ភ្នំពេញ៖ អភិបាលរងខេត្តកោះកុង បង្ហាញការទទួលស្គាល់អំពីគុណភាពអប់រំសិក្សាដល់កុមារ​នៅក្នុងខេត្តតាមរយៈការចូលរួមពង្រឹងបណ្តុះបណ្តាលរបស់សាលាអប់រំសិស្សឆ្នើមកម្ពុជា ដែលអាចធ្វើពួកគេក្លាយជាធនធានមនុស្សដ៏សំខាន់ទៅថ្ងៃមុខ។

ថ្លែងក្នុងពិធីពិធីប្រគល់មេដាយអន្តរជាតិ លិខិតសរសើរ វិញ្ញាបនបត្រ សញ្ញាបត្រជាតិ និងអន្តរជាតិ របស់សាលាអប់រំសិស្សឆ្នើមកម្ពុជា រសៀលថ្ងៃទី១៤ ខែមករា ឆ្នាំ២០២៣ លោកស្រី ឈី វ៉ា អភិបាលរងខេត្តកោះកុង យល់ឃើញថា សាលាអប់រំសិស្សឆ្នើមកម្ពុជា បានប្រឹងប្រែងអភិវឌ្ឍន៍​កម្មវិធីសិក្សា និងពង្រឹងគុណភាពសិក្សាឱ្យដើរទាន់ប្រទេសជឿនលឿន​ក្នុងពិភពលោក និងបានប្រឹងប្រែងដើម្បីឱ្យសិស្សបានចូលរួមប្រឡងថ្នាក់អន្តរជាតិជាច្រើនទាំងក្នុងនិងក្រៅប្រទេស។

លោកស្រីអភិបាលរងខេត្ត ក៏បានទទួលស្គាល់ពីកម្មវិធីគុណភាពអប់រំសិក្សាដល់កុមារ និងយុវជន​នៅក្នុងខេត្តកោះកុង តាមរយៈការរួមចំណែកពង្រឹងបណ្តុះបណ្តាល​របស់សាលា​អប់រំសិស្សឆ្នើម​កម្ពុជា ដែលអាចធ្វើពួកគេក្លាយជាធនធានមនុស្សដ៏សំខាន់មួយ និងមានឱកាសជួយ​ដឹកនាំអភិវឌ្ឍន៍ខេត្តកោះកុងទៅថ្ងៃអនាគត។

លោកស្រី ឈី វ៉ា បង្ហាញក្តីរំពឹងដែរថា សិស្សានុសិស្ស នឹងបន្ត​ក្រេបជញ្ជក់​នូវចំណេះដឹងថ្មីៗនិងទាន់​សម័យ ដែលឱ្យសិស្សអាចមានឱកាសចូលរួមប្រឡង​កម្រិតអន្តរជាតិនានា នៅក្រៅប្រទេសជាមួយ​សិស្សផ្សេងៗ ក្នុងពិភពលោក។ ក្នុងបុព្វហេតុកសាង និងអភិវឌ្បន៍វិស័យអប់រំនៅកម្ពុជា ដើម្បីត្រៀម​ធនធានមនុស្សយើងឱ្យទ្រទ្រង់សេដ្ឋកិច្ចជាតិកម្ពុជា ឱ្យក្លាយជាប្រទេសមានចំណូលមធ្យ​មកម្រិតខ្ពស់ត្រឹមឆ្នាំ២០៣០ និងចំណូលកម្រិតខ្ពស់ត្រឹមឆ្នាំ២០៥០ ស្របតាមចក្ខុវិស័យអភិវឌ្ឍន៍​ជាតិរបស់រាជរដ្ឋាភិបាលកម្ពុជា។

លោក អ៊ូច អានភក្តី ស្ថាបនិកសាលាអប់រំសិស្សឆ្នើមកម្ពុជាប្រចាំខេត្តកោះកុង បានឱ្យដឹងថា សាលារៀន​របស់លោកបានផ្តើមដំណើរជាង៣ឆ្នាំមកហើយ ក្នុងគោលដៅរួមធ្វើយ៉ាងណា​បណ្តុះបណ្តាលការសិក្សា​ដល់សិស្សកម្រិតមតេយ្យរហូតដល់វិទ្យាល័យ។

លោក បន្ថែមទៀតថា លោកមានបំណងចង់ឱ្យសិស្សដែលកំពុងរៀនសូត្រ ក្លាយជាសិស្សឆ្នើម​មានសមត្ថភាពពិតប្រាកដ និងស្តង់ដារគុណភាពអប់រំអន្តរជាតិ ដើម្បីអនាគតដ៏របស់ពួកគេ ទាំងចំណេះដឹងផ្នែកវិទ្យាសាស្រ្តពិត បច្ចេកវិទ្យា វិស្វកម្ម សិល្បៈ និងគណិតវិទ្យា។

ដោយឡែកអាណាព្យាបាលដែលបញ្ជូនកូនមករៀននៅសាលាអប់រំសិស្សឆ្នើមកម្ពុជាប្រចាំខេត្តកោះកុង គាំទ្រពីគុណភាពអប់រំសិក្សារបស់សាលាឯកជនមួយផងដែរ ​ដោយពួកគាត់យល់ថា កូនៗមានសមត្ថភាព និងចំណេះដឹងល្អប្រសើរពិតប្រាកដមែន។

សិស្សនៅសាលាអប់រំសិស្សឆ្នើមកម្ពុជានៅខេត្តកោះកុងសរុបចំនួន៤១នាក់/ស្រី២៣នាក់ បានទទួលមេដាយអន្តរជាតិ លិខិតសរសើរអន្តរជាតិ សញ្ញាបត្រអន្តរជាតិ៕អត្ថបទ៖ ឈឹម មករា