ភ្នំពេញ៖ សហភាពសហព័ន្ធយុវជនកម្ពុជា និង ក្រុមហ៊ុន អ៊ីហ្ស៊ីខម បានចុះអនុស្សរណៈនៃការយោគយល់គ្នា លើកិច្ចសហប្រតិបត្តិការឌីជីថល នៅអគារ The Kampus។ មានវត្តមាននាពិធីនោះរួមមាន ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា អ្នកឧកញ៉ា គិត ម៉េង ប្រធានអគ្គនាយក ក្រុមហ៊ុន រ៉ូយ៉ាល់ គ្រុប ព្រមទាំងគណៈប្រតិភូអញ្ជើញមកពីស្ថាប័នទាំង២, នារសៀលថ្ងៃទី ១៤ ខែមករា ឆ្នាំ២០២៣ ។

ឯកឧត្តម ហ៊ុន ម៉ានី បានថ្លែងអំណរគុណ ដល់ក្រុមហ៊ុន អ៊ីហ្ស៊ីខម ចំពោះកិច្ចសហការជាបន្តបន្ទាប់ រហូតឈានដល់ការចុះអនុស្សរណៈនាពេលនេះ ក្នុងគោលបំណង ចូលរួមលើកទឹកចិត្ត និងគាំទ្រ​យុវជន​អោយចាប់យកជំនាញថ្មីនៃបដិវត្តន៍ឧស្សាហកម្មជំនាន់ទី៤ បច្ចេកវិទ្យា និងការច្នៃប្រឌិត លើកកម្ពស់​ការងារសង្គម ការងារមនុស្សធម៌ និងការងារស្ម័គ្រចិត្ត រួមទាំងចូលរួមជំរុញ​បច្ចេកវិទ្យា​ឌីជីថល ដែលជាផ្នែកមួយយ៉ាងសំខាន់ក្នុងការលើកស្ទួយ និងអភិវឌ្ឍន៍​សេដ្ឋកិច្ចឌីជីថលនៅកម្ពុជា អោយកាន់តែប្រសើរឡើង ដើម្បីឆ្លើយតបទៅនឹងតម្រូវការវិនិយោគ និងតម្រូវការទីផ្សារការងារជាក់​ស្តែង។

ទន្ទឹមនឹងនេះ អ្នកឧកញ៉ា គិត ម៉េង បានសម្តែងនូវសេចក្តីសោមនស្សរីករាយចំពោះកិច្ច​សហប្រតិបត្តិ្កការនេះ និងបាន​ឆ្លុះបញ្ចាំង​ពីចក្ខុវិស័យយ៉ាងរឹងមាំ ក្នុងការចូលរួមជាមួយ ស.ស.យ.ក. ស្របតាម​គោល​ដៅសេដ្ឋកិច្ចឌីជីថលរបស់រាជរដ្ឋាភិបាលក្នុងការរួមចំណែកគាំទ្រ ដល់យុវជនជំនាន់​ក្រោយ ជាពិសេស សមាជិក សមាជិកា ស.ស.យ.ក. អោយមានឱកាសកាន់តែច្រើនបន្ថែមទៀត​ក្នុងការស្វែងយល់អំពីបច្ចេកវិទ្យា វិទ្យាសាស្រ្ត រួមទាំងចូលរួមលើកកម្ពស់សកម្មភាពនានា​ដែលជួយដល់សង្គមជាតិ។

សូមជម្រាបជូនថា អនុស្សរណៈនៃការយោគយល់ រវាង ស.ស.យ.ក. និង អ៊ីហ្ស៊ីខម នេះ នឹងជំរុញ​ដល់​ការផ្តល់ឱកាសយុវជន ក្នុងការអភិវឌ្ឍសមត្ថភាពបន្ថែមទៀត​ជាពិសេសលើបច្ចេកវិទ្យាឌីជីថល និងជំរុញការទាញ​ផលប្រយោជន៍ជាអតិបរមាពីការរីកចម្រើននៃបច្ចេកវិទ្យា និងឌីជីថលូបនីយកម្ម​ក្នុង​បរិការណ៍នៃឧស្សាហកម្ម4.0 នៅកម្ពុជា។ បន្ទាប់ពីពិធីចុះអនុស្សរណៈនៃការយោគយល់គ្នារួចមក ក៏មានពិធីចុះហត្ថលេខា រវាងក្រុមហ៊ុន Telcotech និងអគារ The kampus លើកិច្ចសន្យាជួល (សម្រាប់ការរៀបចំDatabase ) ផងដែរ៕អត្ថបទ រដ្ឋា