កោះកុង៖ តំបន់អារ៉ែង ស្ថិតនៅក្នុងស្រុកថ្មបាំង កំពុងក្លាយជាទីពេញនិយមលំហែកាយកម្សាន្ត​សម្រាប់​អ្នកទេសចរគ្រប់មជ្ឈដ្ឋាន តាមរយៈការចូលរួមលើកកម្ពស់ ​និងអភិវឌ្ឍន៍ពីវិស័យឯកជន ខណៈដែលរាជរដ្ឋាភិបាលបើកប្រទេសស្តារសេដ្ឋកិច្ចឡើងវិញ។

បន្ទាប់ពីញំាញីដោយសារវិបត្តិជំងឺកូវីដ១៩ តំបន់អារ៉ែង ត្រូវបានអភិវឌ្ឍន៍ជាទីកន្លែងកម្សាន្ត​បែប​ធម្មជាតិ​ជាច្រើនពីសំណាក់វិស័យឯកជន ​ដើម្បីបំពេញតម្រូវការសេវាកម្មស្នាក់នៅ និងលំហែកាយ​របស់​ភ្ញៀវទេសចរណ៍ស្ទើរគ្រប់រដូវកាល។

ជាក់ស្តែង អំឡុងពេលរីករាលដាលជំងឺកូវីដ១៩ Areng Camping ស្ថិតនៅក្នុងឃុំថ្មដូនពៅ ស្រុកថ្មបាំង ខេត្តកោះកុង លាក់ខ្លួនសង្ងំ​កសាង​ហេដ្ឋា​រចនា​សម្ព័ន្ធវិស័យ​ទេសចរណ៍​យ៉ាង​ម៉ត់ចត់ រហូត​ដល់ផ្តើមបើកទ្វារទទួលគ្រប់ភ្ញៀវទេសចរជាតិ និងអន្តរជាតិចូលលេងកម្សាន្តជាង ៤ខែមកនេះ។

លោក ភោគ សុខេម តំណាងអ្នកគ្រប់គ្រង Areng Camping បានឱ្យដឹងនៅថ្ងៃទី៨ ខែមករា ឆ្នាំ២០២៣កន្លងទៅថ្មីៗថា មូលហេតុដែលលោកកែច្នៃជាតំបន់ទេសចរណ៍ដ៏គួរទាក់ទាញនេះឡើង ព្រោះថាតំបន់អារ៉ែងសំបូរទៅដោយសក្តានុពលអេកូទេសចរធម្មជាតិបែបលក្ខណៈនឹងទឹកជ្រោះព្រៃភ្នំ បើធៀបខេត្តតំបន់ភ្នំដ៏ទៃទៀតក្នុងប្រទេសកម្ពុជា។

លោក ភោគ សុខេម បង្ហាញបន្ថែមថា Areng Camping បានកំពុងតែក្លាយជាតំបន់ដ៏និយមមួយ​សម្រាប់​អ្នកទេសចរ​គ្រប់មជ្ឈដ្ឋានដែលមានបំណងមកលំហែកាយកម្សាន្ត ដោយបម្រើសេវា​កម្មដូចជា៖ កែច្នៃរថយន្តឱ្យក្លាយជាបន្ទប់ស្នាក់នៅ​ ផ្ទះតង់មានអាងទឹក ជិះខ្សែរ៉ត ជិះទូកតាម​ដងស្ទឹងអារ៉ែង បោះតង់ ជិះម៉ូតូទៅកាន់តំបន់កម្សាន្តផ្សេងៗ​ លេងបាញ់ធ្នូ និងទទួលទានអាហារបែបអ្នកតំបន់អារ៉ែងជាដើម។

