កំពត៖ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចុះពិនិត្យ ព្យាបាលជំងឺជូនប្រជាពលរដ្ឋ​ដោយ​​ឥតគិតថ្លៃ និងចាក់វ៉ាក់សាំងបង្ការកូវីដ-១៩ ​ដោយឥតគិតថ្លៃ និងឥតគិតថវិកាបេសកកម្ម នៅវិទ្យាល័យ ទូកមាស ស្រុកបន្ទាយមាស ខេត្តកំពត នៅថ្ងៃទី១៥ ខែមករា ឆ្នាំ២០២៣។

ឯកឧត្តម លេង ផាលី រដ្ឋលេខាធិការក្រសួងផែនការ និងជាប្រធានប្រតិបត្តិក្រុមការងារ​គ្រូពេទ្យ​ស្ម័គ្រចិត្ត ឯកឧត្តម ហ៊ុន ម៉ានី បានលើកឡើងថា​ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៦៦៧នាក់​ សហការជាមួយអាជ្ញាធរខេត្តកំពត​ មន្ទីរជុំវិញខេត្តដែលពាក់ព័ន្ធ សហភាព​សហព័ន្ធយុវជន​កម្ពុជាខេត្ត ​បានចុះបណ្តុះបណ្តាលវគ្គសង្រ្គោះបឋម ពិនិត្យ​ព្យាបាលជំងឺ​ចាក់វ៉ាក់សាំង​បង្ការជំងឺកូវីដ-១៩​ និងចែកឱសថ​ ជូនបងប្អូនប្រជាពលរដ្ឋចំនួន​ ៥៣៣៨នាក់ ដោយឥតគិតថ្លៃ។

ឯកឧត្តម សុះ មូសិន តំណាងដ៏ខ្ពង់ខ្ពស់ឯកឧត្តម ហ៊ុន ម៉ានី ប្រធាន​សហភាពសហព័ន្ធ​យុវជន​កម្ពុជា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម​ ហ៊ុន ម៉ានី បានកោតសរសើរ​ខ្ពស់ចំពោះក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី តែងតែមានសកម្មភាព​យ៉ាង​សកម្ម​ចុះជួយពិនិត្យព្យាបាលជំងឺជូនប្រជាពលរដ្ឋដោយឥតគិតថ្លៃ​ ដែល​ជាអំណោយ ​ដ៏ថ្លៃថ្លារបស់ ឯកឧត្តម​ ហ៊ុន ម៉ានី និងចាក់វ៉ាក់សាំងបង្ការកូវីដ-១៩​ ដោយឥតគិតថ្លៃ ​និងឥតគិតថវិកា​បេសកកម្ម​ជាច្រើនលើកច្រើនសារក្នុងខេត្តកំពត។

ជាមួយគ្នានោះដែរបងប្អូនប្រជាពលរដ្ឋ ក្មេង ចាស់ ប្រុស ស្រី សូមអរគុណដល់អាជ្ញាធរមូលដ្ឋាន​សម្រាប់​កិច្ចសហការយ៉ាងល្អ និងក្រុមគ្រូពេទ្យស្ម័គ្រចិត្តឯកឧត្តម​ ហ៊ុន ម៉ានី ទាំងអស់ ដែលបាន​បំពេញ​ភារកិច្ចយ៉ាងមោះមុត​ ប្រកបដោយ​ស្នាមញញឹម ​និងទំនួល​ខុសត្រូវខ្ពស់ ដោយមិនគិតពី​ការនឿយហត់ ​ដើម្បីលើក​កម្ពស់​សុខុមាលភាព​របស់ពួកគាត់។

ការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ​ដែលមានក្រុមគ្រូពេទ្យចំនួន​ ៩,៥៤៩នាក់ បាន​ចុះអប់រំផ្សព្វផ្សាយ ​ចាក់វ៉ាក់សាំងបង្កាកូវីដ-១៩​ ក្នុងក្របខណ្ឌទូទាំងប្រទេស​ សង្គ្រោះបឋម យក​សំណាករកវីរុសកូវីដ-១៩ ​និងពិនិត្យ ព្យាបាលជំងឺជូនប្រជាពលរដ្ឋដោយឥតគិតថ្លៃក្នុង២៥រាជធានី- ខេត្ត នៃព្រះរាជាណាចក្រកម្ពុជា បានចំនួន ៧៧៩លើក៕អត្ថបទ រដ្ឋា