មីយ៉ាន់ម៉ា៖ អតីតមន្ត្រីជាន់ខ្ពស់អង្គការសហប្រជាជាតិបាននិយាយថា យោធាសហភាពមីយ៉ាន់ម៉ាកំពុងផលិតអាវុធជាច្រើនប្រភេទ ដើម្បីប្រើប្រាស់ទប់ទល់ប្រជាជនរបស់ខ្លួន ខណៈមានការផ្គត់ផ្គង់ពីក្រុមហ៊ុនជាច្រើននៅក្នុងប្រទេស យ៉ាងហោចណាស់ចំនួន ១៣ក្រុមហ៊ុន។
សហរដ្ឋអាមេរិក បារាំង ឥណ្ឌា និងប្រទេសជប៉ុនស្ថិតក្នុងចំណោមប្រទេសដែលបានដាក់ឈ្មោះ ទោះបីជាមានការដាក់ទណ្ឌកម្មដឹកនាំដោយប្រទេសលោកខាងលិច ដែលមានបំណងធ្វើឱ្យសហភាពមីយ៉ាន់ម៉ាស្ថិតនៅឯកោក៏ដោយ។ របាយការណ៍និយាយថា អាវុធផលិតក្នុងស្រុកត្រូវបានប្រើ ដើម្បីប្រព្រឹត្តអំពើឃោរឃៅទៅលើអ្នកដែលប្រឆាំងរបបយោធា។ ក្រុមប្រឹក្សាយោបល់ពិសេសលើរបាយការណ៍របស់មីយ៉ាន់ម៉ាបាននិយាយថា រដ្ឋជាសមាជិកអង្គការសហប្រជាជាតិមួយចំនួនបានបន្តលក់អាវុធឱ្យយោធាមីយ៉ាន់ម៉ា។ ក្រុមប្រឹក្សានិយាយថា ទោះជាយ៉ាងណាកត្តាសំខាន់ស្មើគ្នាមួយគឺការពិតដែលថា កងកម្លាំងប្រដាប់អាវុធរបស់មីយ៉ាន់ម៉ាអាចផលិតអាវុធ ជាច្រើនប្រភេទនៅក្នុងសហភាពនេះ ដែលត្រូវបានប្រើប្រាស់ដើម្បីដាក់គោលដៅលើជនស៊ីវិល។
របាយការណ៍បាននិយាយថា ក្រុមហ៊ុនមានឈ្មោះផ្គត់ផ្គង់ដល់យោធាមីយ៉ាន់ម៉ា ដោយរួមមានទាំងវត្ថុធាតុដើម ការហ្វឹកហាត់ និងគ្រឿងម៉ាស៊ីន ហើយអាវុធដែលផលិតបានជាលទ្ធផលពុំត្រូវបានប្រើ ដើម្បីការពារព្រំដែនរបស់ខ្លួននោះទេ។ លោក Yanghee Lee អតីតអ្នករាយការណ៍ពិសេស របស់អង្គការសហប្រជាជាតិទទួលបន្ទុកសិទ្ធិមនុស្ស និងជាអ្នកសរសេររបាយការណ៍ម្នាក់បានពន្យល់ថា មីយ៉ាន់ម៉ាពុំធ្លាប់ត្រូវបានវាយប្រហារដោយបរទេសនោះទេ ហើយមីយ៉ាន់ម៉ាក៏មិននាំចេញអាវុធណាមួយដែរ។ ចាប់តាំងពីឆ្នាំ១៩៥០ មកប្រទេសនេះបានផលិតអាវុធផ្ទាល់ខ្លួន ដើម្បីប្រើប្រាស់ប្រឆាំងប្រជាជនរបស់ខ្លួន។ ជាផ្លូវការមនុស្សជាង ២,៦០០នាក់ត្រូវបានសម្លាប់ដោយយោធាចាប់តាំងពីរដ្ឋប្រហារ ហើយទោះជាយ៉ាងណាចំនួនអ្នកស្លាប់ពិតប្រាកដត្រូវបានគេគិតថា ខ្ពស់ជាងនេះ ១០ដង៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
