ភ្នំពេញ៖ មជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) នៅព្រឹកថ្ងៃទី១៦ ខែមករា ឆ្នាំ២០២៣នេះ បានចាប់ផ្តើមបើកវគ្គ​ហ្វឹកហ្វឺន​បច្ចេកវិទ្យាឧបករណ៍បោសសម្អាតមីន ដល់មន្ត្រីជំនាញសកម្មភាពមីនរបស់ប្រទេសអ៊ុយក្រែន ស្ថិតនៅវិទ្យាស្ថានបច្ចេកទេសសកម្មភាពកម្ចាត់មីន ស៊ីម៉ាក់ ក្នុងខេត្តកំពង់ឆ្នាំង។ ពិធីបើកវគ្គហ្វឹកហ្វឺននេះ ​ក្រោមអធិបតីភាពលោក ហេង រតនា ប្រតិភូរាជរដ្ឋាភិបាល ទទួលបន្ទុក អគ្គនាយក ស៊ីម៉ាក់ រួមជាមួយប្រធានអង្គការ JICA នៅកម្ពុជា។

បើតាមអង្គភាពស៊ីម៉ាក់ បានឱ្យដឹងថា ការសិក្សា​និងហ្វឹកហ្វឺនជំនាញបោសសម្អាតមីន និងយុទ្ធភណ្ឌ​មិនទាន់ផ្ទុះដល់មន្ត្រីអ៊ុយក្រែននេះ គឺទទួលបានការគាំទ្រដោយរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA)។

សកម្មភាពមីនមនុស្សធម៌លើវិស័យដោះមីននេះគឺកើតចេញ​ពីការប្តេជ្ញាចិត្តរួមគ្នារវាង​ប្រមុខរាជ​រដ្ឋាភិបាល​កម្ពុជា​សម្តេចតេជោ ហ៊ុន សែន និងនាយករដ្ឋមន្ត្រីជប៉ុន ​លោក Kishida Fumio ក្នុងជំនួប​ទ្វេភាគីនាពេលកិច្ចប្រជុំកំពូលអាស៊ាន ឆ្នាំ២០២២ ​ដែលកម្ពុជាធ្វើជាម្ចាស់ផ្ទះ។

ស៊ីម៉ាក់ បញ្ជាក់ថា ផលប៉ះពាល់នៃគ្រាប់មីន និងយុទ្ធភណ្ឌមិនទាន់ផ្ទុះ លើទឹកដីអ៊ុយក្រែន ដែល​បណ្តាល​ឱ្យមានជនស៊ីវិលស្លាប់បាត់បង់ជីវិត ​និងកំពុងក្លាយជាឧបសគ្គសម្រាប់ប្រជាជនអ៊ុយក្រែន ហើយកិច្ចខិតខំប្រឹងប្រែងបោសសម្អាត​ទាមទារ​ ឱ្យមានការតស៊ូ ​និងការ​អត់ធ្មត់ ដោយត្រូវការពេល​វេលាយូរ ដើម្បីសុវត្ថិភាព​ និងស្តារជីវភាពឡើងវិញរបស់ប្រជាពលរដ្ឋអ៊ុយក្រែន។

ប្រទេសកម្ពុជាឆ្លងកាត់​សង្គ្រាម​ជាច្រើន​ទសវត្សរ៍ ​ដែលបានបន្សល់​ទុកនូវគ្រាប់មីន និងយុទ្ធភណ្ឌមិន​ទាន់ផ្ទុះ​រាប់លានគ្រាប់រាយប៉ាយនៅទូទាំងប្រទេស។ ​ដោយសារតែបទពិសោធន៍ និងការឈឺចាប់​នៃផលប៉ះពាល់ដោយសារសង្គ្រាម ដែលបន្សល់ទុកនូវគ្រាប់មីន និងយុទ្ធភណ្ឌមិនទាន់​ផ្ទុះរាប់​លានគ្រាប់​នេះហើយ​ ទើបរាជរដ្ឋាភិបាលកម្ពុជា ​ចាត់ទុកកិច្ចសហប្រតិបត្តិការ លើវិស័យ​សកម្មភាពមីន ជាសកម្មភាពមនុស្សធម៌ ​មានសារៈសំខាន់សម្រាប់ជួយដល់ប្រទេស និង​ប្រជាជនអ៊ុយក្រែន ​ដែលកំពុងរងគ្រោះដោយសារសង្គ្រាម ដូចកម្ពុជាកាលពីជាង ៣០ ឆ្នាំមុនដែរ។

គួរបញ្ជាក់ថា​ មន្ត្រីជំនាញសកម្មភាពមីនរបស់អ៊ុយក្រែន ចាប់ផ្តើមហ្វឹកហ្វឺនជំនាញដោះមីន រយៈពេល​១សប្តាហ៍ចាប់ពីថ្ងៃទី១៦​ ខែមករា ​ឆ្នាំ២០២៣នេះតទៅ នៅវិទ្យាស្ថានបច្ចេកទេស​សកម្មភាពកម្ចាត់មីន ​ស៊ីម៉ាក់ក្នុងខេត្តកំពង់ឆ្នាំង និងធ្វើទស្សនកិច្ចតាមការដ្ឋានដោះមីន​នៅ​ខេត្តបាត់ដំបង និងសៀមរាបជាផងដែរ៕អត្ថបទ វ៉ន ដារ៉ា