តាខ្មៅ៖ នៅថ្ងៃទី១៧ ខែមករាឆ្នាំ ២០២៣ នេះ បណ្តា​លំនៅដ្ឋាន​ពលរដ្ឋ​ដែល​សង់​ជាប់​មាត់​ព្រែកថី នៅភូមិព្រែកថី និងភូមិព្រែកសំរោង សង្កាត់រកាខ្ពស់ ក្រុងតាខ្មៅ ខេត្តកណ្តាល បាន​ស្ម័គ្រ​ចិត្ត រុះរើផ្ទះទាំងអស់គ្នាចេញពីមាត់ព្រែក ក្រោយមានជំនន់ទឹកភ្លៀងទឹកស្ទឹងព្រែកត្នោត បាន​ហូរ​កាត់​ព្រែក​ថី​ធ្វើឲ្យផ្ទះសំបែងពលរដ្ឋជាច្រើនខ្នងបានរលំបាក់ស្រុតធ្លាក់ចូលក្នុងព្រែក។

តាម​របាយការណ៍រដ្ឋបាលសង្កាត់រកាខ្ពស់បានឲ្យដឹងថា រហូតមកដល់ថ្ងៃទី១៧ ខែមករានេះ មាន​គ្រប់​​លំនៅដ្ឋានពលរដ្ឋដែលបានសង់ជាប់មាត់ព្រែកថី បាន និង​កំពុង​ស្ម័គ្រ​ចិត្ត​ធ្វើ​ការ​រុះរើ​ផ្ទះ​ចេញ​ពី​មាត់​ព្រែក​ជាបន្តបន្ទាប់ ខណៈរហូតមកដល់ពេលនេះ មានផ្ទះពលរដ្ឋចំនួន ៦ខ្នងផ្ទះ បាន​រំលំ​បាក់​ស្រុត​ចូលទៅក្នុងព្រែក។

ពលរដ្ឋថ្លែងថា ការស្ម័គ្រចិត្តរុះរើផ្ទះសំបែងចេញពីមាត់ព្រែកថីនេះ ដោយសារ នៅខាង​ក្រោម​ផ្ទះ​ផ្នែក​ខាង​ក្រោយ ​គឺ​ទឹក​បានហូរបាក់ដីជាបន្តបន្ទាប់ ធ្វើផ្ទះប្រឈមនឹងការបាក់ស្រុត។

សូម​បញ្ជាក់ថា តាមរបាយការណ៍បឋមរបស់រដ្ឋបាលសង្កាត់រការខ្ពស់ នៅតាមមាត់ព្រែកថីនេះ មាន​លំនៅដ្ឋាន​ពលរដ្ឋសង់ជាប់មាត់ព្រែកមានប្រមាណជាង ៧០ខ្នងផ្ទះ មាន​ផ្ទះបាក់​ស្រុត​ ៦ខ្នង​ផ្ទះ​​មាន​មនុស្សរស់នៅ ៧គ្រួសារ ផ្ទះប៉ះពាល់ ៦១​ខ្នងផ្ទះ មាន​មនុស្សរស់នៅ ៦៥គ្រួសារ និង​មាន​ផ្ទះ​ជិត​ ៣០ខ្នងផ្ទះ បាន និងកំពុងពន្លឿនការរុះរើ។

យ៉ាង​ណាក៏ដោយ នៅក្នុងអំឡុងពេល រដ្ឋបាលខេត្តកណ្តាល ចុះធ្វើ​ការ​អន្តរាគមន៍​ជួយ​សង្គ្រោះ​បន្ទាន់ចែកអំណោយ និងមានកងកម្លាំងនគរបាល អាវុធហត្ថ ប្រជាការពារភូមិ និងបណ្តាពលរដ្ឋ និង​​​យុវជន​ស្ម័គ្រចិត្ត បាន និងកំពុងរួមសហការជួយរុះរើផ្ទះរបស់ពលរដ្ឋ៕ អត្ថបទ៖ ស៊ុម សុខជា