ភ្នំពេញ៖ ក្រោមកិច្ចសហប្រតិបត្តិការ រវាងក្រសួងមុខងារសាធារណៈ និងធនាគារពិភពលោក (World Bank) ​ដោយមានសាលាភូមិន្ទរដ្ឋបាលជាអង្គភាពប្រតិបត្តិ ​នៅថ្ងៃទី១៦ ខែមករា នេះ បានរៀបចំពិធីបិទវគ្គបណ្តុះបណ្តាលជំនាន់ទី៣ ​និងបើកវគ្គបណ្តុះបណ្តាល ជំនាន់៤ និងបាឋកថាចែករំលែកបទពិសោធន៍ នៃកម្មវិធីភាពជាអ្នកដឹកនាំ និងនវានុវត្តន៍ ។

ឯកឧត្តម ព្រុំ សុខា រដ្ឋមន្ត្រីក្រសួងមុខងារសាធារណៈ ​បានចែករំលែកបទពិសោធន៍ និងចំណេះ ដឹងជាច្រើនពាក់ព័ន្ធនឹងភាពជាអ្នកដឹកនាំ នវានុវត្តន៍ ​និងគុណាធិបតេយ្យ ​ក្នុងរដ្ឋបាលសាធារណៈ ក្នុងនោះរួមមាន៖ ​ការកសាង ឬការធ្វើឱ្យមានឥទ្ធិពលសម្រាប់ភាពជាអ្នកដឹកនាំ, ការគោរពដោយ​ស្រលាញ់ ប្រសើរជាងការគោរពដោយខ្លាច, ​ការដឹកនាំរបៀបជាវីរជន និងការ​ដឹកនាំ​របៀប​មិនតាំង​ខ្លួន​ជាវីរជន​ និងកំណែទម្រង់រដ្ឋបាលសាធារណៈជាដើម។

ឯកឧត្តម យក់ ប៊ុនណា រដ្ឋលេខាធិការប្រចាំការ ​និងនាយកសាលាភូមិន្ទរដ្ឋបាល នៃក្រសួងមុខងារ សាធារណៈ បានឱ្យដឹងថា​ វគ្គបណ្តុះបណ្តាល ស្តីពី «ភាពជាអ្នកដឹកនាំ និងនវានុវត្តន៍ ត្រូវបាន​រៀបចំក្នុងគោលបំណងគាំទ្រការអភិវឌ្ឍចំណេះដឹងជំនាញ និងផ្តល់នូវឱកាសបណ្តុះបណ្តាល ដែល​ឆ្លើយតបនឹងតម្រូវការអភិវឌ្ឍសមត្ថភាពពិតប្រាកដ​ របស់មន្ត្រីជាន់ខ្ពស់កម្ពុជា ។

វគ្គនេះ បានបណ្តុះបណ្តាល ចំនួន៣ជំនាន់រួចមកហើយ ​ដែលសិក្ខាកាមចូលរួមគឺជាថ្នាក់ដឹកនាំ ជាន់ខ្ពស់ ​កម្រិតប្រធាននាយកដ្ឋាន រហូតដល់រដ្ឋលេខាធិការ​ ឬមុខតំណែងប្រហាក់ប្រហែល តាម​បណ្តា ក្រសួង ស្ថាប័ន ចំនួន៣១ ​និងមានមុខតំណែងជាអភិបាលក្រុង ស្រុក ​នាយករដ្ឋបាល ឬមុខតំណែង ​ប្រហាក់ប្រហែល​ រហូតដល់អភិបាលរាជធានីខេត្ត ​ទាំង២៥ សរុបចំនួន៤៨៣នាក់ ស្រី៧៦នាក់ ​ដោយទទួលការបណ្តុះបណ្តាលតាមរយៈប្រព័ន្ធអនឡាញ និងការសិក្សាដោយផ្ទាល់​នៅ​សាលាភូមិន្ទរដ្ឋបាល។

បច្ចុប្បន្ននេះសិក្ខាកាមជំនាន់ទី៤ ​ដែលកំពុងទទួលការបណ្តុះបណ្តាលនៅសាលាភូមិន្ទរដ្ឋបាល មានចំនួន ​១៨៨នាក់ ស្រីចំនួន៣៦នាក់ ​មក​ពីក្រសួង ​ស្ថាប័ន ចំនួន២៨ និងរដ្ឋបាលថ្នាក់ក្រោមជាតិ​ទាំង២៥រាជ ធានី- ខេត្ត ។

ពិធីនេះ​ប្រារព្ធ​ធ្វើឡើងនៅសណ្ឋាគាររ៉េស៊ីដង់ សុខា ភ្នំពេញ ​ដោយមានការអញ្ជើញចូលរួមពីដៃគូ អភិវឌ្ឍន៍ ​រួមមាន៖ តំណាងធនាគារពិភពលោក ​សហភាពអឺរ៉ុបប្រចាំប្រទេសកម្ពុជា និងស្ថានទូត​អូស្ត្រាលី ប្រចាំប្រទេសកម្ពុជាផងដែរ ៕អត្ថបទ៖ ទូច សោភ័ណ