ទាក់ទិននឹងការបង្កើតទេសចរណ៍មួយនេះដែរ ត្រូវបានអ្នកគ្រប់គ្រងទូទៅរបស់ Areng Camping អះអាងថា លោក​បានផ្តល់ឱកាសការងារដល់ពលរដ្ឋអ្នកភូមិផ្នែក​សេវាកម្មក្នុងតំបន់អារ៉ែង​ប្រមាណ៥០នាក់ ​និងចូលរួមចំណែក​លើកកម្ពស់ ​និងអភិវឌ្ឍន៍វិស័យទេសចរណ៍ជាមួយ​រាជរដ្ឋាភិបាល​កម្ពុជា​ ក៏ដូចជារដ្ឋបាលខេត្តកោះកុងផងដែរ។

ក្រុមអ្នកទេសចរដែលមកពីរាជធានីភ្នំពេញ ​និងបណ្តាខេត្តផ្សេងៗ ​បង្ហាញក្តីចំណាប់អារម្មណ៍​របស់​ពួកគេម្នាក់ៗថា​ កាលដែលនាំគ្នាមកលេងកម្សាន្តនៅទីនេះ ក៏ព្រោះ​បានដឹងពីទេសភាព​បៃតង​នៃតំបន់អារ៉ែង​ពិតជា​ស្រស់ស្រាយ​អាចបំបាត់ទុក្ខកង្វល់បានមួយចំនួនធំសម្រាប់ការសាកថ្មជីវិត។

ដោយឡែកលោក សុខ ចាន់គ្រឹស្នា ប្រធានមន្ទីរទេសចរណ៍ខេត្តកោះកុង បានមើលឃើញថា វិស័យទេសចរណ៍ នៅខេត្តកោះកុងហាក់ងើបឡើងវិញ បន្ទាប់ពីបញ្ហាជំងឺកូវីដ១៩ បានធូរស្រាល​ដែលការបង្កើតតំបន់ទេសចរណ៍កាន់តែច្រើន ​គឺផ្តល់ឱកាសការងារ សេដ្ឋកិច្ចចំណូល និងទាក់ទាញភ្ញៀវទេសចរបានមកស្គាល់ទឹកដីអារ៉ែង។

លោកប្រធានមន្ទីរទេសចរណ៍ខេត្ត បានបន្ថែមថា តំបន់អារ៉ែង លែងឯកោដូចពេលមុនៗហើយ ដោយ​សារតែរាជរដ្ឋាភិបាល​ ក៏ដូចជារដ្ឋបាលខេត្ត ​មន្ទីរពាក់ព័ន្ធ ផ្តោតការយកចិត្តទុកដាក់ខ្ពស់​លើការអភិវឌ្ឍផ្លូវថ្នល់ ស្ពាន និងភ្លើងអគ្គិសនី​ ដើម្បីផ្តល់ប្រយោជន៍ជូនពលរដ្ឋ និង​អ្នកទេសចរ​ផងដែរ។លោកជឿជាក់ថា ​តំបន់ទេសចរណ៍មិនទាន់កែច្នៃដ៏ទៃទៀតនៅក្នុងខេត្ត នឹងត្រូវបាន​អភិវឌ្ឍន៍បន្ថែម ក្នុងន័យទាក់ទាញភ្ញៀវទេសចរមកលេងកម្សាន្តទៅរដូវកាលនីមួយៗ។

គួរបញ្ជាក់ថា Areng Camping ត្រូវបានវិនិយោគ​ពង្រឹក​អាជីវកម្មលើផ្ទៃដីសរុបជាង៣ហិកតា ក្រោយការបើក​ប្រទេសស្តារសេដ្ឋកិច្ចឡើងវិញ ។ ​បច្ចុប្បន្នអ្នកទេសចរជិត១ម៉ឺននាក់​ហើយដែលមកលេងកម្សាន្ត​សុទ្ធតែកោតសរសើរមិនដាច់ពីមាត់ថា ​ភាពស្អាតប្លែក​មិនចាញ់នឹងបរទេស ​តាមរយៈពង្រឹង​គុណភាព ​និងសេវាកម្មទេសចរណ៍៕ អត្ថបទ ឈឹម មករា