ភ្នំពេញ៖ ក្នុងឱកាសអញ្ជើញទៅបំពេញទស្សនកិច្ចផ្លូវការនៅសាធារណរដ្ឋម៉ាល់ឌីវ និងមានជំនួបទ្វេភាគីជាមួយឯកឧត្តម អ៊ីប្រាហ៊ីម ម៉ូហាមេដ សូលី (Ibrahim Mohamed Solih) ប្រធានាធិបតី នៃសាធារណរដ្ឋម៉ាល់ឌីវ សម្តចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសនៅចំពោះមុខឯកឧត្តម អ៊ីប្រាហ៊ីម ម៉ូហាមេដ សូលី ប្រធានាធិបតីសាធារណរដ្ឋម៉ាល់ឌី ក្នុងសន្និសីទរួមគ្នាថា កម្ពុជានឹងជ្រើសរើសយកផ្លូវមួយខ្សែនៅខេត្តជាប់មាត់សមុទ្រគឺខេត្តព្រះសីហនុដាក់ឈ្មោះ ជា«វិថីមិត្តភាពកម្ពុជា-ម៉ាល់ឌីវ»។
សម្តេចតេជោ ហ៊ុន សែនបានលើកឡើងអំពីទំនាក់ទំនងខាងនយោបាយដែលឆ្នាំនេះជាខួបលើកទី២៨នៃទំនាក់ទំនងការទូតរវាងប្រទេសទាំង២កម្ពុជា ម៉ាល់ឌីវហើយដើម្បីបង្ហាញអំពីការយកចិត្តទុកដាក់លើទំនាក់ទំនងការទូតនេះ សម្តេចថា៖កម្ពុជាសម្រេចនឹងជ្រើសរើសយកផ្លូវ១ខ្សែនៅតំបន់ទេសចរណ៍មាត់សមុទ្រនៃខេត្តព្រះសីហនុដាក់ឈ្មោះថាជាផ្លូវមិត្តភាពកម្ពុជា -ម៉ាល់ឌីវ។
សម្តេចតេជោបានបញ្ជាក់ថា ទស្សនកិច្ចរបស់សម្តេចមកកាន់ម៉ាល់ឌីវនេះជាការបើកផ្លូវមួយដ៏សំខាន់ក្នុងទំនាក់ទំនងរវាងប្រទេសទាំង២ ហើយពេលវិលត្រឡប់ទៅកម្ពុជាវិញ សម្តេចនឹងរកផ្លូវ១ខ្សែដើម្បីប្រែក្លាយទៅជាផ្លូវមិត្តភាពកម្ពុជា ម៉ាល់ឌីវ ហើយនៅពេលទស្សនកិច្ចរបស់ប្រធានាធិបតីមាល់ឌីវ ទៅកម្ពុជាវិញនឹងធ្វើពិធីសម្ពោធតែម្តងដើម្បីជានិមិត្តរូបនៃសាមគ្គីភាពរវាងកម្ពុជានិងម៉ាល់ឌីវដែលសុទ្ធតែជាប្រទេសកំពុងអភិវឌ្ឍន៍ដូចគ្នា។
គួរបញ្ជាក់ថា ខេត្តព្រះសីហនុមានផ្លូវថ្មីៗជាច្រើនខ្សែដែលត្រូវបានរាជរដ្ឋាភិបាលផ្តល់កញ្ចប់ថវិកាសន្សំធ្វើការអភិវឌ្ឍប្រកបដោយការទាក់ទាញដែលធ្វើឱ្យខេត្តមាត់សមុទ្រមួយនេះបានប្រែមុខមាត់យ៉ាងឆាប់រហ័សពោរពេញដោយសោភណ្ឌភាពនិងទាក់ទាញភ្ញៀវទេសចរណ៍ជាតិ និងអន្តរជាតិតែងតែចង់ទៅទស្សនាកម្សាន្ត៕ អត្ថបទ៖ មុត សុទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
