របតាមគោលនយោបាយរបស់រាជរដ្ឋាភិបាលកម្ពុជា ។

ជាមួយគ្នានោះ​ តំណាងទីភ្នាក់ងារសហប្រតិបត្តិការអន្តរជាតិកូរ៉េ (KOICA) សូមថ្លែងអំណរគុណ​យ៉ាង​ជ្រាលជ្រៅចំពោះឯកឧត្តម នាយកមន្ទីរពេទ្យព្រះអង្គឌួង (PADH) សម្រាប់កិច្ចសហប្រតិបត្តិការ​ជាមួយ KOICA លើគម្រោង "ការកសាងសមត្ថភាពនៃមជ្ឈមណ្ឌលត្រចៀក ច្រមុះ បំពង់ក (ENT) នៅមន្ទីរពេទ្យព្រះអង្គឌួង"៕អត្ថបទ រដ្ឋា