កណ្ដាល៖ គណៈកម្មាធិការគ្រប់គ្រងគ្រោះមហន្តរាយខេត្តកណ្តាល បានឲ្យដឹងថា មកដល់ថ្ងៃទី១៦ ខែមករានេះ​ ទឹកស្ទឹងព្រែកត្នោត នៅក្នុងភូមិសាស្ត្រខេត្តកណ្តាល បានហក់ឡើងលឿន បង្កឲ្យ​ប៉ះពាល់៧០ភូមិ នៅក្នុងស្រុកក្រុងចំនួន៤ ដូចជា ក្រុងតាខ្មៅ ​ស្រុកអង្គស្នួល កណ្តាលស្ទឹង និងស្រុកពញាឮ ។

លោកស្រី ឡាយ ដាលីន ប្រធានគណៈកម្មាធិការគ្រប់គ្រងគ្រោះមហន្តរាយខេត្តកណ្តាល បានឱ្យ ដឹងថា ​ស្ថានភាពទឹកជំនន់ព្រែកត្នោត ក្នុងរយៈពេលជិត១សប្តាហ៍នេះ បានបង្កឱ្យមានការបាក់​ស្ពានឈើ មួយកន្លែង លិចដំណាំជាង៤ហិកតា នៅសង្កាត់ព្រែកហូរ ក្រុងតាខ្មៅ ​លិចវត្ត២កន្លែង និងសាលារៀន ១កន្លែង លិចផ្លូវ៨ខ្សែ នៅស្រុកអង្គស្នួល បង្កការ​ប៉ះពាល់ដំណាំ ជិត១០០០ហិកតា នៅស្រុកពញាឮ និងបង្កការលិចដីដំណាំ២៦១ហិកតា​ នៅស្រុកកណ្តាលស្ទឹង តែពុំទាន់បង្កការខូចខាតដល់ផលដំណាំ នោះទេ ។

ប្រជាពលរដ្ឋ នៅក្នុងសង្កាត់ព្រែកហូរ ក្រុងតាខ្មៅ បានឱ្យដឹងថា ​នៅពេលនេះ ​ប្រសិនបើទឹកជំនន់ ស្ទឹងព្រែកត្នោត បន្តអូសបន្លាយរយៈពេលយូរថ្ងៃតទៅទៀត និងធ្វើឲ្យផលដំណាំរងការខូចខាត​ធ្ងន់ធ្ងរជា មិនខាន ។

យ៉ាងណាក៏ដោយ នៅក្នុងអំឡុងពេលនេះ រដ្ឋបាលខេត្តកណ្តាល រួមទាំងកាកបាទក្រហមកម្ពុជា បាននឹងកំពុងបែងចែកកម្លាំងចុះតាមដានស្ថានភាពទឹក​ និងជួយពលរដ្ឋនៅតាមភូមិ ដោយ​បានធ្វើសកម្ម ​ភាពជួយជម្លៀសពលរដ្ឋទៅទីទួលសុវត្ថិភាព និងផ្ដល់អំណោយសង្ក្រោះបណ្តើរៗរួចហើយ ៕អត្ថបទ៖ ស៊ុម សុខជា