ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានចាត់ទុកវិស័យព័ត៌មានជាវិស័យមួយដ៏សំខាន់ ដើម្បីជួយផ្សព្វផ្សាយពីគោលនយោបាយ សមិទ្ធផលនានា រួមនឹងទុក្ខលំបាករបស់ប្រជាពលរដ្ឋនៅមូលដ្ឋានផងដែរ។

សម្ដេចក្រឡាហោមបានមានប្រសាសន៍បែបនេះ ក្នុងពេលធ្វើជាអធិបតីបិទ កិច្ចប្រជុំផ្សព្វផ្សាយស្ដីពី «យុទ្ធសាស្រ្តនយោបាយព័ត៌មាន» កាលពីល្ងាចថ្ងៃទី ថ្ងៃទី១២ ខែមករា ឆ្នាំ២០២៣នេះ នៅទីស្ដីការក្រសួងមហាផ្ទៃ។

សម្ដចថ្លែងថា ក្រោមការដឹកនាំប្រកយដោយគតិបណ្ឌិត ​របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា បានដាក់ចេញនូវគោលនយោបាយឈ្នះ ឈ្នះ ដែលឱ្យកម្ពុជាទទួលបាននូវស្ថេរភាព ​និងសន្ដិភាពនយោបាយ ឯកភាពជាតិ លើការអភិវឌ្ឍនូវគ្រប់វិស័យ។

សម្ដេចបានលើកទឹកចិត្តឱ្យមានការផ្សព្វផ្សាយឱ្យបានទូលំទូលាយផងដែរ អំពីលទ្ធផលការងារ​ដែលរដ្ឋបាលថ្នាក់​ក្រោមជាតិបានធ្វើជារៀងរាល់ថ្ងៃ ​សូម្បីកិច្ចប្រជុំថ្នាក់រដ្ឋបាលខេត្ត ឬក្រុមប្រឹក្សា​ខេត្ត​ក៏គួរមានការផ្សព្វផ្សាយឱ្យបានផុសផុលផងដែរ។

សម្ដេចក្រឡាហោម​ បានផ្ដល់អនុសាសន៍ដល់រដ្ឋបាលថ្នាក់ក្រោមជាតិ មន្រ្ដីនាំពាក្យ និង​អភិបាលរងខេត្ត ទទួលបន្ទុកឱ្យសកម្មថែមទៀតលើការងារទំនាក់ទំនង និងផ្សព្វផ្សាយ​ព័ត៌មាននេះ។

សម្ដេចក៏បានណែនាំដល់អ្នកនាំពាក្យពង្រឹងកិច្ចសហការគ្នាជាមួយមន្ទីរព័ត៌មាន ធ្វើការផ្សព្វផ្សាយ​ឱ្យបានទូលំទូលាយនូវព័ត័មានសមិទ្ធផលនានា​ ពិសេសនៅថ្នាក់មូលដ្ឋានរបស់ខេត្ត៕អត្ថបទ៖ វ៉ន ដារ៉ា