បាត់ដំបង៖ គណៈកម្មាធិការជាតិវាយតម្លៃទីក្រុងស្អាត បានប្រកាសឱ្យដឹងថា ខេត្តបាត់ដំបង​ជាប់ជ័យ​លាភីលេខ១ ក្នុងកម្មវិធីប្រកួត​ប្រជែង "ទីក្រុង​ដែល​មាន​ពិធី​បុណ្យ​ចូល​ឆ្នាំ​សកល​ល្អជា​ង​គេ​ប្រចាំឆ្នាំ២០២២" ខណៈខេត្តព្រះសីហនុជាប់ជ័យលាភីលេខ២ និងសៀមរាបលេខ៣។

គណៈកម្មាធិការជាតិវាយតម្លៃទីក្រុងស្អាត បានបញ្ជាក់បន្ថែមថា ពិ​ធី​ប្រគល់​ពាន​រង្វាន់​នឹង​ប្រព្រឹត្ត​ទៅ​ក្នុង "ពិធីអបអរសាទរទិវាជាតិទីក្រុងស្អាត" នៅថ្ងៃទី២៧ ខែកុម្ភៈ ឆ្នាំ២០២៣ ខាងមុខនេះ។

កម្ម​វិធីប្រកួតប្រជែងទីក្រុងដែលមានពិធីបុណ្យចូលឆ្នាំសាកលល្អជាងគេប្រចាំឆ្នាំ២០២២" (Best Countdown City of The Year 2022) ត្រូវបាន​ប្រកាស​ផ្សព្វ​ផ្សាយ​ជា​ផ្លូវ​ការ​ និង​បើក​ឱ្យ​សាធារណ​ជន​ចូលរួមបោះឆ្នោតគាំទ្រទីក្រុងដែលខ្លួនពេញចិត្តជាងគេបំផុតអស់រយៈពេល២ថ្ងៃ តាមរយៈ​ការបោះឆ្នោតគាំទ្រលើគេហទំព័រផ្លូវការ http://best countdowncity.cambodiacleancity.gov.kh/ ចាប់ពីម៉ោង៥ល្ងាចថ្ងៃទី៣១ ខែធ្នូ ឆ្នាំ ២០២២ រហូត​ដល់​ម៉ោង៥ល្ងាចថ្ងៃទី២ ខែមករា ឆ្នាំ២០២៣។

សូមរំលឹកថា រដ្ឋបាលខេត្តបាត់ដំបង បានរៀបចំព្រឹត្តិការណ៍ដាក់តាំងបង្ហាញមុខម្ហូប និង​បង្អែម​ខ្មែរ​របស់​អ្នក​ខេត្ត​បាត់ដំបងដែលល្បីល្បាញសម្រាប់ស្វាគមន៍ភ្ញៀវទេសចរ និងអបអរសាទរ​ពិធី​បុណ្យ​ចូល​ឆ្នាំថ្មី ឆ្នាំសកល២០២៣។ ក្រៅពីការដាក់តាំងបង្ហាញម្ហូបអាហារ និងបង្អែមខ្មែរ​រដ្ឋ​បាល​ខេត្ត​បាន​តុប​តែងលម្អ រៀបចំភ្លើងពណ៌តាមស្ពាន សួនច្បារ អគារ ទីសាធារណៈនានា ការដាក់​តាំង​ពិព័រណ៍ផលិតផល ការសម្តែងសិល្បៈរបាំប្រពៃណី និងរបាំប្រជាប្រិយ ការ​សម្តែង​សៀក​របស់​អង្គ​ការ​ហ្វាពន្លឺសិល្បៈកម្ពុជា ការប្រគុំតន្ត្រីខ្នាតតូច-ធំ និងការអុជ​កាំ​ជ្រួច​នា​ពេល​រាត្រី​ព្រម​ទាំង​បាន​ពង្រឹង​ការ​ថែ​រក្សា​សន្តិសុខ​សណ្ដាប់​សុវត្ថិភាព ដើម្បី​បង្ក​លក្ខ​ណៈ​សប្បាយ​រីក​រាយ​ជូន​ប្រជា​ពលរដ្ឋ។

ព្រឹត្តិ​ការណ៍ពិព័រណ៍ម្ហូបខ្មែរ និងពិធីបុណ្យឆ្លងឆ្នាំសកលឆ្នាំ២០២២-២០២៣ រយៈពេល២​ថ្ងៃ​ចាប់​ពី ថ្ងៃទី៣០-៣១ ខែធ្នូ ឆ្នាំ២០២២ ខេត្តបាត់ដំបងទទួលបានភ្ញៀវទេសចរប្រមាណ២១ម៉ឺននាក់៕