ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា មានប្រសាសន៍ថា ក្នុងដំណើទស្សនកិច្ចរបស់សម្ដេចទៅប្រទេសចិនក្នុងឱកាសខួប ៦៥ ឆ្នាំនៃទំនាក់ទំនងកម្ពុជាចិន នឹងទទួលបានគម្រោងថ្មីៗបន្ថែមទៀតដែលកម្ពុជាត្រូវពឹងពាក់មិត្តចិត្តសម្រាប់អភិវឌ្ឍន៍កម្ពុជា ជាពិសេសគម្រោងសាងសង់ផ្លូវរថភ្លើងល្បឿនលឿន។

សម្ដេចតេជោ ហ៊ុន សែន បានមានប្រសាសន៍ក្នុងឱកាស អញ្ជើញជួបសំណេះសំណាល និង​ពិសាអាហារសាមគ្គីជាមួយបងប្អូនអ្នកសារព័ត៌មានប៉ុន្មានជិត ៥ ពាន់នាក់ នៅសាល​ពិព័រណ៍កោះពេជ្រ កាលពីថ្ងៃទី១៤ ខែមករា ឆ្នាំ២០២៣នេះ។

សម្ដេចតេជោ មានប្រសាសន៍ថា ដំណើទស្សនកិច្ចរបស់សម្ដេច ទៅប្រទេសចិន នាថ្ងៃទី១០ ខែកុម្ភៈ ឆ្នាំ២០២៣ ខាងមុខ គឺជាខួប ៣ ឆ្នាំនៃពេលវេលាដែលសម្ដេចតេជោទៅបំពេញទស្សនកិច្ច​នៅ​ប្រទេសចិនអំឡុងពេលមានវិបត្តិកូវីដ១៩ និងខួប ៦៥ ឆ្នាំនៃទំនាក់ទំនងកម្ពុជា-ចិន ដែលជា​ប្រវត្តិសាស្រ្ដមួយដ៏សំខាន់។

សម្ដេចតេជោ បានមានប្រសាសន៍ថា កិច្ចព្រមព្រៀងពាណិជ្ជកម្មសេរី កម្ពុជា-ចិន ត្រូវបានចូលជា​ធរមាន ដែលឥឡូវនេះ ការជំរុញពាណិជ្ជកម្មរវាងប្រទេសទាំងពីរធ្វើកាន់តែច្រើន។ កិច្ចសហប្រតិបត្តិការនានា ក៏នឹងត្រូវធ្វើកាន់តែច្រើនផងដែរ។

សម្ដេចតេជោ បញ្ជាក់ថា ទស្សនកិច្ចរបស់សម្ដេចទៅប្រទេសចិននាពេលខាងមុខ នឹង​ទទួល​បានគម្រោងថ្មីៗបន្ថែមទៀត ដែលកម្ពុជាត្រូវពឹងពាក់ជាមួយមិត្តចិន ដើម្បីអភិវឌ្ឍន៍​កម្ពុជា ក្នុងនោះក៏មានការរៀបចំអំពីគម្រោងទាក់ទិនជាមួយនឹងផ្លូវរថភ្លើងល្បឿនលឿនផងដែរ៕